Ukraincy zachapili pamiežny punkt, padyšli da horada Hrajvarana ŭ Biełharodskaj vobłaści
Upieršyniu bai z vykarystańniem viertalotaŭ i braniatechniki adbyvajucca na terytoryi Rasii.
Siońnia ŭranku ŭzbrojenaja hrupa pry padtrymcy jak minimum adnaho tanka i niekalkich adzinak braniatechniki zajšła na terytoryju Biełharodskaj vobłaści Rasii. Paśla karotkaha boju jany zachapili pahraničny punkt i prajšli praź niekalki nasielenych punktaŭ u kirunku horada Hrajvarana.
Horad Hrajvaran z nasielnictvam 6000 čałaviek znachodzicca za 5 kiłamietraŭ ad ukrainskaj miažy na aŭtadarozie Achtyrka — Tamaroŭka — Biełharad. Zaniatyja ŭkrainskimi siłami sioły Kazinka, Hara-Padoł i Hłotava lažać sucelnaj smuhoj ad miažy da Hrajvarana.
Rasijskija ŚMI paviedamlajuć pra artyleryjski abstreł Hrajvarana. U niebie nad vobłaściu nazirali rasijskija vajskovyja viertaloty. Paviedamlajecca ab pryviadzieńni palicyi vobłaści ŭ stan poŭnaj hatoŭnaści, a taksama ab pošuku dyviersijnych hrup u roznych rajonach vobłaści. ŚMI paviedamlajuć pra evakuacyju nasielnictva Hrajvarana i prylehłych nasielenych punktaŭ.
Adkaznaść za padziei ŭziali na siabie lehijon «Svaboda Rasii» i Ruski dobraachvotnicki korpus. Jany zajavili, što «vyzvalili» nasieleny punkt Kazinka Biełharodskaj vobłaści ŭ metach stvareńnia na prymiežnaj rasijskaj terytoryi bufiernaj zony, kab abaranić terytoryju Ukrainy ad abstrełaŭ.
Taksama jany paviedamili pra ŭvachod «pieradavych atradaŭ» u horad Hrajvaran — adnak apošniamu niama paćviardžeńnia ŭ rasijskich kanałach.
Uranku paviedamleńni ŭkrainskich kanałaŭ i rasijskich dobraachvotnickich padraździaleńniaŭ ab zachopie pamiežnaha punkta ŭłady rasijskaha rehijona nazyvali fejkami i infarmacyjnaj atakaj. Paźniej hubiernatar Biełharodskaj vobłaści Viačasłaŭ Hładkoŭ zajaviŭ, što na terytoryju Hrajvaronskaj akruhi zajšła dyviersijna-raźviedvalnaja hrupa USU.
«Uzbrojenyja siły RF razam z pahransłužbaj, Rashvardyjaj i FSB prymajuć nieabchodnyja miery pa likvidacyi praciŭnika», — zajaviŭ Hładkoŭ.
Źjavilisia fota, jak śćviardžajecca, z nasielenych punktaŭ Biełharodskaj vobłaści, kudy zajšli dyviersanty, a taksama šmatlikich aŭtobusaŭ, adpraŭlenych dla evakuacyi nasielnictva.
U Biełharodskaj vobłaści abjaŭleny ahulny zbor supracoŭnikaŭ va ŭsich adździełach unutranych spraŭ rehijona.
Infarmavany telehram-kanał Baza paviedamiŭ pra krušeńnie pad Biełharadam rasijskaha vajskovaha viertalota Mi-8.
U HUR Ukrainy padziei ŭ Biełharodskaj vobłaści Rasii prakamientavali tak.
Metaj apieracyi pradstaŭnik vajskovaj raźviedki Andrej Jusaŭ nazvaŭ «stvareńnie pałasy biaśpieki dla abarony mirnych ukraincaŭ».
«Padziei ŭ Biełharodskaj vobłaści i inšych prymiežnych terytoryjach — nastupstvy poŭnamaštabnaha ŭvarvańnia i ahresiŭnaj vajny pucinskaj Rasii suprać Ukrainy. Tak, adkaznaść za hetyja padziei ŭziali na siabie hramadzianie RF, a mienavita siły RDK i lehijona «Svaboda Rasii». Ja dumaju, što my ŭsie tolki možam pavitać rašučyja dziejańni apazicyjna nastrojenych hramadzian Rasii, jakija hatovyja da ŭzbrojenaj baraćby sa złačynnym režymam Pucina», — cytuje pradstaŭnika HUR telebačańnie «Hromadśkie».
Braty-bliźniaty pryjšli pracavać u milicyju. Adzin ź ich pierapłyŭ raku i ŭciok ź Biełarusi, kab nie zajmacca palityčnymi spravami. Pahutaryli ź im1212
Kamientary