Pieršaja pieradvybarnaja pramova Bajdena: Tramp — fundamientalnaja pahroza demakratyi
«Ci praciahnie demakratyja być śviatoj misijaj Amieryki, — heta samaje aktualnaje pytańnie našaha času, u im usia sutnaść vybaraŭ 2024 hoda», — padkreśliŭ ciapierašni prezident u svajoj emacyjnaj pramovie.
U svajoj pieršaj pieradvybarnaj pramovie 2024 hoda prezident ZŠA Džo Bajden papiaredziŭ vybarščykaŭ ab niebiaśpiekach, jakija pahražajuć krainie ŭ vypadku viartańnia da ŭłady svajho vierahodnaha apanienta Donalda Trampa. Bajden nazvaŭ Trampa «fundamientalnaj pahrozaj amierykanskaj demakratyi» i nahadaŭ pra napad na Kapitolij, paviedamlaje Bi-bi-si.
«Ci praciahnie demakratyja być śviatoj misijaj Amieryki, — heta samaje aktualnaje pytańnie našaha času (…), u im usia sutnaść vybaraŭ 2024 hoda», — padkreśliŭ ciapierašni prezident u svajoj emacyjnaj pramovie.
Tramp u svaju čarhu rezka adreahavaŭ na jaje padčas vystupu pierad svaimi prychilnikami ŭ štacie Ajova. Jon nazvaŭ jaje «žałasnaj strašyłkaj» i skazaŭ, što Bajden sam — pahroza demakratyi.
«Pasłužny śpis Bajdena — heta bieśpierapynnaja čarada [prajaŭ] słabaści, niekampietentnaści, karupcyi i pravałaŭ», — zajaviŭ Tramp.
Tramp — samy imavierny kandydat na pasadu prezidenta ZŠA ad Respublikanskaj partyi — časta paŭtaraje iłžyvaje śćviardžeńnie ab tym, što vybary 2020 hoda byli ŭ jaho skradzienyja.
Były prezident navat sprabavaŭ pradstavić napad 6 studzienia jak «vydatny dzień» u svaich publičnych vystupach. Jon nazyvaŭ udzielnikaŭ šturmu «patryjotami» i palityčnymi viaźniami i abiacaŭ pamiłavać ich, kali vierniecca ŭ Bieły dom.
Uziaŭšy pad pryceł hetuju rytoryku Trampa, Bajden u svajoj pramovie abvinavaciŭ jaho ŭ sprobie «skraści historyju», pry hetym kala 40 razoŭ nazvaŭšy svajho supiernika pa imieni.
«Natoŭp Trampa sabraŭsia nie dla mirnaha pratestu, a dla hvałtoŭnaha šturmu, — skazaŭ Bajden. — Jany byli miaciežnikami, a nie patryjotami. Jany tam sabralisia nie dla taho, kab abaranić Kanstytucyju, a kab źniščyć Kanstytucyju».
«Tych, chto jamu supraćstaić, jon nazyvaje parazitami. Jon kaža ab atručvańni kryvi amierykancaŭ, paŭtarajučy tyja ž samyja vyrazy, jakija vykarystoŭvalisia ŭ nacysckaj Hiermanii», — praciahnuŭ ciapierašni prezident.
Pieradvybarčy štab Trampa pakul nie adreahavaŭ na prośbu ab kamientarach.
Džejsan Miler, staršy daradca pieradvybarčaha štaba Trampa, napisaŭ u siabie ŭ X (byłym «tvitery«), što Bajden «vyrašyŭ nie budavać svaju kampaniju na kankretnych prablemach u 2024 hodzie».
«Zamiest taho, kab dapamahać tym, chto pakutuje ad «Bajdenomiki» abo z-za našaj dziravaj paŭdniovaj miažy, Bajden płanuje zrabić urad svajoj zbrojaj suprać svajho hałoŭnaha palityčnaha apanienta», — prakamientavaŭ Miler.
Bajden u svaich vystupach znoŭ i znoŭ viartajecca da temy zachavańnia demakratyi ŭ ZŠA.
U 2020 hodzie ŭ svajoj prezidenckaj kampanii jon pazicyjanavaŭ siabie jak kandydat, zdolny viarnuć Amieryku da narmalnaha žyćcia. Pierad vybarami ŭ Pałatu pradstaŭnikoŭ 2022 hoda Bajden nazvaŭ ich «bitvaj za dušu nacyi».
Ciapierašniaje pieradvybarčaje vystupleńnie Bajdena adbyłosia niedaloka ad Nacyjanalnaha histaryčnaha parku Veli-Fordž u Piensilvanii.
Hetaje miesca było abrana śpiecyjalna, kab padkreślić vysokija staŭki ŭ prezidenckaj honcy. Veli-Fordž viadomy tym, što tam padčas amierykanskaj vajny za niezaležnaść armija Džordža Vašynhtona pieražyła ciažkuju zimu 1777-78 hadoŭ.
Kamientary