«My na siońnia prajhrajom vajnu. Dzie našy kłoŭny?» Pryhožyn znoŭ prajšoŭsia pa Šajhu i Hierasimavie i prapanavaŭ ich rasstralać
Kiraŭnik PVK «Vahnier» daŭ čarhovaje skandalnaje intervju. Jon adkazaŭ na pytańni pra situacyju ŭ rasijskaj armii i pierśpiektyvy vajny. Jaŭhien Pryhožyn zajaviŭ, što pakul vahnieraŭcy na froncie, «Šajhu budzie valać durnia i siadzieć [u budynku Minabarony RF] na Frunzienskaj, a Hierasimaŭ kožny ranak budzie vypivać šklanku harełki, bicca ŭ paranoi, harłapanić i viščać, patrabujučy adbić terytoryju».
«Jak tolki USU trochi zojduć uhłyb terytoryi, to spynić ich budzie niemahčyma»
Pryhožyn u intervju ŭ adnym z tyłavych łahieraŭ (spasyłku na jaho vykłała pres-słužba vahnieraŭca) paćvierdziŭ infarmacyju ab tym, što sady na paŭdniovym zachadzie Bachmuta zaniali padraździaleńni Uzbrojenych sił Ukrainy. Vinavacić u hetym jon Ministerstva abarony ź jaho taktykaj.
«Kali tam byŭ «Vahnier», to jany, niahledziačy na vysokuju niebiaśpieku, zaryvalisia, stajali i adbivali lubyja sproby kontrnastupu. U Ministerstva abarony inšaja taktyka. Pryncyp taki: kali jość vielmi dobra ŭmacavany rajon, to ŭ im možna znachodzicca. A kali treba prykłaści namahańni, to lepš nie znachodzicca».
Jaŭhien Pryhožyn adznačaje, što na Zaparožskim napramku katastrofa dla rasijskich vojskaŭ. Adstupleńnie rasijskich sałdat na 5-8 kiłamietraŭ, kaža jon, budzie aznačać bieskantrolny zachod ukrainskaj armii na lubuju hłybiniu.
Pa jaho mierkavańni, jak tolki USU trochi zojduć uhłyb terytoryi, to dalej pojduć vyzvalać Biardziansk i Maryupal. «I spynić ich budzie niemahčyma».
«Usie malujuć na kartach i ŭsie viaduć padmany»
Pryhožyn adznačaje: «Taktyka Ministerstva abarony zahannaja. Jany ŭsie malujuć na kartach i ŭsie viaduć padmany. U vyniku kiraŭnictva ŭpeŭnienaje, što ŭsio ŭ paradku. Šarahovy skład razumieje, što ŭsio poŭnaja ž…. A praŭda niedzie pasiaredzinie. U vyniku nichto nie viedaje, dzie chto znachodzicca.
Hałoŭnaja zadača Ministerstva abarony ciapier hulać u pryhožuju historyju u telehram-kanałach i miedyja. U televizary havaryć, što my nastupajem. U isnaści toje, što ciapier adbyvajecca na Arciomaŭsku (tak rasijskaja prapahanda nazyvaje ŭkrainski Bachmut. — NN), praz dva tydni pryviadzie da surjoznych taktyčnych pravałaŭ»,
— vykazvaje svajo bačańnie Pryhožyn.
«Dzie našy kłoŭny?»
Kiraŭnik PVK «Vahnier» ličyć, što situacyju, jakaja skłałasia siońnia, niemahčyma vypravić. Jon zaŭvažaje, što ab prablemach jon staŭ havaryć 19 sakavika 2022 hoda, kali «Vahnier» pačaŭ udzielničać u vajnie.
«Kiravańnie adsutničaje, płanavańnie adsutničaje, padrychtoŭka adsutničaje, uzajemapavaha adsutničaje. I heta ŭsio zamiaščajecca isterykami naviersie. Tam patrabujuć terminova nastupać, adbivać. I nichto na ziamlu nie spuskajecca. Šajhu i načalnik Hienieralnaha štaba ŭžo daŭno pavinny byli być tam, dzie im naležyć».
