Biełaruska prapanuje, jak pavialičyć kolkaść listoŭ palitviaźniam
Alaksandra (imia źmienienaje) raspracavała niekalki sposabaŭ, jakija dapamohuć biełarusam listavacca z palitviaźniami čaściej i nie vyharać. Pra ich jana raskazała «Našaj Nivie».
Pryčyny, pa jakich biełarusy pišuć mała listoŭ, Alaksandra vyznačaje tak: niekatorym strašna rabić heta dla nieznajomych ludziej, nie viedajuć, pra što napisać, adčuvajuć stomlenaść ad listavańnia, zabyvajucca stała heta rabić.
Alaksandra prapanoŭvaje skłaści śpis servisaŭ, jakija dapamohuć skanstrujavać listy i padkažuć temy dla ich.
«Naprykład, kanstruktar listoŭ na sajcie Politzek.me, GPT-čat (ale jon nie pracuje ŭ Biełarusi), dadać spasyłki na sajty ź niepalityčnymi navinami, naprykład, ja karystajusia telehram-kanałam «Balzam», — kaža jana.
Dziaŭčyna prapanuje dasyłać nie listy, a paštoŭki.
«Adpraŭka listoŭ abychodzicca tańniej, ale nie ŭsie mohuć napisać vialiki tekst. Vialikaja biełaja pustaja papiera pałochaje.
Paštoŭka kaštuje daražej, ale na joj našmat mienš źmiaščajecca tekstu. Plus paštoŭki ŭ tym, što na joj jość vyjava.
Taksama varta adpraŭlać razmaloŭki. Byŭ niejak adkaz ad adnaho palitviaźnia, u jakim jon piša: «Dziakujučy maleńkaj razmaloŭcy na vašaj paštoŭcy na imhnieńnie apynuŭsia ŭ kazcy». Ich možna razdrukavać i prylapić na volnaje miesca ŭ paštoŭcy. Takim čynam miesca dla strašnaha tekstu stanie jašče mienš.
Možna vykarystoŭvać nalepki, jany taksama pamianšajuć prastoru dla tekstu, ale niasuć vizualna pazityŭny vobraz», — raskazvaje dziaŭčyna.
Alaksandra ličyć, što varta stvaryć i vykarystoŭvać Telegram-bot dla napaminu pra toje, što nieabchodna adpravić list.
Nastupnaja prapanova — stvaryć śpis adrasoŭ z paštovym skryniami ŭ Biełarusi, pobač ź jakimi niama kamier videanazirańnia.
«U paštovyja skryni kidajuć listy zvyčajnyja ludzi, i ŭ ich moža ŭźniknuć strach na hetym etapie, tamu takoje dziejańnie moža jaho pamienšyć», — tłumačyć jana.
Istotnaja prablema, što supracoŭniki turmaŭ časta nie addajuć listy niekatorym palitviaźniam.
«Varta pavialičyć kolkaść listoŭ, — ličyć Alaksandra. — Ideja hruntujecca na cisku, pad jakim akazvajecca supracoŭnik turmy. Z adnaho boku, jość zahad ad načalstva. Ź inšaha boku, za miesiac idzie tysiača listoŭ, jakija treba vykidvać. Kali listoŭ budzie sapraŭdy tysiačy, mahčyma, supracoŭnik pačnie razumieć, što načalnik adzin, a ŭ palitviaźniaŭ padtrymka vialikaja. Moža, jon i praciahnie vykonvać zahad, ale ŭ jaho moža ŭklučycca krytyčnaje myśleńnie».
Dla pavieličeńnia kolkaści listoŭ nieabchodna minimum 2000 čałaviek pa-za miežami krainy i takaja ž kolkaść u krainie, jakija buduć hetym stała zajmacca, jak ličyć dziaŭčyna.
«Ličbu ŭziała z akruhleńniem ad ahulnaj kolkaści palitviaźniaŭ na siońnia.
Treba arhanizavać pary ludziej: biełarusy za miežami krainy pišuć tekst, u krainie — kuplajuć paštoŭku, pierapisvajuć tekst ad ruki i adpraŭlajuć», — prapanoŭvaje jana.
Heta moža być servis, padobny da postkrosinhu, ale zrobleny na bazie Telegram-bota. Dziaŭčyna ŭdakładniaje, što jaho varta raspracavać tak, kab jon byŭ całkam biaśpiečny dla ludziej u Biełarusi.
«Da prajekta dałučajucca ludzi, robat farmuje pary i kožnamu z bakoŭ dasyłaje imia palitviaźnia, jakomu treba napisać.
Ludzi sami vybirajuć kolki listoŭ, paštovak u miesiac jany hatovyja adpraŭlać. U ideale ad adnoj pary listy pavinny iści raz na tydzień. Tady ad 2000 čałaviek za miesiac pryjduć 8000 paštovak.
Plus kamandnaj pracy ŭ tym, što kožny z udzielnikaŭ budzie viedać, što jaho paštoŭka nie adzinkavaja kropla ŭ vysachłaj łužynie. A kropla ŭ vialikim mory. Heta taksama nadaje siły i matyvacyi.
Kali cenzar ličyć tekst lista nieprymalnym, to treba tady skłaści śpis tem, jakija prachodziać cenzuru (pahladzieć, jakija listy jaje ŭžo prachodzili). Kab zrabić heta jakasna, nieabchodna źviazacca z byłymi palitviaźniami i pravieści ź imi apytańnie», — raskazvaje dziaŭčyna.
Čytajcie taksama:
«Jaje cikaviać litaralna ŭsie padrabiaznaści». Jakija naviny dachodziać ad Maryny Zołatavaj
Stukactva pačynajecca na voli. Pra stukačoŭ u SIZA i kałonii piša Aleh Hruździłovič
Aleksijevič narešcie vykazałasia pra Izrail i Paleścinu48
Kamientary