Ilustracyjnaje fota: Naša Niva
Daśledčyki z University of California San Francisco ŭ San-Francyska praviali ekśpierymient, metaj jakoha byŭ kančatkovy adkaz na adno z samych važnych pytańniaŭ ab našaj fizijałohii: što nasamreč prymušaje nas spynicca jeści?
Daŭno viadoma, što stvoł mozha (jahonaja nižniaja častka, jakaja kantraluje mnohija padśviadomyja funkcyi cieła) siarod inšaha taksama dapamahaje kiravać pačućciom sytaści. Sučasnaja teoryja zaklučajecca ŭ tym, što niejrony ŭ stvale mozha reahujuć na sihnały sa straŭnika i kišačnika, kali my jadzim ježu. Hetyja sihnały potym vyklikajuć adčuvańnie, što nam užo dastatkova.
Adnak navukoŭcy zmahli vyvučyć hety praces dahetul tolki ŭskosna, pieradaje Gizmodo słovy viadučaha aŭtara novaha daśledavańnia prafiesara fizijałohii Zachary Najta. Jaho kamanda zmahła naŭprost vyjavić źviazanyja z adčuvańniem nasyčanaści niejrony ŭ stvale hałaŭnoha mozha myšej, kali jany žavali.
Sa ździŭleńniem daśledčyki vyjavili, što mnohija ź niejronaŭ reahujuć na roznyja sihnały i kantralujuć pajadańnie nie tak, jak da hetaha šyroka mierkavałasia. Kamanda zasiarodziłasia na dvuch typach niejronaŭ u stvale mozha, jakija, jak miarkujecca, rehulujuć adčuvańnie sytaści: PRLH i GCG.
Kali navukoŭcy karmili myšej tolki praz straŭnik, jany vyjavili, što niejrony PRLH aktyvujucca kišačnikam, jak i čakałasia ŭ papiarednich zdahadkach. Ale kali myšy jeli zvyčajna, hetyja kišačnyja sihnały źnikli; zamiest hetaha niejrony PRLH byli amal imhnienna aktyvavanyja sihnałami z rota, u asnoŭnym z častak, adkaznych za ŭsprymańnie smaku. Praź niekalki chvilin niejrony GCG aktyvavalisia kišačnymi sihnałami.
Vysnovy kamandy, apublikavanyja ŭ časopisie Nature, pakazvajuć, što ŭ stvale mozha isnujuć dva paralelnyja šlachi nasyčeńnia, jakija pracujuć z roznaj chutkaściu i z krychu roznymi metami.
Pieršy šlach, jaki kantraluje, nakolki chutka vy jaście i ŭklučaje niejrony PRLH, niečakana aktyvujecca smakam ježy. Heta dziŭna, bo ŭsim viadoma, što smačnaja ježa prymušaje nas jeści bolš. Ale vysnovy daśledčykaŭ pakazvajuć, što smak ježy taksama abmiažoŭvaje temp pahłynańnia — heta adbyvajecca praz stvoł mozha, i funkcyjanuje, vierahodna, nižej za ŭzrovień našaj śviadomaści. Druhi ž šlach, jaki kirujecca kišačnikam i niejronami GCG, pa ŭsioj vierahodnaści kantraluje, kolki my źjamo ŭ kančatkovym vyniku.
Myšy, viadoma, nie ludzi. Takim čynam, spatrebiacca dadatkovyja daśledavańni, kab paćvierdzić, ci jość u nas padobnaja sistema. Ale kali vykazać zdahadku, što naš mozh pracuje padobnym čynam, praca kamandy moža mieć niekatoryja važnyja nastupstvy.
U apošnija hady było zaćvierdžana niekalki novych preparataŭ (naprykład, antydyjabietyčny preparat siemahłutyd, jaki pradajecca pad handlovymi markami Ozempic, Rybelsus i Wegovy), jakija byccam značna bolš efiektyŭnyja dla straty vahi, čym raniejšyja mietady lačeńnia.
Niahledziačy na toje, što novyja leki sapraŭdy vyklikajuć adpaviednyja fizijałahičnyja źmieny, takija jak zapavoleńnie stravavańnia, taksama ličycca, što jany ŭpłyvajuć na pačućcio sytaści praz mozh. Novy mietad vizualizacyi, jaki dastasavali navukoŭcy padčas apošniaha daśledavańnia, pavinien dazvolić lepš vyvučyć, jak hetyja leki dziejničajuć zblizku.
Vysnovy, atrymanyja z hetaha daśledavańnia, taksama mohuć pryvieści da stvareńnia novych lekaŭ ad atłuścieńnia, kažuć navukoŭcy. Pakolki niejrony PRLH, zdajecca, zdolnyja pieraklučać toje, jak jany reahujuć na sihnały, źviazanyja ź ježaj, to tearetyčna možna było b vyklikać hetaje pieraklučeńnie samastojna i, takim čynam, vykarystoŭvać hetuju stratehiju dla źnižeńnia apietytu.
Čytajcie taksama:
Čałaviectva staić na parozie pieramohi nad atłuścieńniem. I maje navatarski srodak ad dyjabietu
Samota horšaja za atłuścieńnie
Navukoŭcy nie mohuć pryjści da zhody adnosna taho, što vyklikaje atłuścieńnie
