Chto toj sudździa, jaki adpraviŭ u kałoniju Vadzima Chraśko — palitviaźnia ź ciažkaj chvarobaj, jakaja stała śmiarotnaj
Siarhiej Chrypač pracuje ŭ Minskim haradskim sudzie nie mienš za piatnaccać hadoŭ. Za hety čas jon paśpieŭ dvojčy patrapić pad sankcyi i asudzić biełarusaŭ na niekalki socień hadoŭ. Ale pa sacsietkach nie skažaš, što Chrypač sudździa: tam jon łajkaje aholenych žančyn i publikuje raspłyvistyja «mudryja» cytaty.
Bolš za 15 hadoŭ u represijach
Siarhieju Chrypaču 57 hadoŭ. Jon minčuk, skončyŭ 98-ju škołu ŭ Sierabrancy. Paśla pajšoŭ na jurfak Biełaruskaha dziaržaŭnaha ŭniviersiteta. Nieviadoma, kali jon staŭ sudździoj, ale ŭ Minskim haradskim sudzie jon dakładna pracuje z «nulavych».
Pieršyja paviedamleńni pra toje, što Chrypač zamiašany ŭ represijach, datujucca 2008-m hodam. Jon adchiliŭ skarhu pa «spravie 14-ci» — palityčna matyvavanaj spravy suprać aktyvistaŭ, jakija 10 studzienia 2008-ha paŭdzielničali ŭ strajku pradprymalnikaŭ.
Paśla hetaha jon adzin ź pieršych patrapiŭ u sankcyjnyja śpisy ES za toje, što adchiliŭ apielacyjnyja skarhi asudžanych za ŭdzieł u pratestach paśla prezidenckich vybaraŭ 2010-ha hoda — Andreja Sańnikava, Uładzimira Niaklajeva, Mikałaja Statkieviča i šerahu inšych viaźniaŭ.
Paśla hetaha ad represij jamu dazvolili «adpačyć». Ale jon vioŭ šerah hučnych spraŭ apošnich dziesiaci hadoŭ, naprykład, spravu trahiedyi na vulicy Haja ŭ 2015-m, kali mužčyna sprabavaŭ zabić svaju žonku i dziaciej, a paśla ŭrezaŭsia na vialikaj chutkaści ŭ inšy aŭtamabil, dzie zahinuli dvoje. A taksama «spravu 17-ci» ŭ 2016-m, kali hrupu ludziej vinavacili ŭ arhanizacyi narkašopa, a siarod abvinavačanych byli musaviec i kadebešnik.
Zapluščvaje vočy na katavańni, prysudžaje vializarnyja terminy
«Zorny čas» Chrypača, jak i inšych palityčnych sudździaŭ, pryjšoŭ paśla 2020-ha. Jon sudziŭ Alaksandra Trockaha, jakoha vinavacili ŭ najeździe na supracoŭnika DAI. A sprava była takaja: 12 žniŭnia mašynu Trockaha akružyli ŭzbrojenyja daišniki i adzin ź ich biez daj pryčyny dastaŭ zbroju dy pačaŭ tyckać joj u Alaksandra. U adkaz na heta jon pasprabavaŭ źjechać, ale jamu pad koły kinuŭsia daišnik. Paškodžańniaŭ toj nie atrymaŭ, ale Trockaha vinavacili ŭ «sprobie zabojstva milicyjanta».
Samoha Alaksandra vielmi mocna katavali paśla zatrymańnia:
«Mianie źbivali z užyvańniem dubinak, pistaleta i z užyvańniem hazavaha bałončyka, raspyliŭšy mnie jaho ŭ tvar. Praktyčna z samaha pačatku źbivańniaŭ samastojna pierasoŭvacca ja ŭžo nie moh».
Alaksandru Trockamu prysudzili dziesiać hadoŭ pazbaŭleńnia voli. Na toj momant heta byŭ samy žorstki prysud udzielniku pratestaŭ.
Takija ž historyi paŭtarylisia z Jahoram Dudnikavym i Dźmitryjem Padrezam. Ich abodvuch mocna źbili pry zatrymańni, ale Chrypač nie źviarnuŭ na heta ŭvahi. Jany atrymali 11 i 7 hadoŭ kałonii adpaviedna.
Siarod hučnych spraŭ, jakija vioŭ Chrypač — sprava «Revalucyjnaha dziejańnia», pa jakoj prachodzili Marfa Rabkova i Alaksandr Franckievič, i «sprava padpału doma Hajdukieviča», pa jakoj prachodziła Siamja Vajciachovičaŭ i Vadzim Prakopjeŭ. Pa hetych spravach jon prysudziŭ fihurantam bolš za 300 hadoŭ turmy na ŭsich.
«Zmova siłavikoŭ»: chto tyja aficery, jakich sudziać razam z Prakopjevym
Ahułam ža biełarusam Chrypač tolki pa viadomych spravach prysudziŭ pad piaćsot hadoŭ turmy. Za heta jon uklučany ŭ sankcyjnyja śpisy ES i Vialikabrytanii.
Jość u Siarhieja i maleńkaja słabaść. U Adnakłaśnikach jon pastajanna stavić «kłasy» fotam aholenych žančyn.
A Ukantakcie siarod samych papularnych padpisak Siarhieja — hrupy z erotykaj i porna.
Na svajoj «ścianie» Ukantakcie Chrypač publikuje ŭ asnoŭnym «šmatznačnyja» cytaty, jakija byli papularnyja siarod dziaŭčat-padletkaŭ u «nulavych».
Vadzim Chraśko — čaćviorty palitviazień, jaki pamior za kratami. Pierad im zahinuli aktyvist Vitold Ašurak, błohier Mikałaj Klimovič i mastak Aleś Puškin.
«Naša Niva» — bastyjon biełaruščyny
PADTRYMAĆAleś Puškin mučyŭsia strašnymi bolami, ale jaho nie špitalizavali. Chto načmied u turmie, dzie jon pamior
Sudździa, viadomaja mnohim palitviaźniam, i prakuror ź miedalom ad Łukašenki. Chto sudziŭ Alesia Puškina
«Cichi čałaviek ź miakkim hołasam». Chto tyja sudździa i prakuror, jakija adpravili ŭ kałoniju błohiera Klimoviča — palitviaźnia, jaki pamior za kratami
Kamientary