Viadomy staličny daŭhabud «Mahnit Minska» paśla vaśmihadovaha pierapynku narešcie ŭzialisia dabudoŭvać, ciapier im zajmajecca budtrest №4. Na abjekcie pracujuć bolš za 280 čałaviek u dźvie źmieny, paviedamiŭ «Minskbud».
«U «Mahnicie Minska» buduć pabudavanyja 352 kvatery. Płanujecca, što žyllo budzie arendnym. Zaviaršyć budaŭnictva nieabchodna da kanca biahučaha hoda», — raspaviali ŭ «Minskbudzie».
Na hety momant viaducca raboty nad centralnaj častkaj z pamiaškańniami handlova-hramadskaha pryznačeńnia, šmatuzroŭnievym adkrytym i dvuchuzroŭnievym zakrytym parkinhami na 279 i 383 miescy. Potym voźmucca za 11-paviarchovyja «kryły», dzie budzie žyllo, a taksama nižnija ŭzroŭni z handlovymi pamiaškańniami i padziemnymi parkinhami (2-ja i 3-ja čerhi).
«Mahnit Minska» na skryžavańni vulicy Kiryły Turaŭskaha i praśpiekta Niezaležnaści pieršapačatkova pavinien byŭ stać kompleksam ź biznes-centram i hatelem. Jaho pačali płanavać jašče ŭ 2009 hodzie, kali Alaksandr Łukašenka svaim ukazam zaćvierdziŭ umovy budaŭnictva dla biełaruskaj «dački» iranskaj kampanii «Kiejsan». Ale paśla taho ambicyjnyja płany davodziłasia nieadnarazova pierahladać, a ŭrešcie prajekt byŭ na praciahły čas faktyčna zamarožany.
29 listapada minułaha hoda abjekt chacieli pradać z aŭkcyjonu, ale tarhi pravalilisia, bo na ich nichto nie zapisaŭsia.
Biełaruskaja błohierka pakazała, jaki žach moža adbyvacca z vusnami, kali chočaš ich pavialičyć — a potym pamienšyć7
Kamientary