Kat ci achviara ŭnutranych razborak? Supracoŭnika navapołackaj kałonii adpravili za kraty za pieravyšeńnie paŭnamoctvaŭ

33-hadovy Ihar Piatroŭ maje zvyčajnuju bijahrafiju pravincyjnaha milicyjanta. Jon rodam z Połacka, ale apošnim časam žyŭ u susiednim Navapołacku. Vučyŭsia ŭ Połackim dziaržaŭnym univiersitecie. U 2014-m, paśla zakančeńnia ŭniviersiteta, Piatroŭ pastupiŭ ŭ milicyju i da śniežnia 2014-ha davučvaŭsia na aficera.

Paśla hetaha jamu prysvoili zvańnie lejtenanta i pryznačyli načalnikam atrada ŭ navapołacki lačebna-pracoŭny prafiłaktoryj №8.

U 2016-m jon dasłužyŭsia da staršaha lejtenanta. A praz hod jaho pieraviali ŭ papraŭčuju kałoniju №1 u Navapołacku na pasadu načalnika atrada. 

Na miažy 2022-ha i 2023-ha Piatrova aryštavali. Jaho abvinavacili ŭ pieravyšeńni paŭnamoctvaŭ — jon pabiŭ viaźnia.

Spravu na nahladčyka zaviali pa č.3 art. 426 — «učynieńnie słužbovaj asobaj dziejańniaŭ, jakija vidavočna vychodziać za miežy pravoŭ i paŭnamoctvaŭ, nadadzienych joj pa słužbie, spałučanaje z hvałtam, katavańniami paciarpiełaha abo prymianieńniem zbroi abo śpiecyjalnych srodkaŭ». 

Nakolki viadoma «Našaj Nivie», u červieni Ušacki sud daŭ Piatrovu šeść hadoŭ kałonii. U toj ža čas pa infarmacyi inicyjatyvy Dissidentby, jakaja dapamahaje palitviaźniam, prysud byŭ 4 hady kałonii i 13 tysiačaŭ rubloŭ štrafa. A sam Piatroŭ ciapier siadzić u kałonii «Vićba».

Ale, zdajecca, nie ŭsio tak prosta. Za ździeki z Vitolda Ašurka, paśla jakich jon pamior, nikoha nie asudzili i nie pakarali. Ničoha nie adbyłosia i paśla śmierci inšych palitviaźniaŭ — Mikałaja Klimoviča i Alesia Puškina. 

«Pryvozili ŭ kałoniju. Užo ŭ kajdankach»

«Ja ździviŭsia, kali daviedaŭsia, što Piatrova aryštavali. Toje, u čym jaho abvinavacili, adbyvajecca ŭ kałonii pastajanna, — dzielicca były viazień kałonii №1. — Čałavieka staviać na raściažku i bjuć pa nahach, kab ich raściahnuć u roznyja baki. 

Piatroŭ zrabiŭ toje samaje, i ŭ źniavolenaha zdaryŭsia razryŭ suchažylla, tak kazali. Adbyłosia toje ŭ stałoŭcy z pažyłym mužčynam. Paśla viaźnia zabrali ŭ turemnuju lakarniu. Źniavoleny nieŭzabavie vyjšaŭ pa skančeńni terminu, svajaki napisali zajavu, i Piatrova adchilili ad pracy, a paśla aryštavali. Pryvozili ŭ kałoniju ŭžo ŭ kajdankach na śledčyja dziejańni.

Niezadoŭha da hetaha ŭ PK-1 byŭ «razbor palotaŭ», maŭlaŭ, chto jość chto, i supracoŭnikaŭ navat vadzili na palihraf. Tam takaja atmaśfiera, što nie tolki zeki danosiać, ale i supracoŭniki pastajanna stukajuć», — kaža były viazień.

Pavialičyć

Paśla taho, jak aryštavali Piatrova, zvolnili i jašče ludziej. Kažuć, što niekatorych za palityku, chto niejak vykazvaŭsia ci staviŭ podpisy za alternatyŭnych kandydataŭ».

