Jak možna zadanacić i padtrymać palitviaźniaŭ: śpis arhanizacyj
Sabrali śpis inicyjatyŭ, z dapamohaj jakich možna być karysnymi dla našych hierojaŭ. Źviarnicie ŭvahu: nie varta danacić z kartak biełaruskich bankaŭ.
Dissidentby
Kali nie chočacie składanaściej, a žadajecie prosta zrabić dobruju spravu, źviarnicie ŭvahu na hetuju inicyjatyvu. Dissidentby dapamahaje źbirać pieradačy i pasyłki ŭ miescy źniavoleńnia, a taksama znachodzić hrošy dla pieravodu na asabisty rachunak palitviaźniaŭ. Inicyjatyva taksama źbiraje infarmacyju pra palitviaźniaŭ i davodzić jaje da hramadskaści.
Zručny sposab achviaravać — padpiska na Patreon inicyjatyvy, taksama možna pieravieści hrošy pa rekvizitach ź ich sajta. A možna jašče i atrymać za svaju dapamohu natchnialny mierč ad Dissidentby: dla hetaha aformicie praz sajt (akno «Ahulny zbor») adnarazovy pieravod inicyjatyvie na sumu ad 15 dalaraŭ ci jeŭra.
Politzek.me
Hety prajekt štaba Babaryki pačynaŭsia jak miesca, dzie možna znajści historyju palitviaźnia, daviedacca pra jaho miescaznachodžańnie i abrać sposab, jak hetaha viaźnia padtrymać. Ź ciaham času na sajcie politzek.me źjaviŭsia kanstruktar listoŭ (na vypadak, kali vam ciažka prydumlać listy), padkazki pa napisańni listoŭ i inšych sposabach padtrymki, a jašče svajo miedyja Politzek Times.
Krychu bolš za hod tamu kamanda prajekta zapuściła jašče i staronku dla danataŭ. Praz servis Digital Solidarity (tut) možna achviaravać na zbor pieradač ci apłatu pasłuh advakataŭ dla tych siamiej palitviaźniaŭ, jakija źviartajucca ŭ politzek.me pa takuju dapamohu.
«Bajsoł»
Hety fond salidarnaści ŭźnik paśla pačatku represij 2020 hoda. Ciapier jon dapamahaje represavanym i paciarpiełym ad režymu biełarusam, u tym liku siemjam palitviaźniaŭ, padtrymlivaje byłych palitviaźniaŭ, ukrainskija inicyjatyvy i aktyvistaŭ.
U «Bajsoła» jość niekalki zboraŭ, źviazanych z palitviaźniami, ich možna znajści tut. Nie možacie vybrać? Adznačym zbor na toje, kab dzieci našych hierojaŭ zmahli adpačyć hetym letam, a taksama zbor na dapamohu siemjam byłych palitviaźniaŭ ź dziećmi.
«Viasna» / Viasna
Viadučy biełaruski pravaabarončy centr robić niejmavierna šmat dla taho, kab historyi palitviaźniaŭ nie atrymałasia zamaŭčać i kab śviet, i sami biełarusy pierš za ŭsio, pra ich nie zabyli. «Viasna» dakumientuje parušeńni pravoŭ čałavieka, raskazvaje historyi palitviaźniaŭ i padkazvaje, jak ich lepš za ŭsio padtrymać. Samich viasnoŭcaŭ represii taksama nie abyšli bokam: prosta ciapier za kratami znachodzicca šaściora pradstaŭnikoŭ arhanizacyi.
Kali žadajecie padtrymać «Viasnu», źviarnicie ŭvahu na ich Patreon.
«Palitviazynka»
Žurnalistka Jaŭhienija Doŭhaja stvaraje niekalki prajektaŭ, adzin ź jakich — «Palitviazynka» — pryśviečany palitźniavolenym biełaruskam. Na staroncy prajekta ŭ instahramie Jaŭhienija raskazvaje historyi hetych žančyn i fakty ź ich žyćcia, a taksama źbiraje danaty na karyść biełaruskich palitviazynak. Paŭdzielničać možna praz Patreon. Abo možna zadanacić palitviazynkam praz Paypal z paznakaj «banderol».
«Volnyja paštoŭki»
Aktyvisty hetaj inicyjatyvy źbirajuć malunki palitviaźniaŭ i raźmiaščajuć ich na paštoŭkach i inšym mierčy. Možna zadanacić im praz «Bajsoł» i atrymać u padarunak u zaležnaści ad sumy achviaravańnia paštoŭki, razmaloŭki, kubak, šopier abo cišotku. Usie achviaravańni iduć na karyść Dissidentby.
«Kraina dla žyćcia»
Hety fond raspracavaŭ prahramu salidarnaści, jakaja daje mahčymaść čałavieku ci arhanizacyi stać siabram dla siamji palitviaźnia. U pieryjad ad 3 da 12 miesiacaŭ taki siabar musić kožny miesiac padtrymlivać siamju na sumu ad 100 jeŭra (ale možna damovicca i na mienšyja sumy). Ankieta dla tych, chto žadaje paŭdzielničać, znachodzicca tut.
Taksama fond maje sistemu danataŭ, ź jakich «Kraina dla žyćcia» vypłačvaje siemjam palitviaźniaŭ pa 300 jeŭra. Paŭdzielničać možna tut.
Čym jašče dapamahčy
Kali pa niejkich pryčynach nie žadajecie danacić, to zaŭsiody možna zrabić pieravod kankretnamu viaźniu, dasłać jamu pasyłku ci banderol, prynieści pieradaču (zahadzia prahledźcie tłumačałku ad «Viasny»).
Nie varta niedaaceńvać važnaść listoŭ. Navat ciapier, kali ich pieradajuć duža redka, kožny listočak zvonku pa-raniejšamu značyć dla našych hierojaŭ duža šmat. Adrasy palitviaźniaŭ šukajem na sajtach «Viasny», politzek.me i dissidentby.com (voś spasyłka na lusterka apošniaha).
Kali viaźni jašče ŭ SIZA, možna dasyłać im telehramy — voś padkazki. Narešcie, kali vy ŭ biaśpiecy, rabicie reposty infarmacyi pra palitviaźniaŭ i raskazvajcie pra ich, heta sapraŭdy vielmi važna. I prychodźcie na imprezy ŭ suviazi z Dniom palitviaźnia, jakija projduć pa ŭsim śviecie.
«Naša Niva» — bastyjon biełaruščyny
PADTRYMAĆKolki palitviaźniaŭ pamierła ci źviało rachunki z žyćciom praź nievynosnyja ŭmovy za kratami
«Skazali prosta ŭ tvar, chto mianie zdaŭ». Byłyja palitviaźni raskazvajuć, jak sukamierniki stanoviacca stukačami i ci jość danosčyki siarod palityčnych
«Što było ŭ turmie, zastajecca ŭ turmie». Viaźni i palitviaźni z «nizkim sacyjalnym statusam»? Što pra heta viadoma
Łukašenka pamiłavaŭ eks-kiraŭnika svajoj achovy Uciuryna7
Kamientary
Ale heta nie admianiaje taho, što sapraŭdy šyrokuju, sistemnuju dapamohi palitviaźniam dy ich siemjam (i nie tolki im, naturalna) možna arhanizavać tolki źbirajučy hrošy metanakiravana i centralizavana, i tut nie abyścisia bieź śpiecyjalizavanych instytucyj. Mienavita tamu režym takija arhanizacyi i kryminalizuje.