Pamiatajecie biełaruskuju aficyjantku, jakaja stała žonkaj šejcha z Dubaja? Voś jak skłałasia žyćcio hierojaŭ hetaj kazki

Nielha skazać, što žyćcio pieściła Natallu — prostuju dziaŭčynu sa Smalavičaŭ. Tady, u 2007 hodzie, kožny ranak 19-hadovaja dziaŭčyna sadziłasia ŭ maršrutku i jechała ŭ stalicu na zaniatki ŭ Biełaruski dziaržaŭny ŭniviersitet fizičnaj kultury. U volny čas hulała ŭ valejboł. A kab nie siadzieć na šyi ŭ baćkoŭ, pačała pracavać aficyjantkaj u restaranie hatela «Minsk».

Kalehi Natalli apisvali jaje jak zvyčajnuju dziaŭčynu, jakaja lubić mini-spadnički, džynsy i načnyja kłuby.

Pavialičyć

Ale źnianacku ŭ Minsk pryjechaŭ šejch Said bin Maktum al-Maktum, dziadźka jakoha ŭ toj momant byŭ emiram Dubaja. Prync tady byŭ maładym pryhožym spartoŭcam. Tryccacihadovy mužčyna ź miljardami na rachunkach u banku zajmaŭsia stendavaj stralboj i navat pradstaŭlaŭ AAE na Alimpijskich hulniach. U biełaruskuju stalicu jon pryjechaŭ, kab paŭdzielničać u čarhovych spabornictvach, i pasialiŭsia ŭ hateli «Minsk».

Pavialičyć

I voś u adzin zvyčajny dzień šejch zachacieŭ pić i paprasiŭ prynieści ŭ numar šklanku soku. Da darahoha hościa adpravili Natallu. A razam ź joj, mabyć, u numar zalacieŭ Kupidon i praciaŭ strałoj serca vopytnaha strełka. Bo jak inakš rastłumačyć, što dubajski spartoviec-miljarder staŭ z paroha pryznavacca ŭ kachańni biełaruskaj studentcy?

Dziaŭčyna navat nie vielmi razumieła, što adbyvajecca, bo drenna viedała anhielskuju. Paśla hetaj sustrečy šejch staŭ rehularna rabić zamovy ŭ numar — to sadavinu, to jašče štości. I mabyć, pahavaryŭ z kiraŭnictvam hatela, bo da jaho zaŭsiody adpraŭlali mienavita Natallu. Jon sprabavaŭ razhavaryć ścipłuju aficyjantku, uśmichaŭsia, žartavaŭ… Zaprasiŭ dziaŭčynu na treniroŭku, potym na viačeru, a dalej jany doŭha hulali pa horadzie.

Pavialičyć

Halina, siastra Natalli, paźniej raskazvała ŭ intervju «Kamsamolskaj praŭdzie»:

— Said — vielmi rašučy mužčyna. Užo praz paru dzion spytaŭ u Natašy, ci nie choča jana pryniać musulmanstva. A nazaŭtra zrabiŭ joj prapanovu.

Šejch navat pajechaŭ u Smalavičy, kab pahavaryć z baćkami kachanaj. Pasprabujcie zaraz ujavić paniku prostaj biełaruskaj siamji, jakaja pačuła navinu, što da ich jedzie pradstaŭnik kirujučaj dynastyi Dubaja. Mama dziaŭčyny — zvyčajnaja miedsiastra — ceły dzień hatavała na kuchni pačastunki.

Said byŭ z cełaj delehacyjaj — supravadžała jaho kala 20 čałaviek, u liku jakich byŭ pierakładčyk i navat kuchar (napeŭna, jon ničoha nie viedaŭ pra biełaruskija tradycyi i haścinnaść). Jak i naležyć žanichu, jon kazaŭ kamplimienty baćkam i nachvalvaŭ pačastunki. Potym zajaviŭ, što choča ažanicca z Natallaj.

Pavialičyć

Sajt oko.by pisaŭ, što maci Natalli Lilija svataŭstvo sustreła ślazami i tolki ŭvieś čas paŭtarała: «Čužaja kraina, čužyja ludzi, palihamija!». Ale siabry i siastra Natalli ŭhavaryli maci, što tak budzie lepš dla dziaŭčyny, paśla čaho prync pryjechaŭ jašče raz.

Siabram i susiedziam Lilija raskazvała, što prync zdaŭsia joj «sumlennym, razumnym, taktoŭnym maładym čałaviekam z cudoŭnaj adukacyjaj». Pavodle jaje słoŭ, bahaćcie Saida nie maje značeńnie, maŭlaŭ, jana nie taki čałaviek, «kab mianiać svaju dačku na niejkija bahaćci». «Ja nie vieru, što Natašy važna, što jon zabiaśpiečany čałaviek. Jana pakachała jaho jak asobu, ja ŭ hetym upeŭniena. Ja baču, što maja dziaŭčynka ščaślivaja. I moj ziać taksama. A heta dla mianie samaje hałoŭnaje», — pryvodziŭ słovy maci Natašy sajt oko.by.

Pavialičyć

Byŭ, kaniečnie, adzin niuans. Said byŭ žanaty i mieŭ ažno piać dziaciej (čatyry syny i dačka). Ale jaho heta nie biantežyła — relihija ž i zakony rodnaj krainy dazvalajuć. Tamu z čystym sumleńniem jon prapanoŭvaŭ biełaruscy rolu druhoj žonki. Natalla adkazała: «Tak!»