Pryhožyn kaža, što zaprašaŭ Šajhu ŭ Bachmut, ale toj nie pryjechaŭ.
«Jamu treba było nadzieć broniekamizelku i prapaŭźci pa Arciomaŭsku (Bachmucie. — NN) na puzie. Tamu što Zialenski poŭzaje, Załužny poŭzaje, Syrski poŭzaje. Usie poŭzajuć. Dzie našy kłoŭny? Čamu jany nie iduć? Tamu jany ničoha nie viedajuć. Toj, chto prynosić drennyja naviny, — niahodnik. A tym, chto prynosić dobryja naviny, dajuć zorki Hierojaŭ Rasii. Nam historyja hetych pamyłak nie prabačyć».
«Bachmut — vyratavańnie rasijskaj armii i honaru Rasii»
Na pohlad Pryhožyna, u Rasii vajennaje kiraŭnictva, jakoje prymaje rašeńni, — heta
«ludzi absalutna, tatalna biazdarnyja. U vajennym płanie heta absalutnyja nievuki, jakija akramia taho, što sami nie viedajuć, što rabić, dyk burać toje, što było niekali stvoranaje».
Jon ličyć, što ciapier niešta zrabić hłabalnaje niemahčyma. Treba było pačynać rychtavać armiju hod tamu. Dla hetaha, pa jaho słovach, jany i zrabili «bachmuckuju miasarubku», jakuju jon nazvaŭ «vyratavańniem rasijskaj armii i honaru Rasii». «Bachmut zajmaŭ siły USU, jakija pavinny byli ŭkidvać tudy ŭsie svaje siły», — dadaje Pryhožyn.
Ale ciapier situacyja źmianiłasia.
«Dla taho, kab praciŭnik nie moh skancentravacca, ty pavinien jaho bić. U inšym razie jon budzie bić ciabie. I kali my budziem u tym stanie, u jakim my ciapier znachodzimsia, to pieramoha pakul nie na našym baku»,
— ličyć kiraŭnik «Vahniera».
«Užo nie moža być pomstaj prosta aryšt i pasadka vyšejšaha vajennaha kiraŭnictva. Tamu ja havaru ab vyšejšaj miery pakarańnia»
Na vykarystańnie jadziernaj zbroi, jak ličyć Pryhožyn, Rasija nie rašycca.
«Pieršaje, heta kontrpradukcyjna. Jaje treba było raniej vykarystoŭvać, kali heta było niečakana. Heta nazyvajecca «Jo…ia na ŭsiu hałavu psichapaty». Ale heta taksama pazicyja. A ciapier i heta ŭžo nie pazicyja».
Ciapier, ličyć Pryhožyn, nijakaj mabilizacyi rasijskaje kiraŭnictva pravodzić nie budzie.
«Pakul tyja ludzi, jakija ciapier jość, zajmajucca vajnoju, to nichto ź ich nie budzie ničoha rabić. Ksiuša Šajhu budzie taksama pravodzić uračystyja śniadanki. Šajhu budzie valać durnia i siadzieć [u budynku Minabarony RF] na Frunzienskaj. A načalnik Hienštaba Valeryj Vasilevič Hierasimaŭ kožny ranak budzie vypivać šklanku harełki, bicca ŭ paranoi, harłapanić i viščać, patrabujučy adbić terytoryju.
A heta aznačaje, što zahinie tysiača sałdat. Ich matki, žonki i dzieci pryjduć i zjaduć ich vantroby, kali pryjdzie čas. Ci narodny bunt budzie, ci Dziaržaŭnaja duma prymie rašeńnie ab vyšejšaj miery pakarańnia i rasstralaje ich».
Jak padkreślivaje kiraŭnik «Vahniera», u armii samaje hałoŭnaje — kiravańnie i ŭzajemapavaha.
