Rasijski student z dapamohaj štučnaha intelektu znajšoŭ sabie dziaŭčynu. Historyja dajšła da prapanovy šlubu
Chłopiec navučyŭ štučny intelekt kamunikavać ź dziaŭčatami praz tyndar zamiest siabie. Raspaviadajem, jak jon heta zrabiŭ, kolki daviałosia patracić času na pošuki i ź jakoj kolkaści dziaŭčat vybirać, kab znajści tuju, jakoj jon zrabiŭ prapanovu.
Pra svoj vopyt pošuku dziaŭčyny Alaksandr Žadan raspavioŭ u tvitary. Hod tamu jon staŭ viadomy tym, što abaraniŭ dypłomnuju rabotu, napisanuju z dapamohaj ChatGPT.
Ale na hetym jaho ekśpierymienty nie spynilisia. Alaksandr vyrašyŭ vykarystać mahčymaści štučnaha intelektu dla pošuku dziaŭčyny. Na hety krok jon pajšoŭ paśla taho, jak razyšoŭsia z papiaredniaj dziaŭčynaj, ź jakoj mieŭ adnosiny na praciahu dvuch hadoŭ.
Jak piša chłopiec, praź niekalki miesiacaŭ jon zrazumieŭ, što choča novych adnosin. U toj ža čas uśviedamlaŭ, što nie choča marnavać čas i adčuvać siabie niekamfortna z novaj dziaŭčynaj. Dla pošuku jon vykarystoŭvaŭ Tinder. Paśla pary tydniaŭ pierapiski jon chadziŭ na spatkańni, adnak jany zachodzili ŭ tupik.
«Uskryvalisia charakternyja minusy (šmat pje, jość skavanaść, emacyjnyja areli). Tak, heta pačatkovaje ŭražańnie, ale mianie adšturchoŭvała», — dzielicca Alaksandr.
U vyniku jon vyrašyŭ vykarystać mahčymaści GPT. U 2022 hodzie, kali jašče nie było ChatGPT, jon ź siabram atrymaŭ dostup da API GPT-3. Praź sistemu z dapamohaj skrypta adsyłalisia paviedamleńni ŭ Tinder.
Pa skrypcie taksama adbyvaŭsia pošuk dziaŭčat. Pry hetym asnoŭnym było patrabavańnie najaŭnaści chacia b dvuch zdymkaŭ u profili. Skrypt adbiraŭ profili i łajkaŭ ich. Z 50 aŭtałajkaŭ atrymałasia 18 metčaŭ (na łajk chłopca dziaŭčaty taksama stavili svoj). Pa praviłam Tinder metč dazvalaŭ profilam pierapisvacca.
Jak piša Žadan, GPT kamunikavaŭ ź dziaŭčatami bieź jaho ŭdziełu pa zapycie «ty chłopiec, kamunikuješ ź dziaŭčynaj upieršyniu. Tvaja zadača: nie adrazu, ale zaprasić jaje na spatkańnie».
Ale pieršy vopyt akazaŭsia pravalnym. Paśla niekalkich dyjałohaŭ pierapiska spyniałasia, bo, jak piša chłopiec, «na trecim-čaćviortym paviedamleńni GPT klikaŭ na spatkańnie ŭ les».
Da taho ž GPT-3 nie pamiataŭ pierapiski. Paśla pieršych 5 paviedamleńniaŭ jon paŭtaraŭ pytańni, na jakija ŭžo byli atrymanyja adkazy. U vyniku z 18 dziaŭčat 13 «adrazu zaihnoryli», 5 — praciahnuli pierapisku. Rekord dajšoŭ da 10 paviedamleńniaŭ. Ale da spatkańnia tak i nie dajšło. Daviałosia dapracavać skrypt, kab sistema pamiatała papiarednija paviedamleńni.
Pieršaja viersija sistemy
Značnyja źmieny adbylisia z vychadam ChatGPT. Alaksandr navučyŭ sistemu na svaich dyjałohach, kab jana pisała maksimalna padobna da jaho stylu. Taksama jon pastaviŭ filtr na toje, kab jana nie pisała ničoha lišniaha.
Akramia hetaha, chłopiec nastroiŭ adsieŭ dziaŭčat pa vizualnych danych z dapamohaj pakieta Torchvision. Jon navučyŭ sistemu paśpiachova padbirać nieabchodnych dziaŭčat na padstavie 4 tysiač svajpaŭ ź inšaha svajho akaŭnta ŭ Tinder.
Dla poiska rielevantnych dievušiek postavił v vieb viersii Tinder raspoznavanije fotok čieriez torchvision, kotoryj obučiłsia na moich svajpach s druhoho akka na 4k profilej. Mašina smohła podbirať nužnych dievušiek počti vsiehda ispravno. Zabavnoje, čto s toho raza połučiłoś počti tyŝa mietčiej pic.twitter.com/breir4zo4C
Sistema padboru dziaŭčyny. Videa: @biblikz / X (Twitter)
U vyniku atrymałasia dasiahnuć amal tysiačy ŭzajemnych łajkaŭ. Chłopiec zrabiŭ filtr, jaki dazvoliŭ adsiejvać dziaŭčat pa niekalkich paramietrach: biez ankiet, mienš za 2 zdymki, viernicy, biespracoŭnyja, z paznakaj znaku zadyjaka i hetak dalej.
