«Luby typ zbroi masavaha paražeńnia nie moža być abarončym»: deputatka Minharsavieta stvaryła pietycyju suprać raźmiaščeńnia jadziernaj zbroi
Stvaralnica inicyjatyvy «Heta naš horad» Volha Ciesakova stvaryła pietycyju z patrabavańniem nie dapuścić zachoŭvańnia i raźmiaščeńnia na terytoryi Biełarusi jadziernaj zbroi. Pietycyju, znojdzienuju ekołahami na sajcie Petitions.by, možna padpisać da 10 červienia.
«25 maja 2023 hoda ministry abarony Biełarusi i Rasii padpisali dakumienty ab utrymańni rasijskaj niestratehičnaj jadziernaj zbroi ŭ Biełarusi. Hetyja dziejańni iduć nasupierak z pazicyjaj Respubliki Biełaruś jak dziaržavy bieź jadziernaj zbroi i palitykaj u śfiery jadziernaha razzbrajeńnia», — havorycca ŭ pietycyi.
Aŭtarka tłumačyć: Biełaruś zajaviła pra namier zrabić terytoryju krainy biaźjadziernaj zonaj jašče ŭ 1990 hodzie. Dla hetaha ŭ 1992 hodzie my dałučylisia da Damovy ab nieraspaŭsiudzie jadziernaj zbroi jak dziaržava, jakaja nie vałodaje jadziernaj zbrojaj. Nastupnyja čatyry hady pajšli na toje, kab vyvieźci z terytoryi našaj krainy ŭsiu najaŭnuju jadziernuju zbroju. Hety praces byŭ zavieršany ŭ 1996 hodzie z vyvazam apošniaj bojehałoŭki.
U dalejšym Biełaruś padtrymlivała šmatlikija prahramy i ŭdzielničała ŭ prajektach, skiravanych na nieraspaŭsiud jadziernaj zbroi: dahavor ab mierach pa dalejšym skaračeńni i abmiežavańni stratehičnych i nastupalnych uzbrajeńniaŭ, dahavor ab likvidacyi rakiet siaredniaj i mienšaj dalokaści, dahavor ab usioabdymnaj zabaronie jadziernych vyprabavańniaŭ.
Z pačatku stanaŭleńnia Biełarusi jak niezaležnaj dziaržavy ŭ našaj Kanstytucyi byŭ zamacavany status biaźjadziernaj dziaržavy, to-bok dziaržavy bieź jadziernaj zbroi. Adnak paśla refierendumu 2022 hoda heta pałažeńnie prybrali.
— Luby typ jadziernaj zbroi, jak zbroi masavaha paražeńnia, nie moža być abarončym, — padkreślivaje Volha. — Heta zbroja raspracoŭvałasia jak nastupalnaja, pryznačanaja dla ŭdaru pa terytoryi ŭmoŭnaha praciŭnika, adnak 18-y artykuł Kanstytucyi vyklučaje vajennuju ahresiju z terytoryi Respubliki Biełaruś u dačynieńni da inšych dziaržaŭ.
Akramia taho, što raźmiaščeńnie rasijskaj jadziernaj zbroi stavić Biełaruś u jašče bolš zaležnaje ad Rasii stanovišča, a taksama daje našu terytoryju jak miesca mahčymaha vajskovaha ŭdaru, za stvareńniem, lubymi pieravozkami i zachoŭvańniem jadziernych technałohij ciahniecca radyjacyjny śled (i heta biez uliku patencyjnaha vykarystańnia zbroi, jak kažuć u ekałahičnaj arhanizacyi Ekadom).
Pietycyja patrabuje vyklučyć vypadki śpiekulacyi pytańniem raźmiaščeńnia jadziernaj zbroi ŭ Respublicy Biełaruś słužbovymi asobami, pryniać pravavyja normy, jakija zachoŭvajuć status Respubliki Biełaruś jak dziaržavy bieź jadziernaj zbroi i nie dapuścić zachoŭvańnia i raźmiaščeńnia na terytoryi Biełarusi jadziernaha ŭzbrajeńnia.
Padpisać jaje možna da 10 červienia.
Amierykanka raskazała, jak vykładała va ŭniviersitecie ŭ Viciebsku i navat dała paru ŭrokaŭ milicyi3
Kamientary