Infarmacyja pra namier šviejcarskaj kampanii «Štadler» pakinuć biełaruski rynak raspaŭsiudziłasia ŭčora paśla taho, jak pra heta zhadaŭ ministr transpartu Litvy ŭ kantekście supracoŭnictva sa «Štadleram» jahonaj dziaržavy. Adnak u samoj kampanii adkryty vakansii.
Biełaruskamu pradstaŭnictvu šviejcarskaj kampanii ZAT «Štadler Minsk» patrabujecca ź dziasiatak supracoŭnikaŭ, pieravažna inžyniernych śpiecyjalnaściaŭ. Heta vynikaje z prahladu resursaŭ, jakija publikujuć abviestki ab vakansijach.
Čytač «Našaj Nivy» patelefanaŭ, kab pasprabavać uładkavacca na zavod, dzie źbirajuć matoravahonny ruchomy sastaŭ. U ofisie pradstaŭnictva paraili dasłać im svajo reziume praz resurs rabota.by. U telefonnaj hutarcy supracoŭnica paraiła jamu «adhukaccca na vakansii, kali jany jość».
Na pytańnie čytača pra adychod kampanii ź Biełarusi supracoŭnica «Štadler Minsk» nie zmahła kankretna adkazać i znoŭ paraiła «adhukacca na vakansii».
«I ŭžo tady budziecie havaryć z kiraŭnikami, jakija vystaŭlali hetyja vakansii, na što jany raźličvajuć i jaki ŭ ich abjom pracy. Što budzie dalej, ja vam nie skažu, bo ja hetaha nie viedaju», — padsumavała jana.
«Supolnaść čyhunačnikaŭ» śćviardžaje, što paśla ŭviadzieńnia šeraha sankcyjnych pakietaŭ adnosna Biełarusi vypusk pradukcyi pradpryjemstva «Štadler» u Fanipali skaraciŭsia z pryčyny admovy ad supracoŭnictva ź im niekatorych krain, kudy raniej pastaŭlalisia vyraby.
U toj ža čas śćviardžeńni ab spynieńni funkcyjanavańnia zavoda ŭ Fanipali i poŭnym zhortvańni vytvorčaści zaŭčasnyja.
Praz kanały «Supolnaści čyhunačnikaŭ» ustanoŭlena, što płanaŭ pa skaračeńni štatu supracoŭnikaŭ i zhortvańni vytvorčaści ŭ ahladnaj pierśpiektyvie ŭ zavoda «Štadler Minsk» u Fanipali niama.
Ciapier na zavodzie nibyta realizujucca prajekty pa vyrabie i pastaŭcy matoravahonnaha ruchomaha sastavu dla Kazachstana i Azierbajdžana, praciahvajecca servisnaje absłuhoŭvańnie abstalavańnia elektraciahnikoŭ, zakuplenych Biełaruskaj čyhunkaj. Takim čynam, možna mierkavać, što zavod pa vytvorčaści elektraciahnikoŭ u Fanipali ŭ najbližejšy čas praciahnie svajo funkcyjanavańnie.
Šviejcarskaja kampanija Stadler Rail (Stadler Bussnang AG) arhanizavała z 2014 hoda ŭ Fanipali Dziaržynskaha rajona łakalizavanuju vytvorčaść matoravahonnaha ruchomaha sastavu pad nazvaj «Štadler Minsk». Heta vytvorčaść pa zborcy matoravahonnaha ruchomaha sastavu na zamovu roznych krain, vahonaŭ mietro, tramvajaŭ, a taksama spalnych vahonaŭ.
Kamientary