Zavieršana śledstva pa spravie samalota Ił-76 sa zbrojaj z KNDR
Palicyja pieradała spravu ŭ prakuraturu, jakaja vyznačaje najaŭnaść abo adsutnaść składu złačynstva ŭ dziejańniach padślednych.
Palicejskaje rasśledavańnie pa spravie ekipaža samalota Ił‑76, zatrymanaha ŭładami Tajłanda ŭ śniežni 2009 hoda z hruzam paŭnočnakarejskaj zbroi na borcie, zavieršana.
Pra heta paviedamiła RIA Novosti sa spasyłkaj na tajłandskuju hazietu The Nation.
Pavodle źviestak vydańnia, 13 studzienia palicyja pieradała spravu ŭ prakuraturu, jakaja zhodna ź miascovym zakanadaŭstvam razhladaje dakumienty śledstva i vyznačaje najaŭnaść abo adsutnaść składu złačynstva ŭ dziejańniach padślednych. U vypadku jaho najaŭnaści sprava pieradajecca ŭ sud.
Pry adsutnaści składu złačynstva abo ćviordych dokazaŭ viny prakuratura admaŭlaje ŭ raspačynańni sudovaha isku, i sud pastanaŭlaje zakryć kryminalnuju spravu i vyzvalić padślednych.
Samalot Ił‑76, zarehistravany ŭ Hruzii, byŭ zatrymany, pavodle roznych źviestak, 11 ci 12 śniežnia tajłandskimi ŭładami padčas techničnaj pasadki ŭ Banhkoku dla dazapraŭki palivam. Pry nadhladzie na borcie była znojdziena zbroja — hranatamioty, detali partatyŭnych zienitna‑rakietnych kompleksaŭ i ŭzryŭčatka. Zbroja była schavana ŭ skryni z markiroŭkaj hramadzianskaha hruzu. Tranzitny samalot byŭ nadhledžany ŭ adpaviednaści z rezalucyjaj Saŭbieza AAN № 1874, zhodna ź jakoj luboje marskoje abo pavietranaje sudna pavinna być nadhledžana ŭ pieršym porcie prybyćcia paśla vychadu abo vyletu z Paŭnočnaj Karei. Sankcyi stroha zabaraniajuć KNDR ekspart uzbrajeńniaŭ.
Ekipažu, jaki składajecca z čatyroch hramadzian Kazachstana i hramadzianina Biełarusi, vystaŭleny abvinavačańni ŭ nielehalnym zachoŭvańni zbroi i paviedamleńni zaviedama padmannych źviestak ab charaktary hruzu tajłandskim aficyjnym asobam. Členy ekipaža admaŭlajuć hetyja abvinavačańni i zajaŭlajuć, što nie viedali pra sapraŭdny charaktar hruzu, upakavanaha ŭ apłambavanyja skryni.
The Nation taksama publikuje vytrymki z adozvy členaŭ ekipaža da prezidenta Kazachstana Nursułtana Nazarbajeva, raźmieščanaj na interniet‑sajcie ŭrada Kazachstana, a taksama ŭ kazachskich i rasijskich ŚMI. Členy ekipaža zajaŭlajuć pra svaju nievinavataść i prosiać kazachstanskaha lidera sadziejničać ich vyzvaleńniu. Zajava była pieradadziena praz pasolstva Kazachstana ŭ Tajłandzie.
U papiaredniaj zajavie ekipaža, pieradadzienaj praz tajłandskaha advakata, lotčyki taksama admaŭlali ŭsie abvinavačańni i paviedamlali padrabiaznaści arhanizacyi palotu. U pryvatnaści, samalot naležyć hruzinskaj avijakampanii i byŭ zafrachtavany praz ukrainskuju kampaniju dla pieravozki hruzu ŭ kijeŭski aeraport Baryspal.
Ciapier čytajuć
Čaćviortuju liniju minskaha mietro paviaduć u Dražniu. A «Ślapianka» i «Daŭhabrodskaja» źmianili svajo miesca3
Kamientary