Думскі камітэт абароны ўхваліў да другога чытання законапраекта аб павышэнні прызыўнога ўзросту папраўку, згодна з якой ніжняя мяжа прызыўнога ўзросту ў Расіі не будзе павышацца да 21 года, як раней абяцала Мінабароны Расіі.
«Галоўная папраўка, што верхняя мяжа — гэта 30 гадоў. Ніжнюю мяжу прызыўнога ўзросту вырашана пакінуць 18 гадоў, бо вельмі шмат хлопцаў хоча пайсці служыць менавіта ў 18 гадоў», — заявіў кіраўнік камітэта Дзярждумы па абароне Андрэй Картаполаў, піша Бі-бі-сі.
Такім чынам, межы прызыўнога ўзросту ў Расіі будуць пашыраныя.
З прапановай паэтапна павялічыць прызыўны ўзрост — браць на тэрміновую службу ў армію з 21 года да 30 гадоў, а не з 18 да 27, як цяпер, выступіў міністр абароны Расіі Сяргей Шайгу ў снежні 2022 года.
Унесены ў Думу законапраект прадугледжваў, што першыя часы прызываць будуць па змяшаным тыпе — то-бок людзей ва ўзросце ад 18 да 30 гадоў. Поўны ж пераход да новай сістэмы, пры якой мінімальны прызыўны ўзрост будзе складаць 21 год, а гранічны — 30 гадоў, павінен быў заняць ад аднаго года да трох гадоў.
У Крамлі ў цэлым такую ідэю тады падтрымалі. У пачатку студзеня прэс-сакратар Крамля Дзмітрый Пяскоў казаў, што Уладзімір Пуцін «канцэптуальна» падтрымлівае ідэю, але «дэталі, афармленне гэтай ідэі — варта ўспрымаць інфармацыю ад Міністэрства абароны».
У Мінабароны і ў Думе тлумачылі павышэнне прызыўнога ўзросту неабходнасцю палепшыць якасць прызыўнога кантынгенту — гэта давала будучым салдатам магчымасць завяршыць адукацыю, набрацца сталасці і жыццёвага досведу.
«Я не стамляюся падкрэсліваць: гэтая наша ініцыятыва накіраваная не на колькаснае, а на якаснае развіццё арміі. Калі папраўкі канчаткова набудуць моц, у шэрагі вайскоўцаў будуць прыходзіць больш развітыя, больш сталыя ў псіхалагічным і фізічным плане людзі, якія валодаюць пэўным жыццёвым досведам, навыкамі і кампетэнцыямі», — казаў той жа Картаполаў 14 сакавіка 2023 года.
У чэрвені Дзярждума прыняла законапраект аб павышэнні прызыўнога ўзросту ў першым чытанні. Аднак да другога чытання пазіцыя заканадаўцаў у адносінах да ніжняй прызыўной планцы раптам змянілася. А магчыма, так і планавалася.
Крытыкі называлі ідэю пераходнага перыяду відавочнай спробай расійскіх уладаў павялічыць колькасць расійцаў, якіх маюць права прызваць на вайсковую службу, каб кампенсаваць масавы недахоп кадраў, выкліканы вялікімі стратамі ў вайне ва Украіне.
З Лондана Мельнікава вылецела на Шры-Ланку, у яе быў каханак спартовага выгляду з Беларусі22
Каментары