Raniej za budynak piersijarni pamyłkova prymali zusim inšy budynak, jaki raźmiaščaŭsia niedaloka. Ale vyhlad sapraŭdnaha budynka zachavaŭsia dziakujučy płanam rasijskich uładaŭ pierabudavać jaho na kazarmu.
Daśledčykam udałosia adšukać vyjavu Słuckaj piersijarni 1797 hoda pry padrychtoŭcy fundamientalnaj manahrafii pra stvaralnikaŭ manufaktury «Madžarskija: armianski rod u historyi Biełarusi».
Pamyłka pajšła ad knihi «Našy kaścioły. Minskaja archidyjacezija», apublikavanaj u 1913 hodzie ksiandzom i historykam Juzafatam Žyskaram, dzie było źmieščana fota dvuchpaviarchovaha muravanaha budynku ŭ Słucku, padpisanaha jak «byłaja fabryka litych pajasoŭ».
Ale, jak davodziać daśledčyki, u słuckich piersijaraŭ nikoli nie było muravanych budynkaŭ. Ksiondz Žyskar, vidavočna, nie źbiraŭsia ŭvodzić u zman čytačoŭ, a prosta zafiksavaŭ haradskuju lehiendu, jakaja bytavała ŭ Słucku na miažy XIX i XX stahodździaŭ. Muravany dvuchpaviarchovy budynak sapraŭdy znachodziŭsia pobač ź miescam kolišniaj piersijarni, ale byŭ budynkam biblijateki byłoha jezuickaha kalehiuma. U kalehiumie ŭ kancy 1760-ch z usioj vierahodnaściu vučyŭsia Lavon Madžarski, syn zasnavalnika słuckaj manufaktury i jaje budučy kiraŭnik.
Jak viadoma, fabryka z 1760-ch hadoŭ raźmiaščałasia ŭ byłych kazarmach hrand-muškiecioraŭ, dvuch charakternych vyciahnutych budynkach, adlustravanych na mnohich płanach horada. Paśla śmierci Karala Stanisłava Radziviła ŭ 1790 hodzie i pierachodu Słucka pad uładu Rasijskaj impieryi ŭ 1793 piersijarnia pačała zaniepadać.
U kancy 1790-ch hadoŭ źjaviŭsia prajekt pieraabstalavańnia častki budynkaŭ pad kazarmy Nizoŭskaha piachotnaha pałka rasijskaj impieratarskaj armii. Prajekt pieraabstalavańnia («Kvartał, hdie nynie naznačajetsia vystroiť kazarmy dla odnoho bataliona Nizovskaho połku, i hdie sostojat vietchije kniazia Radiviła šiołkovyje fabriki»), składzieny ŭ 1797 hodzie minskim hubiernskim architektaram Fiodaram Kramieram, tak i nie byŭ realizavany na praktycy, ale dziakujučy jamu zachavaŭsia vyhlad budynka, važnaha dla biełaruskaj historyi.
Siońnia na terytoryi byłoj piersijarni i jezuickaha kalehiuma nie zastałosia nivodnaha histaryčnaha budynka — na ich miescy za savieckim časam pabudavanaja mini-CEC № 2.
«Naša Niva» — bastyjon biełaruščyny
PADTRYMAĆ«Dobry lesarub, ale sa źviazanymi rukami». Dypłamaty padsumoŭvajuć vyniki pracy zvolnienaha ministra Alejnika2
Kamientary