Aficyjny Sajuz piśmieńnikaŭ abjaviŭ vajnu niezaležnaj litaraturnaj premii
Praŭładny Sajuz piśmieńnikaŭ Biełarusi vydaŭ zajavu, u jakoj paviedamiŭ pra pastupleńnie da jaho zvarotaŭ ad dziaržaŭnych vydaviectvaŭ «Mastackaja litaratura», «Biełaruś» i «Vydaviecki dom «Źviazda». Vydaviectvy, maŭlaŭ, pratestujuć, što vydadzienyja imi knihi bieź ich dazvołu fihurujuć u niadaŭna apublikavanym šort-liście niezaležnaj litaraturnaj premii imia Ciotki.
«Na niekatorych niedziaržaŭnych internet-resursach byŭ apublikavany śpis naminantaŭ na tak zvanuju «premiju Ciotki», jakaja nie maje nijakaha dačynieńnia ni da biełaruskaj dziaržavy, ni da Sajuza piśmieńnikaŭ Biełarusi, — havorycca ŭ zajavie. — Adnak niekatoryja členy našaj hramadskaj arhanizacyi daviedalisia, što ich proźviščy i tvory bieź viedama pravaŭładalnikaŭ skarystanyja dla rekłamy niezakonnaha konkursu», — śćviardžajecca ŭ zajavie.
Praŭładnaja arhanizacyja źviartaje ŭvahu, što na sajcie premii źmieščana pałažeńnie ab joj, i pieraličanyja ŭ im jak zasnavalniki try arhanizacyi likvidavanyja łukašenkaŭskimi sudami ŭ 2022 hodzie.
«Sa źviestak pra arhanizataraŭ konkursu na siońniašni dzień — tolki adras elektronnaj pošty, na jaki možna dasłać tvory. Skład žury nie abvieščany. Takim čynam, heta ananimnaje mierapryjemstva, adkaznaść za praviadzieńnie i vyniki jakoha faktyčna nichto nie niasie», — zajaŭlaje SPB.
A dalej vystupaje z palityčnymi abvinavačańniami:
«Vidavočna, što, stvarajučy padobnyja pravakacyi, apazicyjaniery damahajucca tolki adnaho — lehalizavać hrašovyja srodki, jakija pieraličvajucca zachodnimi sponsarami, bo niama nijakich sumnieńniaŭ, što pieramožcam premii budzie «pryznačany» ich pradstaŭnik. Pry hetym jany vykonvajuć jašče adno zadańnie zachodnich «haspadaroŭ» — dyskredytavać dziaržaŭnyja vydaviectvy, ich aŭtaraŭ — členaŭ Sajuza piśmieńnikaŭ Biełarusi, knihi jakich naminavany biez uzhadnieńnia ź imi».
U suviazi z hetym kiraŭnictva SPB zaklikaje vydaviectvy i redakcyi ŚMI «nie ŭsprymać surjozna falšyvyja dypłomy pieramožcaŭ padobnych konkursaŭ», a litarataraŭ i inšych ludziej, jakija majuć dačynieńnie da vydańnia vystaŭlenych na konkurs knih — «zajavić rašučy pratest u suviazi z padobnymi pravakacyjami».
Litaraturnaja premija, nazvanaja ŭ honar biełaruskaj piśmieńnicy Ałaizy Paškievič (psieŭdanim: Ciotka), była zasnavanaja ŭ kancy 2015 hoda, a ŭručajecca z 2016-ha. Zasnavalnikami premii byli Sajuz biełaruskich piśmieńnikaŭ, dabračynny fond «Viartańnie» i Biełaruski PEN-centr.
Premija dajecca za najlepšuju knihu dla dziaciej i padletkaŭ. Jana tradycyjna prysudžajecca ŭ dźviuch naminacyjach:
- najlepšaja kniha dla dziaciej i padletkaŭ (aryhinalnyja aŭtarskija tvory, napisanyja na biełaruskaj movie);
- najlepšaje mastackaje afarmleńnie (da ŭdziełu prymajucca aryhinalnyja i pierakładnyja knihi na biełaruskaj movie).
Ciapier čytajuć
«Što, hrochnuć dziaciej Cichanoŭskaj, kab źviarnuli ŭvahu na maju prablemu?» Jak tupy kamientar aktyvista Dzianisa Daškieviča stvaryŭ jamu prablemy ŭ Polščy29
Kamientary