Tunel, znojdzieny pad sinahohaj u Ńju-Jorku, u vačach prychilnikaŭ teoryi zmovy KjuAnon razhladajecca jak dokaz taho, što ŭsim śvietam pravić tajamničaja i mahutnaja klika satanistaŭ-piedafiłaŭ.
Jak paviedamlałasia, u Ńju-Jorku pad štab-kvateraj miascovych chasidaŭ znajšli tunel, jaki, miarkujučy pa ŭsim, vykapali pradstaŭniki miesijanskaj frakcyi — vierahodna, jany ličyli, što takim čynam vykonvajuć volu rebie ab pašyreńni terytoryi sinahohi.
Ale pracy pravodzilisia biez uchvaleńnia ravinskich uład, dla jakich hetyja ścieny śviatyja. Raźjušanyja relihijnyja lidary pasprabavali zalić tunel bietonam.
8 studzienia maładyja ludzi schavalisia ŭsiaredzinie, kab zabłakavać pracy. Dziakujučy palicyi jany byli vycieśnienyja. Na nastupny dzień rabin sinahohi asudziŭ «vandalizm» i padziakavaŭ palicyi Ńju-Jorku. 10 studzienia tunel pad sinahohaj byŭ zality bietonam.
Zdavałasia, kanflikt vyčarpany. Adnak, jak piša Le Monde, kadry sutyknieńnia viernikaŭ z palicyjaj chutka razyšlisia pa sacyjalnych sietkach.
Niechta zaŭvažyŭ na adnym sa starych matracaŭ, na jakich spali studenty, plamu. Zjavilisia teoryi, što heta plama kryvi, pryčym dziciačaj. Jaŭrei, tuneli i dzieci — try elemienty, jakija mocna budaražać fantazii prychilnikaŭ kanśpirałahičnych teoryj.
Chutka raskruciłasia mašyny plotak. U internecie zjaŭlajucca paviedamleńni, što tunel, jaki nasamreč daŭžynioj trochi bolš za 10 mietraŭ, maje vychad prosta nasuprać Dziciačaha muzieja — da jaho ažno 600 mietraŭ. Zjavilisia zmantavanyja videa, na jakich vyjavy sinahohi spałučanyja sa scenami handlu dziećmi ŭ Łacinskaj Amierycy.
Pasypalisia abvinavačvańni ŭ tym, što jaŭrei ŭ ZŠA praktykujuć «sataninskaje rytualnaje pałavoje nasille». Zjavilisia viersii, što chasidy vykarystoŭvali tuneli ŭ Ńju-Jorku ledź nie dla prodažu dziaciej u seksualnaje rabstva.
I ŭ heta šmat chto pavieryŭ. Vydańnie nahadvaje, što jašče ŭ krasaviku 2020 hoda va ŭmovach poŭnaj izalacyi prajšła čutka, što ŭ padvałach Ńju-Jorka ŭ pałonie trymajuć dziasiatki tysiač dziaciej. Zatym rušyli ŭśled varyjanty, źviazanyja z tunelami ŭ inšych haradach, naprykład, u aŭstralijskich Mielburnie ci Sidnei. U 2022 hodzie teoryja zmovy śćviardžała, što, razbambiŭšy Ukrainu, Pucin vyzvaliŭ by 35 tysiač dziaciej, jakija apynulisia ŭ pastcy pad ziamloj.
Jak patłumačyła Le Monde antrapołah Vieranik Kempion-Vansa (Véronique Campion-Vincent), jakaja śpiecyjalizujecca na haradskich lehiendach, «zmova — advarotny bok narmalnaha śvietu, i jon znachodzicca pad ziamloju. Heta dobry sposab patłumačyć najaŭnaść kahości, kaho my nie bačym».
U pačatku XX stahodździa zjaviłasia teoryja, što ŭ tunelach pad pavierchniaŭ Miesiaca chavajucca inšapłaniecianie. Sučasnyja ufołahi padazrajuć najaŭnaść na Marsie «padziemnych» bunkieraŭ, adkul marsijanie nazirajuć za ziamlanami.
U teoryi zmovy tunelam nadajecca apieratyŭny aśpiekt. Jon zjaŭlajecca prykmietaj aktyŭnaści, isnavańnia sietki, arhanizavanaj škody. U 1980-ch hadach stali raspaŭsiudžvacca čutki ab tym, što ŭ adnym ź dziciačych sadočkaŭ u Łos-Andželesie pravodziacca rytualnyja cyrymonii, u časie jakich dziaciej padviarhajuć seksualnaj ekspłuatacyi. Čutkam nadali surjoznuju ŭvahu, i tuneli šukała palicyja. Zrazumieła, što ničoha nie było znojdziena.
U teoryi zmovy KjuAnon (QAnon) tuneli dla piedafiłaŭ stali centralnaj temaj. Hetaja teoryja zaradziłasia ŭ internecie i pastupova nabyła papularnaść pa-za jaho miežami, asabliva ŭ ZŠA. Najbolš u jaje vierać ultrapravyja prychilniki Donalda Trampa. Mienavita ŭ časie jaho prezidenctva teoryja ŭźnikła i nabyła papularnaść.
Prychilniki KjuAnon upeŭnieny, što śvietam kiruje niejkaja tajamničaja i mahutnaja klika satanistaŭ-piedafiłaŭ. U jaje ŭvachodziać viadomyja lidary Demakratyčnaj partyi, biznesmieny, aktory, členy karaleŭskich siemjaŭ i inšyja znakamitaści jak z ZŠA, tak i inšych krain Zachadu. Jana padtrymlivaje hihanckuju mižnarodnuju sietku, jakaja zajmajecca seksualnaj ekspłuatacyjaj niepoŭnahadovych. KjuAnon navat raspracavała fantastyčnuju kancepcyju «dziaciej-kratoŭ» dla abaznačeńnia achviaraŭ, jakija ŭtrymlivajucca pad ziamloj dla zadavalnieńnia piedasataninskaj elity.
Hetaja ž klika, pa mierkavańni prychilnikaŭ KjuAnonu, płanuje zmovu suprać Donalda Trampa, jaki choča jaje źniščyć dziela dabra va ŭsim śviecie.
Apošni raz pik aktyŭnaści KjuAnonu pryjšoŭsia na prezidenckija vybary ŭ ZŠA ŭ 2020 hodzie. Adkryćcio ŭ adnoj z upłyvovych sinahoh Bruklina padziemnaha tunelu pierazapuściła hetuju teoryju.
Čytajcie jašče:
U Ńju-Jorku pad štab-kvateraj miascovych chasidaŭ znajšli patajemny tunel
Prapahandysty znoŭ źviarnulisia da kanśpirałohii. Kozyr z «Płanam Dalesa» dastaŭ Kirył Kazakoŭ
Što viadoma pra siamju z Baranavičaŭ, u jakoj i mužu, i žoncy dali vielizarnyja terminy za «zdradu dziaržavie»11
Kamientary