Majka z «Tytanikam» i bałonievyja kaściumy. Jak biełarusy apranalisia ŭ 90-ja
Mnohija z hetych rečaŭ užo źnikli z harderobaŭ, ale tady byli viaršyniaj stylu.
Dzievianostyja ŭ Biełarusi byli ŭnikalnym časam: pakrysie zaradžałasia pradprymalnictva i ŭ krainu chłynuli patoki «čaŭnakoŭ» — u ich klatčastych torbach da nas pryjazdžali pieršyja zamiežnyja rečy. Dziela abnovak biełarusy adpraŭlalisia na rynki i byli hatovyja ŭ luboje nadvorje prymiarać adzieńnie, stojačy na kardoncy. Zrešty, da jaho išoŭ bonus: pradaŭcy adsypali pakupnikam kuču kamplimientaŭ i ŭsialali ŭpeŭnienaść, što tyja vyhladajuć na ŭsie sto.
Voś što možna było sustreć u harderobach modnikaŭ 90-ch
Džynsy Mawin. Na postsavieckaj prastory sapraŭdnuju nazvu marki pierarabili na svoj ład — ich nazyvali «malvinami». Marka była adnosna dastupnaj alternatyvaj takim brendam, jak Levi's i Montana. Tyja, dla kaho i «malviny» byli raskošaj, rabili praściej — nabyvali džynsy u «sekandzie» i pryšyvali na ich firmovy jarłyčok.
Šyrokija plečy. Paśla padzieńnia žaleznaj zasłony płady seksualnaj revalucyi, raspačataj na Zachadzie jašče ŭ 80-ja, dakacilisia i da Biełarusi. Tak, u žanočym harderobie źjaviłasia adzieńnie z hrateskavymi plačyma. Rečy, azdoblenyja parałonavymi padplečnikami, kazali pra žanočuju siłu i samastojnaść. Ale trend na maskulinnaść pratrymaŭsia niadoŭha i ŭžo da kanca dziesiacihodździa syšoŭ na ništo.
Spartyŭnyja kaściumy z bałonievaj tkaniny. U pačatku 90-ch takija nasili i mužčyny, i žančyny. Ščaśliŭčyki, u jakich atrymlivałasia zajmieć zapavietny harnitur, nie źviartali ŭvahi na pamier: kali rečy byli zanadta vialikija, ich karacili abo padvaročvali. Čaściej za ŭsio spartovaja dvojka była jarkich koleraŭ z adnym abaviazkovym elemientam — kantrastnaj ustaŭkaj u formie trykutnika na viatroŭcy. U kancy dziesiacihodździa bałonievyja kaściumy źmianilisia sintetyčnymi «adydasami» i šmatlikimi padrobkami pad ich.
Majki z «Tytanikam» — trend, jaki źjaviŭsia ŭ kancy minułaha stahodździa. U 1997 hodzie, kali na ekrany vyjšaŭ oskaranosny film pra hibiel łajniera, usio litaralna «zachvareli» na tytanikamaniju. Asablivaj papularnaściu karystalisia majki z hałoŭnymi hierojami — Džekam i Rozaj. Chutka moda na ich syšła ŭ niabyt, ale pytańni, čamu Roza nie pasunułasia i ci vytrymali b złaščasnyja dźviery dvaich, tryvožać pakaleńnie 90-ch dahetul.
Fłanielevyja kašuli. Jašče adna reč uniseks, miehapapularnaja ŭ toj čas. Z nahody deficytu, pra pamier dumać nie davodziłasia, tamu časta takuju kašulu nasili ŭ farmacie aviersajz. Prynt u kletku ličyŭsia samym modnym.
Kalarovyja łasiny. Moda na hetuju reč trymałasia z 80-ch, praŭda, tady łasiny mahli sabie dazvolić adzinki. Kali ŭ Biełarusi źjavilisia pieršyja kitajskija madeli, modnicy ładzili na ich sapraŭdnaje palavańnie. Byvała, što kisłotnyja łasiny pryvozili z-za miažy — naprykład, ź niadaŭna abjadnanaj Hiermanii ci ZŠA.
Švedry BOYS. Krutyja chłopcy nasili švedry z nadpisam BOYS. Ich nadziavali na kašulu — kab troški vyhladaŭ kaŭnieryk. Kamplekt dapaŭniali džynsami i skuranym ramianiom. Jak i siońnia, dziaŭčaty 90-ch taksama zapazyčvali mužčynskija rečy, tamu švedry BOYS źjaŭlalisia i ŭ ich.
Bandycki styl. Kali havorka zajšła pra mužčynskuju modu, nielha nie adznačyć styl «bratkoŭ». U 90-ja arhanizavanaja złačynnaść u Biełarusi raśćviła pyšnym ćvietam. Što nasili ŭdzielniki biełaruskich złačynnych hrupovak, my padrabiazna apisali ŭ hetym artykule.
Pakiety. Aksiesuar, kaštoŭnaść jakoha nie zrazumiejuć ludzi, maładziejšyja za tryccać. Płastykavy pakiet ličyŭsia redkaściu: im hanarylisia, jaho dahladali, myli i navat padbirali pad jaho astatni aŭtfit. Na ščaście, užo ŭ siaredzinie dziesiacihodździa ŭ krainie pačali źjaŭlacca tannyja tureckija torby, jakija pastupova vycieśnili polietylenavy vyrab.
Płastykavyja čokiery. Abaviazkovy dadatak da majki z «Tytanikam». Płastykavy aksiesuar pradavaŭsia na rynkach i ŭ kijoskach. Darečy, niadaŭna čokiery viarnulisia ŭ modu. Praŭda, u bolš jakasnym vykanańni.
Pry ŭsioj niedarečnaści, jak heta nam bačycca siońnia, moda 90-ch była pa-svojmu cudoŭnaj: jak minimum, jana stała simvałam novaha, bolš volnaha času.
SK nazvaŭ imiony tych, chto skinuŭ vybuchoŭku na bazu AMAPa ŭ Minsku ŭ 2021 hodzie4
Kamientary