Źmieny ŭ vybarčaje zakanadaŭstva pryniaty parłamientam u druhim čytańni

Deputaty Pałaty pradstaŭnikoŭ pryniali ŭ druhim čytańni źmieny i dapaŭnieńni ŭ vybarčaje zakanadaŭstva.

Zakonaprajekt źmianiaje paradak farmiravańnia vybarčych kamisij.

Zamacavana ŭklučeńnie ŭ ich skład adnoj treci pradstaŭnikoŭ palityčnych partyj i hramadskich abjadnańniaŭ. Vykankamy nie majuć prava ŭklučać svaich pradstaŭnikoŭ u vybarčyja kamisii, a dziaržaŭnyja čynoŭniki mohuć zajmać nie bolš za adnu treć ich składu.

Subjekty, jakija vyłučyli svaich pradstaŭnikoŭ u vybarčyja kamisii, nadzialajucca pravam prysutničać na pasiadžeńniach miascovych vykanaŭčych kamitetaŭ i pradstaŭničych orhanaŭ pry vyrašeńni imi pytańniaŭ stvareńnia vybarkamaŭ. Rašeńni takich pasiadžeńniaŭ možna asprečyć u sudzie.

Spraščajecca paradak vyłučeńnia kandydataŭ, u tym liku ad palityčnych partyj.

Tak, palityčnaja partyja moža vyłučyć kandydata pa luboj vybarčaj akruzie, niezaležna ad isnavańnia na jaho terytoryi partyjnych struktur.

Z zakanadaŭstva vyklučana norma, jakaja pradpisvaje zaśviedčańnie podpisaŭ, sabranych členami inicyjatyŭnych hrup, u vykankamie.

Źmienšana kolkaść padstaŭ dla pryznańnia podpisaŭ niesapraŭdnymi.

Spraščajecca paradak praviadzieńnia pieradvybarnych sustreč z vybarščykami ŭ vyhladzie masavych zboraŭ, pikietaŭ. Kandydaty majuć prava pravodzić masavyja mierapryjemstvy pa pieradvybarnaj ahitacyi ŭ paviedamlalnym paradku ŭ śpiecyjalna adviedzienych dla hetaha miescach, a taksama mahčymaść ažyćciaŭlać sumiesnuju ahitacyju.

Pry daterminovym hałasavańni pa vynikach kožnaha dnia hałasavańnia budzie składacca pratakoł ab kolkaści hramadzian, jakija atrymali vybarčyja biuleteni.

Padčas praviadzieńnia miascovych vybaraŭ vyklučajecca paroh jaŭki vybarščykaŭ,

nieabchodny dla pryznańnia taho, što vybary ŭ miascovyja saviety adbylisia.

Padčas praviadzieńnia parłamienckich i prezidenckich vybaraŭ praduhledžana stvareńnie indyvidualnych finansavych fondaŭ. Dla kandydataŭ u deputaty Pałaty pradstaŭnikoŭ ich maksimalny pamier składaje tysiaču bazavych vieličyń, dla kandydata ŭ prezidenty — try tysiačy bazavych vieličyń.

Zakonaprajekt praduhledžvaje ŭklučeńnie ŭ Vybarčy kodeks pałažeńniaŭ dekretaŭ prezidenta ab členach CVK z pravam daradčaha hołasu i ab dekłaravańni dachodaŭ i majomaści kandydataŭ u prezidenty Biełarusi i ich blizkich svajakoŭ.

Nieabchodna adznačyć, što ŭniasieńnie papravak u vybarčaje zakanadaŭstva — adna z najvažniejšych umoŭ narmalizacyi adnosin pamiž Biełaruśsiu i ES.

Biuro pa demakratyčnych instytutach i pravach čałavieka (BDIPČ) ABSIE raspracavała rekamiendacyi da hetaha zakonaprajekta, adnak tak i nie zmahło aznajomicca z kančatkovym varyjantam zakona.

Jak paviedamiŭ pres‑sakratar BDIPČ ABSIE Jiens Ešenbiechier, biełaruski bok nie daŭ biuro mahčymaści aznajomicca z papraŭkami ŭ Vybarčy kodeks, niahledziačy na dasiahnutuju ŭ lutym damoŭlenaść. Pavodle jaho słoŭ, BDIPČ hatova dać acenku zakonaprajektu pry ŭmovie, što na heta budzie vydzielena dastatkova času i parłamient Biełarusi ŭličyć zaklučeńnie BDIPČ ABSIE.

«BDIPČ ABSIE vystupaje za šyroki i padrabiazny dyjałoh u Biełarusi pa reformie vybarčaha zakanadaŭstva, u jakim uziali b udzieł samyja roznyja ŭdzielniki vybarčaha pracesu, kab była stvorana atmaśfiera davieru i nieabchodnyja źmieny byli ŭzhodnieny», — padkreśliŭ Ešenbiechier.

Pavodle mierkavańnia pradstaŭnikoŭ biełaruskaj apazicyi, pryniatyja papraŭki nie harantujuć značnaha palapšeńnia ŭmoŭ udziełu demsił u vybarach.

«Šansy na pieramohu vyznačajucca nie tolki siłaj samoha palityčnaha subjekta, ale i praktykaj prymianieńnia prava. Z adnaho boku, spraščajecca praces vyłučeńnia kandydataŭ, uładam budzie ciažej admianić rehistracyju kandydata ŭ deputaty. Ź inšaha — pałažeńni ab pracesie padliku hałasoŭ i nazirańni za vybarami praktyčna nie źmianilisia», — adznačyŭ ekśpiert pa vybarčym zakanadaŭstvie Siarhiej Alfier.

Pavodle jaho mierkavańnia, «ułady buduć mieć tyja ž mahčymaści dla vykarystańnia administracyjnaha resursu, manipuliravańnia vynikami vybaraŭ, što i padčas papiarednich vybarčych kampanij».

• 0
• 0
• 0
• 0
• 0
• 0
• 0
• 0