Kampaniju ŭ Minsku zakryvaje jašče adzin viadomy mabilny raspracoŭščyk

Aficyjna pracedura likvidacyi Belka Games była zapuščanaja ŭ kancy śniežnia 2023 hoda. Rašeńnie było pryniataje ŭłaśnikam. Takim čynam, kampanija papoŭniła śpis mabilnych raspracoŭščykaŭ, jakija vyrašyli zakryć biznes u Biełarusi.

Belka Games źjaŭlajecca adnym z najbujniejšych mabilnych raspracoŭščykaŭ ź biełaruskimi karaniami. Studyja — stratehičny partnior AppLovin — suśvietnaj mabilnaj rekłamnaj płatformy. U 2019 hodzie Belka Games pryciahnuła inviestycyi ad AppLovin, jakaja na toj momant aceńvałasia ŭ 2 miljardy dołaraŭ.

U 2021 hodzie Belka Games uvajšła ŭ top-3 najbujniejšych pablišaraŭ ź biełaruskimi karaniami pa pamiery vyručki. Kampanija atrymała za hod 130,7 miljona dalaraŭ — amal na 50% bolš, čym u 2020 hodzie. Taksama Belka Games uvajšła ŭ top-100 mabilnych pablišaraŭ śvietu pa viersii App Annie, u top-20 pa vyručcy ŭ rehijonie JEMIEA.

Na pačatku 2022 hoda ŭ kampanii pracavała bolš za 400 čałaviek u šaści ofisach, uklučajučy ofis u Minsku.

Vajna va Ukrainie vymusiła kampaniju skarektavać stratehiju raźvićcia. U listapadzie 2022 hoda Belka Games zajaviła ab sychodzie z Rasii i rełakacyi amal usioj rasijskaj kamandy ŭ inšyja krainy.

«U sakaviku 2022 hoda naša kampanija stała pastupova sychodzić z Rasii ŭ suviazi z padziejami ŭ rehijonie. Za 7 miesiacaŭ my rełakavali kamandu i pamienšyli našu prysutnaść u 6 razoŭ — z 240 da 35 supracoŭnikaŭ. Na siońniašni dzień pryniataje rašeńnie ab kančatkovym spynieńni dziejnaści rasijskaha ofisa. Kampanija praciahvaje apieravańnie i pašyreńnie kamandy ŭ Jeŭropie», — zajaviŭ CEO Alaksandr Bahdanaŭ.

Ofis u Biełarusi na toj momant praciahvaŭ pracavać. Ale, pavodle słoŭ krynic, jašče ŭ 2021 hodzie kampanija ŭviała maratoryj na najmańnie ŭ RB. Achvotnym pierajechać davali mahčymaść uładkavacca ŭ Polščy, Litvie i Čarnahoryi. Šmat supracoŭnikaŭ (ź Biełarusi) sychodzili samastojna z kampanii, chtości zhadžaŭsia na rełakiejt i pierajazdžaŭ, kahości skaračali.

Taksama stała viadoma, što suzasnavalnik Belka Games Dźmitryj Chusainaŭ atrymaŭ hramadzianstva Čarnahoryi ŭ abmien na inviestycyi.

Ciapier u Belka Games pracuje bolš za 300 čałaviek. Miarkujučy ź infarmacyi na aficyjnym sajcie, u kampanii adkryty padraździaleńni ŭ šaści krainach — u Litvie, Polščy, Ukrainie, Hruzii, Čarnahoryi i na Kipry. Na sajcie adkryta 12 vakansij — amal usie majuć na ŭvazie addalenuju pracu. Kampanii patrebnyja mastaki, dyzajniery, inžyniery, analityki.

Biełaruś

Ci zastalisia jašče supracoŭniki Belka Games u Biełarusi (chtości moža pracavać addalena) dakładna nie viadoma. Raniej tam pracavała bolš za 100 čałaviek. Na ciapierašni momant u linkiedzinie bolš za 20 supracoŭnikaŭ Belka Games paznačyli Biełaruś u jakaści aktualnaj łakacyi. 

Litva

U litoŭskim ofisie Belka Games ciapier zarehistravanyja 80 supracoŭnikaŭ. Za apošni hod kamanda pavialičyłasia na 20%. Asnoŭny rost byŭ u 2022 hodzie. U tym liku za košt rełakantaŭ ź Biełarusi kamanda ŭ Litvie pavialičyłasia ŭ try razy — z 22 da 66 čałaviek.

U Belka Games vyjaviŭsia samy vysoki siaredni zarobak siarod IT-kampanij ź biełaruskimi karaniami ŭ śniežni 2023 hoda — amal 10 tysiač jeŭra bruta. Imavierna, jakraz u śniežni supracoŭniki vilenskaha ofisa atrymali hadavyja bonusy. Jašče vosieńniu minułaha hoda siaredni zarobak u Belka Games vahaŭsia ŭ miežach 5 tysiač jeŭra bruta. Atrymlivajecca, što za śniežań siaredni zarobak vyras udvaja.