«Byvałyja kazali, što dobry mužyk»

Były viazień apisvaje charaktar Piatrova:

«Z adnaho boku, jon byŭ vysakamierny sa źniavolenymi. Usie, chto siadzieŭ u PK-1, viedajuć, što ŭ jaho byŭ zababon pra čyściniu haleńnia. Moh napisać rapart, navat kali čałaviek čysta i hładka vyhaleny, ale niešta jamu nie spadabajecca. I kali čakali Piatrova z pravierkaj, to ŭsie viedali, što treba ledź nie skuru saškrebści. Moh vyklikać čałavieka z šerahu i palcam navat pravieści. Asabliva ad hetaha pakutavali ludzi, u jakich čorny vołas.

Ale jość i inšy bok. Naprykład, kali ja tolki pryjechaŭ u kałoniju, jašče ŭ «karancinie», to niašmat viedaŭ pra toje, jak tam što pracuje. Načalnik kałonii, Palčyk, adrazu pastaviŭ mianie «na ŭnitazy» — heta haniebny abaviazak, jaki aŭtamatyčna pieravodzić u nizkuju kastu. Dyk voś, kali Piatroŭ mianie vioŭ na pracu, adrazu skazaŭ mnie, što ja «papaŭ», daŭ asadku i listok: «Pišy admovu». Navat nie pytaŭsia, ci viedaju ja, ci nie, da čaho heta pryviadzie.

Ź Piatrovym možna było damovicca, šmat u jakich vypadkach jon staviŭsia pa-ludsku. Da prykładu, idzieš u łaźniu pamycca, a jana raz na tydzień, i baišsia, što nie paśpieješ na adznaku pa prafiłaktyčnym uliku. Padychodziš da Piatrova, tłumačyš situacyju, i jon kaža, što ničoha strašnaha.

Z admietnaha — Piatroŭ adnosna łajalna staviŭsia da palitviaźniaŭ. Jon im nie rabiŭ podłaściaŭ. Pry mnie navat davaŭ adnamu z palityčnych dobruju charaktarystyku. Chadzili čutki, što jon navat sprabavaŭ niekatorych ź ich adstajać, kali ich źbiralisia «zakryvać» u ŠIZA.

Lubiŭ vyklikać ludziej na hutarki. Jon raspytvaŭ, čamu mianie pasadzili. U asabistych razmovach nie vykazvaŭ svaich palityčnych pohladaŭ, choć na publiku zaŭždy malavaŭsia «patryjotam» i chvaliŭ Łukašenku. Vyklikaŭ jon na takija hutarki i palityčnych, u tym liku, kazali, Viktaru Babaryku — top-viaźnia kałonii.

Byvałyja źniavolenyja tady kazali, što, maŭlaŭ, niavažna, što jon čaplajecca da haleńnia, zatoje «Piatroŭ narmalny mužyk».

Źbieh abstavin ci pomsta?

Były viazień kaža, što źbićciom viaźniaŭ u kałonii zajmalisia «kantralory» — tak nazyvajuć achoŭnikaŭ. Aficery, nakštałt Piatrova, zvyčajna ŭ takim nie ŭdzielničali. Sadystam jon nazyvaje byłoha načalnika kałonii Andreja Palčyka.

«Jon davaŭ zahady na źbićcio i sam biŭ ludziej. I pałkami, i nahami, i rukami. Na jaho kudy tolki nie pisali skarhaŭ tyja, chto vyjšaŭ, i ničoha. Ale faktyčna jaho ŭ vyniku adpravili na panižeńnie načalnikam kałonii-pasialeńnia, choć jamu praročyli pasadu va ŭpraŭleńni Departamienta vykanańnia pakarańniaŭ MUS».

Pavialičyć

Były palitviazień miarkuje, što kali b źbity Piatrovym viazień nie vyjšaŭ nieŭzabavie na volu, kryminalnaj spravy za źbićcio nie zaviali b.

«Kala stałovaj PK-1 jość try paštovyja skryni — adna ź listami načalniku kałonii, adna ź listami zvyčajnymi, na volu, i treciaja — prakuroru. Dyk voś ja nie pamiataju vypadkaŭ, kab uvohule z hetaj «prakurorskaj» skrynki niešta vychodziła na volu, listy vykidajuć, a tym, chto skardzicca, stvarajuć prablemy».

Ale mužčyna nie vyklučaje, što Piatrovu mahli za niešta adpomścić — nie za toje, za što farmalna asudzili. Bo supracoŭnikaŭ, jakija abychodzilisia z asudžanymi jašče bolš žorstka, nie karali.

• 12
• 0
• 6
• 7
• 9
• 7
• 25
• 0