«Vareńnie z našaha sadu nie budzie stajać da zimy». Biełarusy-emihranty pakazali, jakija im prysyłajuć padarunki z radzimy
Chleb, biarozavy sok, biełaruski šakaład i zhuščonka, škarpetki z nadpisami na biełaruskaj movie — takija padarunki atrymlivajuć vymušanyja emihranty ź Biełarusi. Vydańnie Ex-press.live spytała ŭ čytačoŭ, jakija pieradačy ź Biełarusi ich radujuć.
Biarozavy sok, suški i zhuščonka — takuju pieradačku pryviezła siabroŭka siamji emihrantaŭ ź Minska.
«Z banki ad zhuščonki syn źbirajecca zrabić skarbonku. Vielmi jana jamu padabajecca», — raskazała čytačka Jana.
Chleb vahoj 2 kiłahramy 200 hramaŭ vieźli ź Biełarusi ŭ Varšavu i pieražyvali, ci prapuściać pamiežniki.
«Heta vielmi smačny chleb! Vielmi nahadvaje dziacinstva. Choć ciapier my pryvykli i da polskaj raznastajnaści, tut taksama šmat smačnych rečaŭ», — havoryć Alaksandr.
Prysmaki ź Biełarusi amal zaŭsiody jość u pieradačach, jakija pryvoziać emihrantam.
«My śmiajomsia, kali bačym šakaładku «Prezident» ź Biełarusi. Havorym, chaj choć pa kavałačkach viazuć jaho z našaj krainy», — raskazvaje Iryna.
Šalik vytvorčaści fabryki «Elema» i słoik malinavaha vareńnia — takuju pieradaču atrymała žycharka Tbilisi z Žodzina.
«Mama havoryć: «Nasi šalik na biełaj vopratcy, chaj budzie vidać, što ty biełaruska. Tak i źbirajusia nasić. Tym bolš što čyrvony i bieły — nacyjanalnyja kolery i ŭ Hruzii. A vareńnie z našaha sadu nie budzie stajać da zimy, choć heta kłasnyja leki. My jaho prosta zaraz źjamo», — havoryć Volha.
Ručnik Aršanskaha lnokambinata, šakaładny papkorn i šakaład atrymała 23-hadovaja biełaruska Hanna.
«Ja adkryła pasyłku i padumała: «Vielmi kruta!» — kaža Hanna.
Pšaničnaje ziarniatka ź biełaruskaha pola ŭ Hłybockim rajonie apynułasia ŭ pasyłcy ŭ Polšču.
«Mianie tak kranuła hetaja znachodka… Niešta ŭ joj jość takoje, ščymlivaje, što kliča. Sumuju pa svajoj chacie. Čakaju viartańnia ŭ Biełaruś», — napisała Maryna.
Cełuju kalekcyju škarpetak ź Biełarusi atrymała žycharka Litvy.
«Usich prašu mnie pryvozić škarpetki ź Biełarusi, bolš ničoha. Na hetych škarpetkach vielmi pryšpilnyja, pryjemnyja nadpisy na biełaruskaj movie. I jakaść niadrennaja», — raskazvaje Maryja.
Čytajcie taksama:
U Pinsku prajšoŭ «Parad kalasak». Pieramahła — u vyhladzie BiełAES
«Možna ŭziać aŭtamat i pierasiekčy miažu?» Pavuk spytaŭ u pamiežnikaŭ, ci zakonna rasijskija vojski ŭ 2022 hodzie pierajšli biełaruska-ŭkrainskuju miažu55
Kamientary