«Raz niama ŭ armii pavahi, to sałdaty pavinny ŭbačyć, što za ich straty adpomściać i jość spraviadlivaść. Ale ŭžo nie moža być pomstaj prosta aryšt i pasadka vyšejšaha vajennaha kiraŭnictva. Tamu ja havaru ab vyšejšaj miery pakarańnia».
Akramia hetaha, jon padzialiŭsia mierkavańniem, što da rasstrełaŭ u Rasii zastałosia dva-try miesiacy.
Na dumku kiraŭnika «Vahniera», rasijskija vojski ciapier paniasuć značnyja straty i nie zmohuć utrymać častku akupavanaj terytoryi.
«Kali rabili toj ža refierendum, chto-niebudź dumaŭ, što daviadziecca Chierson addać? Kali vy nazvali Rasijaj, to pamrycie. Usie pavinny byli pryjści na liniju sudakranańnia.
Dziaržaŭnaja duma, usie čynoŭniki, uvieś Kreml pavinien byŭ vyjści, kab nie stracić nivodnaha kvadratnaha mietra Rasii. A my ciapier rasijskuju ziamlu razdajom. Navošta tady było jaje rasijskaj pryznavać?» — razdaje zavočnyja aplavuchi Pryhožyn.
«My nie dazvolim dočkam i ziaćkam siadzieć i namazvać sabie dupy vazielinam»
U intervju Pryhožyn, spasyłajučysia na zakliki miascovaha nasielnictva, zajaviŭ ab tym, što «Vahnier» hatovy pryjści ŭ Biełharodskuju vobłaść. Ale hetaha zrabić nie atrymajecca, bo ich buduć błakavać usie, chto moža:
«Kali PVK «Vahnier» pryjdzie ŭ Biełharodskuju vobłaść, to nie atrymajecca ničoha schavać. A ciapier žycharoŭ krainy nachabna padmanvajuć. Im strašna, bo ad Biełharodskaj vobłaści da Rubloŭki zusim blizka».
Pryhožyn taksama zrabiŭ zajavu ab tym, što PVK «Vahniera» chacieli zabłakavać i źniščyć u Bachmucie: «Padpałkoŭniki buchija miniravali darohi i sprabavali stralać pa našych mašynach». Jon adznačaje, što miniravalisia nie tyja terytoryi, jakija mahli spynić praciŭnika. Miniravańnie adbyvałasia ŭzdoŭž daroh, pa jakich adychodzili vahnieraŭcy.
Ciapier PVK «Vahnier», pa słovach Pryhožyna, daje kala dvuch tydniaŭ Ministerstvu abarony dla taho, kab vyzvalić «našu ziamlu». Kali jany hetaha nie zrobiać, to
«my pojdziem u Biełharad i budziem patrabavać, kab Frunzienskaja taksama pierajechała ŭ Biełharad. Kali pamirać, to ŭsim razam. My nie dazvolim dočkam i ziaćkam siadzieć i namazvać sabie dupy vazielinam, a kab u hety čas prostyja babki i dzieci padychali jak sabaki».
Pryhožyn prapanavaŭ Šajhu «viarnucca da svaich histaryčnych vytokaŭ, stać hubiernataram Tuvy ci Maskoŭskaj vobłaści. Mahčyma, zajmacca narodnaj haspadarkaj u jaho budzie lepš atrymlivacca».
Kiraŭnik «Vahniera» ličyć, što ciapier treba adkryta havaryć pra niedachopy.
«Siońnia arhanizm nastolki ciažka chvory, što jamu patrabujecca surjoźniejšaja chirurhičnaja apieracyja. My na siońnia prajhrajom vajnu.
Usio zaležyć ad taho, nakolki mabilizujecca hramadstva. Pałovu hienierałaŭ treba zrabić pałkoŭnikami i adpravić u akopy».
Čytajcie jašče:
Pryhožyn zajaviŭ, što Rasija «abasrałasia», a «ŭkraincy adny z najmacniejšych u śviecie»
Jak skłaŭsia los chłopca ź viadomaha žyćcieśćviardžalnaha fota studenckaha maršu-2020?6
Kamientary