U Homieli znoŭ ramantujuć hanak abłvykankama. Na jaho papiaredni ramont patracili 400 tysiač dalaraŭ
Ułady abłasnoha centra za apošnija hady pabudavali prybiralniu za miljon dalaraŭ, mačtu dla ściaha za paŭmiljona, adramantavali hanak abłvykankama za $400 tysiač.
Čytačy «Radyjo Svaboda» prysłali videa, na jakim vidać čarhovyja ramontnyja raboty na hanku Homielskaha abłvykankama.
«Hety skandalny hanak ramantavali ŭ 2015 hodzie za vializnyja hrošy. Zrabili tam padahreŭ i padśviečvańnie. Ciapier znoŭ ramont? Za čyje hrošy bankiet?» — zapytaŭsia čytač.
Na sajcie dziaržaŭnych zakupak u mai 2023 hoda byŭ abvieščany tendar na ramont hanka abłvykankama. Z tendara vynikała, što na «demantaž i ramont 142,5 kv. m hranitnaj ablicoŭki» hanka patrebna 105 tysiač rubloŭ (bolš za 35 tysiač dalaraŭ). Na 11 lipienia na sajcie dziaržaŭnych zakupak napisana, što tendar nie adbyŭsia. Ale ramont hanka idzie.
U 2015 hodzie hanak abłvykankama ŭ Homieli ŭžo ramantavali. Tady na heta vydatkavali 400 tysiač dalaraŭ. Pieršapačatkovy košt ramontu ŭkazvali ŭ ekvivalencie miljona dalaraŭ. Heta vyklikała abureńnie ŭ hramadskaści i miedyja. U vyniku ramont kaštavaŭ 400 tysiač.
Za hetyja hrošy «źmienšyli stromkaść schiłaŭ hanka šlacham pabudovy padpornych ścienak», pabudavali sistemu adviadzieńnia daždžavoj vady, zrabili padahreŭ i «łandšaftnaje padśviečvańnie». Padśviacili nie tolki hanak, ale i jalinki kala jaho.
Sam hanak zrabili hranitnym.
Kamientary