Jakija pasłuhi anłajn prapanujuć za hrošy biełaruskija chramy. Možna navat nabyć abaniemient!

Kali vy zapytajecie ŭ huhła «pastavić śviečku anłajn u Minsku», to jon prapanuje vam dastatkova varyjantaŭ. Pieršym vydaje sajt prychoda chrama Śpirydona Trymifunckaha z dobra aptymizavanym pad SEO zahałoŭkam. Varta tolki adzin raz zajści na hety sajt — i tarhietavanaja rekłama chrama budzie pieraśledavać vas usiudy.

Isnuje dźvie opcyi: pastavić śviečku za zdaroŭje abo za spačyn. Na canu śviečki ŭpłyvaje jaje pamier — ad 50 kapiejek za samuju maleńkuju da 2,5 rubla za samuju vialikuju. Kab u patencyjnaha klijenta nie ŭźnikła sumnieńniaŭ u tym, što pasłuha budzie akazanaja jakasna, adrazu ŭdakładniajecca: «Nastajaciel chrama śviatar Alaksandr asabista kantraluje paminańnie pavodle zapisak i toje, jak staviać śviečki».

Jość mahčymaść taksama padać anłajn zapisku za zdaroŭje abo za spačyn. Kaštuje heta 5—6 rubloŭ. Možna aformić i hadavuju padpisku na pasłuhu — 50 rubloŭ.

Na sajcie źbirajuć hrošy na budaŭnictva chrama ŭ honar śviaciciela Śpirydona Trymifunckaha ŭ Minsku, tamu prapanujuć kupić imiannuju cehłu. Cahlina simvaličnaja, i suma nieabchodnaha achviaravańnia nie ŭdakładniajecca. Zatoje prapisany bonus: na kožnym bohasłužeńni molacca za tych, chto maje dačynieńnie da budaŭnictva i ŭpryhožvańnia chrama.

Niamała pasłuh anłajn prapanuje prychod chrama Śviaciciela Mikałaja Cudatvorca. Voś prajs:

— praskamidyja ab zdaroŭi (da 10 imionaŭ) — 5 rubloŭ;

— malebien ab zdaroŭi (da 10 imionaŭ / 15 imionaŭ) — 15 rubloŭ / 25 rubloŭ;

— abiednia ab zdaroŭi z malebnam (da 10 imionaŭ) — 20 rubloŭ;

— padziačny malebien Hospadu našamu Isusu Chrystu — 15 rubloŭ;

— malebien Śviatomu Mikałaju Cudatvorcu — 15 rubloŭ.

Pavialičyć

Niby ŭ zvyčajnaj anłajn-kramie čytaješ padrabiaznaje apisańnie tavaru: «Śviečka vaskovaja — simvał malitvy №20 (čas hareńnia 2 hadziny 30 chvilin)». Košt — 3 rubli. A voś «śviečka vaskovaja — simvał malitvy №40 (čas hareńnia 1 hadzina 30 chvilin)» — 2 rubli.

Kładzieš u košyk adnu śviečku za 2 rubli, a sajt tabie kłapatliva prapanuje dadać da zamovy achviaravańnie na praviadzieńnie ramontnych prac u chramie — 25 rubloŭ, darečy kažučy.

Prapanuje anłajn pasłuhi i Śviata-Jelisaviecinski manastyr, jaki apošnim časam traplaje ŭ naviny za svaju padtrymku rasijskich sałdat u vajnie va Ukrainie. Na jaho sajcie jość navat śpiecyjalny kalkulatar, jaki ličyć košt vašych zamoŭ. 

Abiednia za zdaroŭje — 4 rubli, malebien — 3 rubli. Jość mahčymaść abrać anłajn, pierad jakim mienavita abrazom buduć čytać akafist (košt — 4 rubli). Hadavy abaniemient na sarakavust za zdaroŭje kaštuje 70 rubloŭ. U adnoj zapiscy možna padać da 12 čałaviek. Kožny raz pry dabaŭleńni jašče adnaho imia suma pieraličvajecca aŭtamatyčna.

Pavialičyć

Na sajcie manastyra možna spampavać pravasłaŭnyja paštoŭki. Akramia paštovak, pryśviečanych relihijnym śviatam, jość humarystyčnyja, a taksama sieryja z vykazvańniami duchoŭnika manastyra ajca Andreja Lemiašonka, naprykład: «Dzie Chrystos — tam pieramoha!» Adznačana, što spampavać paštoŭki možna biaspłatna, ale pobač idzie aktyŭnaja hipierspasyłka z prapanovaj zrabić dobraachvotnaje achviaravańnie.

Pavialičyć

Jak i ŭ luboj arhanizacyi, u Śviata-Jelisaviecinskaha manastyra jość vodhuki ŭ huhle. U jaho davoli vysoki rejtynh — 4,8 bała, ale ž i niehatyŭnyja vodhuki siarod 3777 kamientaroŭ taksama jość. My vyrašyli pahladzieć, čym niezadavoleny klijenty.

Naprykład, adzin ź ich aburany pracaj hatela pry klaštary: jon pryjechaŭ zasialicca ŭ 00:05, a achoŭnik admoviŭsia jaho puskać. Mužčyna ličyć, što tak kidać čałavieka ŭ čužym horadzie nie pa-chryścijansku.

Inšy mužčyna niezadavoleny tym, što zanadta šmat miesca adviedziena pad handal: «Z adnaho boku, pryhažość, spakoj, abrazy… A z druhoha — handal-handal-handal… Isus by pakaraŭ hetych handlaroŭ i kramnikaŭ».

Niejkaja žančyna pastaviła adnu zorku za toje, što ŭ manastyry, pavodle jaje słoŭ, u post handlavali piražkami ź miasam: «Jość inšyja cudoŭnyja sapraŭdnyja manastyry, pra jakija amal nichto nie viedaje. Naprykład, manastyr u Damašanach, dzie možna padać biaspłatnyja zapiski na malitvu… I dzie nie handlujuć miasam u pasty…»

Inšaja niezadavolenaja tym, kolki kaštujuć pasłuhi: «Čamu tut tak doraha zapiski padavać i śviečki darahija? Dy i sami ludzi nie zusim dobrazyčlivyja. Heta ž miesca, kudy ludzi prychodziać atrymać Božuju łasku, kali ŭ dušy ci na sercy kamień, a tut panukvańnie dy šypieńnie».

Nakont cen zhodnyja i niekatoryja inšyja kamientatary: «Ceny daražejšyja za rynkavyja ŭ dva razy na svaju pradukcyju. Jak tak? Ni padatkaŭ, ni čekaŭ — i takija ceny, dy navat zvyčajnyja fistaški rasijskija 50 rub. za 1 kh!»

• 0
• 4
• 1
• 2
• 5