«Jany zusim nie asacyjalnyja». U katoŭ naličyli pad 300 «vyrazaŭ tvaru»
Dla paraŭnańnia: u ludziej 44 unikalnyja mimičnyja ruchi, a ŭ sabak — 27.
U adroźnieńnie ad sabak, katy časta kamunikujuć mimikaj miž saboj.
U daśledavańni, apublikavanym u hetym miesiacy ŭ časopisie Behavioural Processes, navukoŭcy padličyli 276 roznych vyrazaŭ tvaru (pysy), jakija vykarystoŭvajucca dla pieradačy varožych i družalubnych namieraŭ. Bolš za toje, jak vyjaviła kamanda daśledčykaŭ, imavierna, hetyja «hrymasy» źjavilisia praź ciesnyja znosiny ź ludźmi, piša Techinsider.
«Mnohija ludzi pa-raniejšamu pamyłkova ličać katoŭ u značnaj stupieni asacyjalnym vidam, — kaža Denieł Miłs, vieterynarny bichievijaryst ź Linkalnskaha ŭniviersiteta. — Vyrazy ich pys, apisanyja ŭ novym daśledavańni, śviedčać pra advarotnaje».
Katy i kotki mohuć być samotnymi istotami, ale jany časta zavodziać siabroŭstva ź inšymi žyviołami ŭ svaich damach abo na vulicy. Dzikija katy mohuć žyć šmattysiačnymi kałonijami, časam zachoplivajučy cełyja vyspy.
Łaren Skot, studentka miedycynskaha fakulteta Kanzaskaha ŭniviersiteta, doŭha zadavałasia pytańniem, jak katy kamunikujuć miž saboj. Kab žyć u miry, patrebna tonkaja dypłamatyja!
U 2021 hodzie Skot vučyłasia za niekalki chvilin ad kotakafe CatCafé Lounge. Mienavita ŭ hetym miescy dziaŭčynie pryjšło ŭ hałavu vyvučyć mimiku žyvioł, jakija žyli vialikaj hrupaj na abmiežavanaj terytoryi.
Sa žniŭnia pa červień jana zapisała 194 chviliny videa vyrazaŭ pys katoŭ i kotak. Paśla hetaha Skot i psichołah Brytani Fłarkievič praanalizavali ŭsie ruchi ciahlic pysy, vyklučyŭšy lubyja, źviazanyja z dychańniem, žavańniem, paziachańniem i h.d.
Para vyjaviła ahułam 276 roznych vyrazaŭ, źviernutych da inšych katoŭ (u šympanze hety pakazčyk roŭny 357). Kožnaja «hrymasa» spałučała ŭ sabie prykładna čatyry z 26 unikalnych mimičnych ruchaŭ, uklučajučy pryadkrytyja vusny, advisłuju skivicu, pašyranyja abo zvužanyja zrenki, mirhańnie i paŭprykrytyja vočy, adciahnutyja kutki vusnaŭ, ablizvańnie nosa, roznaje stanovišča vušej i h.d.
Dla paraŭnańnia: u ludziej 44 unikalnyja mimičnyja ruchi, a ŭ sabak — 27.
U daśledavańni kamanda taksama vyjaviła, što pieravažnaja bolšaść vyrazaŭ pys katoŭ była albo vyrazna pryjaznaj (45%), albo vyrazna ahresiŭnaj (37%). Astatnija 18% byli nastolki dvuchsensoŭnymi, što traplali ŭ abiedźvie katehoryi.
Na žal, ale što mienavita katy i kotki «kazali» adno adnamu hetymi vyrazami tvaru, zastajecca niezrazumiełym.
Kamientary