Upieršyniu Łukašenka nie vystupaŭ pa-biełarusku na cyrymonii ŭručeńnia premii «Za duchoŭnaje adradžeńnie»
Tradycyjna heta było adzinaje mierapryjemstva, dzie Alaksandr Łukašenka pramaŭlaŭ nie pa-rusku. Ci prynamsi nie tolki pa-rusku.
U Minsku prajšła cyrymonija ŭručeńnia premij «Za duchoŭnaje adradžeńnie» i «Biełaruski spartyŭny Alimp». Jana prachodzić štohod (raniej raz na dva hady), u joj tradycyjna prymaje ŭdzieł Alaksandr Łukašenka.
Admietnaść cyrymonii zaŭsiody była ŭ tym, što heta redki vypadak, kali Alaksandr Łukašenka vystupaŭ pa-biełarusku. Niachaj častkova — niekalki chvilin z ahulnaj pramovy, — niachaj pa papiercy, ale ŭsio ž pa-biełarusku.
Hetaksama było i ŭ minułym hodzie, i raniej. I voś u 2024 hodzie Łukašenka ŭpieršyniu całkam admoviŭsia ad biełaruskaj movy.
Praŭda, było i adno vyklučeńnie. U źniavažlivym styli padčas ruskamoŭnaj pramovy było vykarystana biełaruskaje słova «zaniapad». Pa mierkavańni Łukašenki, «biehłyja hvałtam kryčać pra zaniapad duchoŭnaści i kultury», ale ŭsio heta niapraŭda.
Jak vyhladaje 46-hadovy juryst Juraś Ziankovič praz try z pałovaj hady źniavoleńnia ŭ biełaruskaj turmie6
Kamientary