Pošuk staŭ bolš jakasnym. Ź niekatorymi dziaŭčatami Alaksandr pieravodziŭ pierapisku ŭ telehram. Tam jon sam damaŭlaŭsia ab sustrečach, napiaredadni jakich prasiŭ ChatGPT zrabić karotkaje reziume pierapiski i stvaryć charaktarystyku dziaŭčyny.
Jak piša chłopiec, ź niekatorymi jon praciahvaŭ kamunikavać biez dapamohi štučnaha intelektu, ale heta nie davała patrebnych vynikaŭ. Jak jon piša,
«dziaŭčaty pavodzili siabie dziŭna, sychodzili ŭ ihnor ci pa pierapiscy mianie niešta naściarožvała».
Akramia hetaha, pieršaja viersija, jakaja pracavała pa zapycie «znajści najlepšuju, padtrymlivać adnosiny», mieła šmat niedapracovak. Naprykład, mahła pryznačyć spatkańni ŭ adnolkavy čas, abiacała daryć šakaład ci kvietki, a jon pra heta nie viedaŭ i prychodziŭ na spatkańnie biez padarunka.
Druhaja viersija
Dla taho, kab palepšyć praces, daviałosia raspracavać novuju viersiju. U jaje byŭ intehravany huhł-kalandar i telehram, bazy danych padzielenyja na ahulnuju i asabistuju, raźmiažoŭvalisia ŭzroŭni davieru, fota raspaznavalisia pa FlutterFlow.
Novaja viersija pracavała na GPT-4, što, pa słovach Žadana, značna palepšyła pierapisku. Taksama atrymałasia praciahnuć pierapisku z papiarednimi dziaŭčatami, sustrakacca i prosta kamunikavać.
Jak raspaviadaje chłopiec, dla palapšeńnia pošuku jon paprasiŭ dapamohi ŭ zvyčajnaha ChatGPT. Sistema paraiła jamu raspavieści pra svajo dziacinstva, baćkoŭ, mety i kaštoŭnaści. Hetyja źviestki jon zahruziŭ u svaju raspracoŭku, što palepšyła pošuk pa sumiaščalnaści.
U dalejšym Alaksandr napisaŭ bot dla telehrama, praź jaki prachodziła validacyja paviedamleńniaŭ, stvoranych štučnym intelektam, na vyčytku.
U vyniku praviedzienych dapracovak druhaja viersija atrymałasia biez roznych «halucynacyj». Za miesiac atrymalisia 4943 uzajemnyja łajki i «strašna paličyć, kolki sustreč». Paśla 1-3 spatkańniaŭ chłopiec razumieŭ, ci žadaje praciahvać kamunikacyju.
Jak raspaviadaje Alaksandr, adnojčy jon na niekalki tydniaŭ skaraciŭ pierapisku i sustrečy da 4 dziaŭčat adnačasova. Astatnich pakinuŭ u statusie znajomych ci pastaviŭ adkazy na paŭzu. U vyniku z tryma jon zastaŭsia ŭ dobrych adnosinach, a z adnoj — Karynaj — u surjoznych. U vyniku nieabchodnaść u bocie prapała. Da taho ž, u hety čas z Rasii sychodziŭ Tinder.
Treciaja viersija
Ale chłopiec vyrašyŭ napisać treciuju viersiju svajoj sistemy, kab padtrymlivać adnosiny ŭžo tolki z Karynaj. U hetaj viersii bot pisaŭ za haspadara ŭ vypadkach, kali jon doŭha nie adkazvaŭ, i davaŭ parady, jak lepš kamunikavać.
Jak adznačaje Žadan, Karyna była siarod tych dziaŭčat, ź jakimi kamunikavała jašče jaho pieršaja viersija. Tamu vielmi dobra, što druhaja viersija zmahła praciahnuć pierapisku.
Adnojčy sistema na padstavie pierapiski z Karynaj prapanavała chłopcu ažanicca ź joj.
U asobnym ChatGPT chłopiec paprasiŭ padrychtavać płan dziejańniaŭ ź niekalkimi scenarami dla taho, kab dziaŭčyna pryniała prapanovu vyjści zamuž. U vyniku ŭsio atrymałasia.
Jak piša Alaksandr, na raspracoŭku prajektu syšło kala 120 hadzin i 1432 dalary na sistemu API. Na rachunki ŭ restaranach — da 200 tysiač rasijkich rubloŭ.
Dla taho, kab niejak manietyzavać svaju raspracoŭku, Alaksandr prydumaŭ źbirać danyja dziaŭčat i rekamiendavać ich na vakansii pracadaŭcaŭ. Tak jamu atrymałasia ŭładkavać 8 svaich znajomych i zarabić bolš za paŭmiljona rasijskich rubloŭ. Jak piša chłopiec, na hetym možna było zrabić startap, ale jon pieraklučyŭsia na bolš pierśpiektyŭny prajekt.
Pa słovach Žadana, kali b jamu daviałosia znajomicca samomu i chadzić na sustrečy, to na heta syšło b jak minimum 5 hadoŭ i kala $150 tysiač.
«Dziakuj GPT za ekanomiju hrošaj i času», — zaviaršaje svoj apovied Alaksandr.
Čytajcie jašče:
Historyja adnaho znajomstva ŭ tyndary, jakoje skončyłasia prajektam pra kino
«Druhoha takoha prosta nie vytrymaju». Niaŭdałyja pieršyja spatkańni vačyma chłopcaŭ
«This f*cking AI». Pierakładčyk Łukašenki pry prezidencie AAE vykarystaŭ niedypłamatyčnaje słova5
Kamientary