Asobnych čerhaŭ bolš niama. Što źmianiłasia ŭ prachodžańni miažy
Da niadaŭniaha času hramadzianie ES na niekatorych punktach propusku mahli zajechać, abminajučy ahulnuju čarhu. Heta dazvalała ekanomić vielmi šmat času. Vyhladaje, ščylinu prykryli.
Mahčymaść prajechać pa-za čarhoj była ŭ punktach propusku «Pryvałka», «Katłoŭka», «Kamieny Łoh» na miažy ź Litvoj i ciapier zakrytych «Bruzhach» na miažy z Polščaj. A, naprykład, u punktach propusku «Bieniakoni» i «Brest» asobnych pałos dla ruchu hramadzian ES niama, tamu ŭsie stajali ŭ adnoj čarzie i raniej.
Jašče da 22 śniežnia hramadzianie luboj krainy ES mieli prava zajazdžać na terytoryju punkta propusku i stanavicca adrazu ŭ asobny kanał dla hramadzian ES. U toj ža čas, uładalniki biełaruskich i inšych pašpartoŭ stajali ŭ ahulnaj čarzie na ŭjezd.
Jak paviedamlajuć čytačy, z 22 śniežnia litoŭski bok rašyŭ nie padzialać čarhu pierad punktam propusku pa pryncypie hramadzianstva. Padarožniki miarkujuć, što na takija zachady jany pašli praz pavieličeńnie kolkaści kanfliktnych situacyj pamiž hramadzianami roznych krain.
«Biełarusy niezadavolenyja tym, što hramadzianie ES zajazdžajuć na punkt propusku, nie stojačy ŭ ahulnaj čarzie, pačali ładzić na miažy razborki z «jeŭrapiejcami» z pryciahnieńniem palicyi», — kaža čytač.
Inšy čytač raspaviadaje, što byŭ śviedkam taho, jak paśla ŭviadzieńnie novych pravił biełaruska z polskim pašpartam usio adno abjechała čarhu ŭ spadzievie na toje, što jaje prapuściać, jak i raniej.
«Jana prastajała pierad šłahbaumam u «Pryvałcy» («Rajhardas») niekalki hadzin, ale litoŭskija pahraničniki ŭsio adno nie prapuścili jaje biez čarhi. Pamiežnik prynios joj dla aznajamleńnia niejkuju pastanovu na litoŭskaj movie, dzie nibyta była infarmacyja pra hetyja źmieny ŭ praviłach», — raspaviadaje čytač.
Inšy čytač, ź litoŭskim hramadzianstvam, jaki raniej jeździŭ u Biełaruś praz «Katłoŭku», raspavioŭ, što praz hetyja źmieny pajezdka ŭ Biełaruś zaniała ŭ jaho kala 30 hadzin, kali raniej jon pierasiakaŭ miažu maksimum za 8 hadzin.
Biełarusy z pašpartami ES u abmierkavańniach hetych novaŭviadzieńniaŭ spadziajucca, što hetyja miery časovyja i kali ažyjataž spadzie, to jany znoŭ zmohuć jeździć praź miažu jak i raniej.
Čytajcie taksama:
«Za 20 chvilin prajšoŭ abiedźvie miažy». U tyktoku dzielacca łajfchakami, jak chutka trapić u Biełaruś na navahodnija śviaty
Kiroŭcy ad adčaju stali sihnalić. Što adbyvajecca na biełaruska-polskaj miažy VIDEA
Kali Kanapackaja stała padkantrolnaja Łukašenku? Raskazvajuć jaje siabry2
Kamientary