Pavodle danych rekvizitai.vz.lt, za 2022 hod Belka Games atrymała bolš za 4,4 miljonaŭ jeŭra prybytku ad prodažaŭ — u 4,5 razy bolš, čym u 2021 hodzie. Pry hetym kampanija atrymała bolš za 23 tysiačy jeŭra strat.

Polšča

Jurydyčnuju asobu ŭ Polščy (u Krakavie) kampanija zarehistravała pry kancy 2022 hoda. Kolki čałaviek pracuje ŭ Polščy, nieviadoma. U linkiedzinie bolš za 30 supracoŭnikaŭ Belka Games paznačyli Polšču ŭ jakaści aktualnaj łakacyi. 

Statutny kapitał polskaj jurydyčnaj asoby kampanii składaje 140 tysiač złotych, abo kala 35 tysiač dołaraŭ. Zhodna z apošniaj finansavaj spravazdačnaściu, za pieryjad sa śniežnia 2021 pa śniežań 2022 hoda kampanija ŭ Polščy atrymała bolš za 80 tysiač złotych (kala 20 tysiač dołaraŭ) strat, jakija płanujecca pakryć za košt budučych prybytkaŭ.

Chto jašče ź viadomych mabilnych raspracoŭščykaŭ syšoŭ (sychodzić) ź Biełarusi ŭ 2023-2024

Playtika

Izrailskaja hiejmdeŭ-kampanija. Ofis raspracoŭki Playtika ŭ Minsku byŭ adkryty ŭ 2012 hodzie. Na piku ŭ kampanii pracavała bolš za 600 čałaviek (na kaniec 2021 hoda). Minski ofis uvachodziŭ u top-20 samych bujnych IT-kampanij u Biełarusi. U publičnych spravazdačach kampanii z druhoj pałovy 2020 hoda Biełaruś fihuravała ŭ faktarach ryzyki praź niestabilnuju palityčnuju situacyju.

Top-mieniedžmient paviedamiŭ biełaruskaj kamandzie, što ofis raspracoŭki ŭ Minsku budzie zakryty pry kancy lutaha hetaha hoda. Častku supracoŭnikaŭ skarociać, častka, vierahodna, praciahnie pracavać addalena. Pa słovach supracoŭnikaŭ, aficyjnaja pryčyna zakryćcia — legal issues (zakanadaŭčyja pytańni — zaŭv.). Čakajecca, što kampanija skarocić 50% usioj minskaj kamandy, to-bok kala 150 čałaviek.

Apalon

Mabilny raspracoŭščyk ź biełaruskimi karaniami. Ciaham lutaha — sakavika kampanija zvolnić usiu biełaruskuju kamandu (100+ čałaviek), ofis u Minsku zakryjuć. Heta adbudziecca ŭ suviazi z prodažam praduktaŭ Mosaic Group — maciarynskaj kampanii Apalon. Jaje intelektualnaja ŭłasnaść stała pradmietam uhody, pry hetym kamanda — nie. 

U Apalon pracuje kala 150 čałaviek, ź ich bolš za 100 — u minskim ofisie. U kampanii taksama jość ofis u Litvie. Častka kamandy pracuje ŭ Polščy.

Playgendary

Mižnarodny raspracoŭščyk i vydaviec mabilnych hulniaŭ sa štab-kvateraj na Kipry. Na siońnia ahulnaja kolkaść zahruzak hulniaŭ pieravyšaje 3 miljardy. Štomiesiačnaja aŭdytoryja — 250+ miljonaŭ aktyŭnych karystalnikaŭ. U kamandzie 300 čałaviek. U Biełarusi vosieńniu 2021 hoda pracavała kala 120 čałaviek, paśla 24 lutaha 2022 hoda štat skaraciŭsia ŭ 3 razy litaralna za niekalki miesiacaŭ.

Verv

Kampanija stvaraje mabilnyja prahramy ŭ katehoryi Health and Fitness. My rehularna ŭklučali Verv u top-10 pablišaraŭ ź biełaruskimi karaniami pa pamiery vyručki. U minskim ofisie Verv pracavała kala 100 čałaviek. Ciapier bolšaść supracoŭnikaŭ u Polščy.

Akveo

Zajmajecca raspracoŭkaj ułasnych prahramnych praduktaŭ dla veb– i mabilnych rašeńniaŭ (ngx-admin, Kitten Tricks i inšyja). Pradukty prymianiajucca ŭ aŭtamabilnaj, turystyčnaj, bankaŭskaj, miedycynskaj, telekamunikacyjnaj i adukacyjnaj halinach.

TangoMe

Amierykanskaja kampanija, raźvivaje prahramu dla anłajn-tranślacyj Tango Live. Heta adnaja ź viadučych płatformaŭ dla anłajn-tranślacyj va ŭsim śviecie. Hadavy abarot aceńvajecca ŭ 400 miljonaŭ dołaraŭ.

• 8
• 0
• 1
• 0
• 1
• 3
• 1
• 0