Minabarony raskazała, dla kaho stvarajecca łahier pad Asipovičami
Pamočnik ministra abarony Biełarusi hienierał-major Leanid Kasinski raskazaŭ, što vahnieraŭcy pakul nie prybyvali dla ahladu mahčymaha miesca raźmiaščeńnia bajcoŭ kampanii ŭ namiotavym łahiery ŭ rajonie Asipovičaŭ.
«Nie, apieratyŭnyja hrupy pakul nie pryjazdžali, nie vyznačalisia, nie hladzieli. Ja dumaju, što kali budzie pryniata kančatkovaje rašeńnie hrupaj «Vahnier» raźmiaščacca ci nie raźmiaščacca ŭ Biełarusi, tady i buduć hladzieć», — skazaŭ hienierał-major, kamientujučy paviedamleńni ab nibyta raźmiaščeńni bajcoŭ PVK u łahiery, piša TASS.
Kasinski rastłumačyŭ, što «heta letni łahier, jaki pabudavany va ŭzajemadziejańni z orhanami miascovaj ułady».
«Hety łahier uładkoŭvaŭsia dla treniroŭki jak vajskoŭcaŭ, tak i pradstaŭnikoŭ cyvilnaj administracyi ŭ ramkach razhortvańnia sistemy terytaryjalnaj abarony», — dadaŭ jon.
Taksama Kasinski paviedamiŭ, što łahier zdolny źmiaścić kala piaci tysiač čałaviek, i adznačyŭ, što «tearetyčna [vajskovuju] techniku možna raźmiaścić dzie zaŭhodna».
«Usio zaležyć ad kolkaści hetaj techniki. Heta były vajskovy haradok. Infrastruktura zachavałasia, i boksy [dla zachoŭvańnia techniki] byli, tut artyleryjskaja bryhada kaliści raźmiaščałasia», — skazaŭ pamočnik ministra abarony.
Paśla miaciažu vahnieraŭcaŭ, jaki pačaŭsia ŭviečary 23 červienia, a ŭviečary nastupnaha dnia Pryhožyn sam vyrašyŭ jaho spynić, Pucin prapavanaŭ jamu i najmitam pierajechać u Biełaruś. Pieramovy z Pryhožynym ab «pieramirji» vioŭ tady ŭ tym liku Łukašenka.
U kancy červienia pad Asipovičami pačali adnaŭlać zakinuty vajskovy haradok i stavić tam pałatki. Mierkavałasia, što tudy mohuć pierajechać vahnieraŭcy.
Načalnik milicyi Brahina stralaŭ u svaju žonku. Jana cudam vyžyła9
Kamientary