Dziarždep ZŠA: Prysutnaść PVK «Vahnier» nie pasadziejničaje stabilnaści ŭ Biełarusi
«Rašeńnie zaprasić «Vahnier» u Biełaruś stała jašče adnym znakam, što režym Łukašenki addaje pryjarytet intaresam Pucina pierad intaresami svajho naroda», — miarkuje pres-sakratar viedamstva.
Dziarždepartament ličyć, što prysutnaść PVK «Vahnier» u Biełarusi, jak i ŭ inšych krainach, nie budzie spryjać stabilnaści. Pra heta zajaviŭ u čaćvier na bryfinhu kiraŭnik pres-słužby Dziarždepartamienta Mećju Miler, adkazvajučy na pytańnie pra ŭpłyŭ prysutnaści PVK «Vahnier» u Biełarusi na situacyju ŭ krainie i rehijonie, jak paviedamlaje TASS.
«Jak ja kazaŭ raniej, rašeńnie zaprasić «Vahnier» u Biełaruś stała jašče adnym znakam, što režym Łukašenki addaje pryjarytet intaresu Uładzimira Pucina pierad intaresami svajho naroda. Prysutnaść «Vahniera» nikoli nie spryjała stabilnaści, dzie b jany ni byli», — skazaŭ jon.
«My praciahniem zaklikać krainy nie zaprašać da siabie PVK «Vahnier» i budziem rabić zachady, kab pryciahnuć «Vahnier» da adkaznaści», — dadaŭ Miler.
Pradstaŭnik Dziarždepartamienta pry hetym adznačyŭ, što nie vałodaje infarmacyjaj pra miescaznachodžańnie zasnavalnika «Vahnier» Jaŭhiena Pryhožyna i inšych pradstaŭnikoŭ hetaj hrupy.
Uviečary 23 červienia zasnavalnik PVK «Vahnier» Jaŭhien Pryhožyn vystupiŭ u svaim telehram-kanale sa śćviardžeńniami, byccam pa jaho padraździaleńniach byli naniesienyja ŭdary, i abvinavaciŭ u hetym vajskovaje kiraŭnictva RF. Ranicaj nastupnaha dnia padraździaleńni PVK, jakija padtrymali Pryhožyna, uziali Rastoŭ i skiravalisia ŭ bok Maskvy. Uładzimir Pucin u telezvarocie ranicaj nazvaŭ dziejańni «Vahniera» zdradaj.
Alaksandr Łukašenka pravioŭ z Pryhožynym pieramovy, pa vynikach jakich PVK viečaram u subotu raźviarnuła kałony i viarnułasia ŭ palavyja łahiery. Taksama stała viadoma, što «vahnieraŭcy» mohuć raźmiaścicca ŭ Biełarusi. U sieradu Pryhožyn prylataŭ u Minsk.
«PVK «Vahnier» bolš nie isnuje». Padalak prakamientavaŭ raźmiaščeńnie vahnieraŭcaŭ u Biełarusi
Źbity vahnieraŭcami samalot Ił-22M niehatyŭna paŭpłyvaje na apieracyi armii RF i maralny duch lotčykaŭ — brytanskaja raźviedka
Kreml abviaściŭ uładam Siryi, CAR i Mali, što ŭziaŭ pad svoj kantrol PVK «Vahnier» — miedyja
Ciapier čytajuć
Unučki Łukašenki paśpiachova zamacavalisia ŭ Rasii6
Kamientary