Dumski kamitet abarony ŭchvaliŭ da druhoha čytańnia zakonaprajekta ab pavyšeńni pryzyŭnoha ŭzrostu papraŭku, zhodna ź jakoj nižniaja miaža pryzyŭnoha ŭzrostu ŭ Rasii nie budzie pavyšacca da 21 hoda, jak raniej abiacała Minabarony Rasii.
«Hałoŭnaja papraŭka, što vierchniaja miaža — heta 30 hadoŭ. Nižniuju miažu pryzyŭnoha ŭzrostu vyrašana pakinuć 18 hadoŭ, bo vielmi šmat chłopcaŭ choča pajści słužyć mienavita ŭ 18 hadoŭ», — zajaviŭ kiraŭnik kamiteta Dziarždumy pa abaronie Andrej Kartapołaŭ, piša Bi-bi-si.
Takim čynam, miežy pryzyŭnoha ŭzrostu ŭ Rasii buduć pašyranyja.
Z prapanovaj paetapna pavialičyć pryzyŭny ŭzrost — brać na terminovuju słužbu ŭ armiju z 21 hoda da 30 hadoŭ, a nie z 18 da 27, jak ciapier, vystupiŭ ministr abarony Rasii Siarhiej Šajhu ŭ śniežni 2022 hoda.
Uniesieny ŭ Dumu zakonaprajekt praduhledžvaŭ, što pieršyja časy pryzyvać buduć pa źmiašanym typie — to-bok ludziej va ŭzroście ad 18 da 30 hadoŭ. Poŭny ž pierachod da novaj sistemy, pry jakoj minimalny pryzyŭny ŭzrost budzie składać 21 hod, a hraničny — 30 hadoŭ, pavinien byŭ zaniać ad adnaho hoda da troch hadoŭ.
U Kramli ŭ cełym takuju ideju tady padtrymali. U pačatku studzienia pres-sakratar Kramla Dźmitryj Piaskoŭ kazaŭ, što Uładzimir Pucin «kanceptualna» padtrymlivaje ideju, ale «detali, afarmleńnie hetaj idei — varta ŭsprymać infarmacyju ad Ministerstva abarony».
U Minabarony i ŭ Dumie tłumačyli pavyšeńnie pryzyŭnoha ŭzrostu nieabchodnaściu palepšyć jakaść pryzyŭnoha kantynhientu — heta davała budučym sałdatam mahčymaść zaviaršyć adukacyju, nabracca stałaści i žyćciovaha dośviedu.
«Ja nie stamlajusia padkreślivać: hetaja naša inicyjatyva nakiravanaja nie na kolkasnaje, a na jakasnaje raźvićcio armii. Kali papraŭki kančatkova nabuduć moc, u šerahi vajskoŭcaŭ buduć prychodzić bolš raźvityja, bolš stałyja ŭ psichałahičnym i fizičnym płanie ludzi, jakija vałodajuć peŭnym žyćciovym dośviedam, navykami i kampietencyjami», — kazaŭ toj ža Kartapołaŭ 14 sakavika 2023 hoda.
U červieni Dziaržduma pryniała zakonaprajekt ab pavyšeńni pryzyŭnoha ŭzrostu ŭ pieršym čytańni. Adnak da druhoha čytańnia pazicyja zakanadaŭcaŭ u adnosinach da nižniaj pryzyŭnoj płancy raptam źmianiłasia. A mahčyma, tak i płanavałasia.
Krytyki nazyvali ideju pierachodnaha pieryjadu vidavočnaj sprobaj rasijskich uładaŭ pavialičyć kolkaść rasijcaŭ, jakich majuć prava pryzvać na vajskovuju słužbu, kab kampiensavać masavy niedachop kadraŭ, vyklikany vialikimi stratami ŭ vajnie va Ukrainie.
«Ja pavinien pazvanić našamu kurataru». Jak zavozili mihrantaŭ u Biełaruś — cikavyja detali ź pierachoplenych telefonnych razmoŭ1
Kamientary