Biełarus raskazaŭ, jak uładkavaŭsia na pracu ŭ palicyju Kanady, i nazvaŭ svoj zarobak
Hościem novaha vypusku tok-šou «ČiestnOK-Live» staŭ były načalnik kamandy chakiejnaha kłuba «Dynama» i zbornaj Biełarusi Artur Rekšta, jaki bolš za 10 hadoŭ žyvie ŭ Kanadzie i pracuje ŭ palicyi. Jon raskazaŭ pra svaju rabotu i padzialiŭsia ŭspaminami pra Dźmitryja Baskava i Mikałaja Karpiankova.
Artur Rekšta zhadvaje, što padčas pracy ŭ chakiejnym kłubie «Dynama» pierasiakaŭsia ź Mikałajem Karpiankovym:
«Na toj čas ja byŭ ad jaho ŭ zachapleńni. Byli niejkija pieramovy pa chakiei, jon supravadžaŭ. Zaŭsiody byŭ vielmi dobra apranuty. Dobra siabie padavaŭ — maniery, kamunikacyja na «vy», z pavahaj», — zhadvaje Rekšta i zaŭvažaje, što vielmi ździviŭsia, kali ŭbačyŭ inšaha Karpiankova padčas padziej 2020 hoda:
«Jak byccam ja ŭbačyŭ inšaha čałavieka. … Kali ja raniej ź im niekalki razoŭ pierasiakaŭsia, padałosia, što jon taki dypłamat. Byŭ vielmi pryjemny».
Mužčyna padzialiŭsia taksama ŭspaminami pra Dźmitryja Baskava: «Jon vielmi dobry. Na toj čas, jak jaho viedaŭ, jon byŭ vielmi ŭśmiešlivy, zaŭsiody pazityŭny».
«Kali niejkaja składanaja situacyja, jana i rasstaŭlaje ŭsio pa svaich miescach — pakazvaje, chto jość chto», — zaŭvažaje Rekšta.
Jak patrapić na pracu ŭ palicyju Kanady
Artur Rekšta raskazvaje, što dla taho, kab patrapić na pracu ŭ palicyju Kanady, akramia prachodžańnia raznastajnych testaŭ zdaroŭja i fizičnaj padrychtoŭki, nieabchodna prajści detektar chłuśni. Pierad hetym nieabchodna ščyra adkazać na pytańni vialikaj ankiety — sto staronak.
«Paźniej hetyja pytańni buduć zadavać tabie na detektary chłuśni. Ty raspaviadaješ, ci kraŭ na praciahu žyćcia, kali ty apošni raz užyvaŭ narkotyki, ałkahol, jakija jašče praviły parušaŭ. Tvajo žyćcio pieravaročvajuć navyvarat».
Paśla zapaŭnieńnia ankiety prachodzić razmova pretendenta z aficeram, padčas jakoj udakładniajucca adkazy na pytańni.
«Pierad detektaram chłuśni heta apošni šaniec usio pra siabie raskazać. Kali ty pryjšoŭ na detektar chłuśni i ŭ ankiecie pierad hetym ty paznačyŭ: «Ja ničoha nie kraŭ», — a potym na detektary: «Ja zhadaŭ, kali ja byŭ takim-ta, ja skraŭ toje». Usio, ciabie zarubiać na sto adsotkaŭ. Tamu što ŭžo jość padazreńnie, što ty spužaŭsia na detektary i raskazaŭ praŭdu, a da hetaha ty chacieŭ jaje schavać. Užo pytańnie, možna tabie vieryć ci nie», — raskazvaje Rekšta i zaŭvažaje, što ŭ jaho vypadku prachodžańnie detektara zaniało 10 hadzin.
«Ty siabie adčuvaješ jak byccam ty hoły. Ty raskazaŭ usio pra siabie. (…) Pry hetym nijakaha cisku niama. (…) Jany ŭmiejuć ciabie zahavaryć. Ty čałavieku raskazvaješ usio. Ujavicie, heta jak hołym stajać. Prykładna taki stan, tolki psichałahičny», — dzielicca mužčyna.
Kolki zarablaje kanadski palicejski
Rekšta adznačaje, što nie chavaje pamieru svajho zarobku ŭ palicyi:
«Heta nie źjaŭlajecca sakretam. Usio znachodzicca na sajcie. Pakolki heta hrošy padatkapłacielščykaŭ, my padspravazdačnyja. Ludzi mohuć spakojna hetuju infarmacyju atrymać».
Jak raskazvaje Rekšta, zarobak pačynajecca z 70 tysiač kanadskich dalaraŭ na hod (heta $52 tysiačy na hod, $4300 na miesiac — NN) Ale heta suma da vyliku padatkaŭ i adličeńniaŭ u piensijny fond. Samy vysoki pamier — 120 tysiač na hod ($89 tysiačy na hod, $7400 na miesiac — NN).
«Ciapier u mianie 120 tysiač. Ja radavy pieršaha kłasa z vysłuhaju hadoŭ. (…) Paśla ŭsich adličeńniaŭ ja atrymlivaju kala 6 tysiač kanadskich dalaraŭ na miesiac (kala $4500 — NN)», — havoryć mužčyna i dadaje, što jaho žonka atrymlivaje kala 4 tysiač kanadskich dalaraŭ (kala $3000 — NN).
Vałanciorstva
Akramia pracy ŭ palicyi, Artur pravodzić ź dziećmi zaniatki pa futbole.
«Jak vy dumajecie, u Biełarusi takoje mahčyma — kab čałaviek ź milicyi prychodziŭ u park i hulaŭ z chłopcami ŭ futboł?» — zadaje pytańnie Ivulin.
«Dla mianie heta samaja vialikaja addača dzieciam. (…) Na hetym ja ničoha nie zarablaju. Heta prajekt, jaki zapuściŭ adzin chłopiec. (…) Mahčyma, niejkija hrošy paźniej buduć. Ale ja pra heta ciapier nie dumaju, tamu što ŭ palicyi dobry zarobak, mnie nie treba niedzie padzarablać, kab prakarmić svaju siamju. Ja heta rablu tolki tamu, što mnie heta padabajecca»,
— raskazvaje Rekšta i dadaje, što ŭ Kanadzie ŭvieś dziciačy sport vybudavany na vałanciorstvie:
«Tut trenieram nie płaciać. Tolki kali ty pierachodziš na junijorski ŭzrovień, tam trenieram płaciać. Adpaviedna, i kvalifikacyja ŭ ich inšaja. A tak my ŭsie svaim dzieciam dapamahajem».
Artur raskazvaje, što jaho 10-hadovym synam cikavicca futbolny kłub «Bienfika»: «My byli na kempie hetym letam. Jon dobra hulaje. Tut jon u samaj mocnaj kamandzie ŭ čempijanacie ŭ Kałhary. Pryjechali dva treniery z «Bienfiki» i zaprasili dvuch-troch čałaviek patreniravacca. (…) Jon adzin ź ich».
Kamientary