Ścipłaje siamiejnaje viasielle praviali ŭ Minsku — šejch vielmi nie chacieŭ, kab navina pra jaho šlub patrapiła ŭ ŚMI chacia b da viartańnia ŭ AAE. Pierad viasiellem Natalla pryniała isłam i źmianiła imia na Aiša. U chutkim časie muž i žonka palacieli spačatku na Kipr (tudy ž śpiecyjalna prylacieła pieršaja žonka Saida, kab paznajomicca), a potym u Dubaj.

Zdajecca, u Biełarusi rašeńnie Natalli vyjści zamuž za šejcha nie ŭchvalili tolki ŭ VNU, jakuju dziaŭčyna kinuła. Vykładčyca Natalli va ŭniviersitecie fizkultury Kaciaryna Łyčkina vykazała zaniepakojenaść losam dziaŭčyny. Jana taksama adznačyła, što dziaŭčyna drenna vučyłasia. Namieśnik dekana fakulteta Alaksiej Hatatulin byŭ jašče bolš kateharyčnym i asudziŭ rašeńnie byłoj studentki: «Miarkujcie sami, što lepš: kinuć zvykłaje žyćcio, relihiju, pakinuć baćkoŭ, kab žyć u raskošy ŭ čužoj krainie ci zastacca ŭ rodnaj krainie, pracavać ź dziećmi i žyć sa svajoj siamjoj?»

Kažuć, na radzimie Saida jaho viasielle stała sapraŭdnaj siensacyjaj. Jano i nie dziŭna: studentka-aficyjantka z horada, pra jaki navat nichto nikoli nie čuŭ u krainie, paradniłasia z kirujučaj dynastyjaj.

U novaj krainie Natalla pačała vučyć anhlijskuju i arabskuju — muž najmaŭ dla jaje najlepšych repietytaraŭ.

Pavialičyć

Pasialiłasia dziaŭčyna va ŭłasnym domie ŭ elitnym rajonie Džumiejra, dzie znachodziacca damy vysokapastaŭlenych asob. Jana atrymała asabistaha kiroŭcu i achoŭnikaŭ.

Uvosień 2007 hoda baćki lotali naviedać dačku. Ich uražańni apisvała «Kamsamolskaja praŭda».

— Ja pieršy raz u žyćci bačyŭ takuju pryhažość — pałac ceły, — radavaŭsia baćka Natalli-Aišy Muślim Alijeŭ. — U Natašy dźvie słužanki, kuchar, sadoŭniki. U dvary paŭliny chodziać, u valjery — kazuli. Hiepard maleńki ŭ domie. Jana ź im, jak z katom, pieścicca! Ciapier jašče prosić muža panteru zavieści.

Pavialičyć

Baćka ŭdakładniŭ, što ŭ raskošnym asabniaku jaho dačka žyvie adna. U AAE pryniata, što zamožny mužčyna doryć kožnaj žoncy asobny dom, a sam žyvie ŭ svaim. Darečy, da siabie cieścia Said taksama zaprasiŭ:

— Jon zaprasiŭ mianie ŭ svoj ihł-chaŭs, tak zvany arliny dom: u im usiudy arły-pryhažuny žyvyja. Tam tolki mužčyny źbirajucca. Pytańni svaje vyrašajuć, u šachmaty hulajuć, u biljard… Jość u jaho śpiecyjalnyja ŭładańni, dzie prachodziać strelbiščy, — tam taksama byŭ. Bačyŭ knihu, bahata ŭpryhožanuju, pra siamju Saida. A fatahrafii jaho baćki pa ŭsim horadzie visiać.

Tata pryznaŭsia, što maładyja prapanoŭvali jamu z žonkaj pierajechać u Dubaj, ale baćki vyrašyli, što im bolš padabajecca zvykłaje žyćcio ŭ Smalavičach.

Raskazaŭ tady ž Muślim Alijeŭ i pra adnosiny dački ź pieršaj žonkaj. Maŭlaŭ, taja pryniała novaja kachańnie muža spakojna. Bo kali zakon u krainie dazvalaje mieć niekalki žonak, to čamu ž ździŭlacca ci aburacca? Dom Suchiemy — pieršaj žonki — znachodziŭsia navat nie pobač z domam biełaruski. Pa słovach baćki, u Natalli byli dobryja adnosiny i sa svajoj papiarednicaj, i ź jaje dziećmi.

Žonki navat abmieńvalisia adna z adnoj padarunkami, razam piakli tarty i arhanizoŭvali sumiesnyja siamiejnyja śviaty, na jakija źbirałasia da 100 haściej.

Pavialičyć

U tym ža 2007 hodzie ŭ Dubaj u adpačynak pajechała i žurnalistka «Kamsamolskaj praŭdy». Jana prapanavała Natalli sustrecca — i taja pahadziłasia. Voś jak apisvali žonku šejcha: «Tonieńkaja, vytančanaja. Čornaja abaja (doŭhaja arabskaja sukienka z rukavami) tolki padkreślivaje jaje dalikatnaść». Na pytańnie, ci nie śpiakotna ŭ takim stroi, žančyna adkazała:

— Ty što! Abai robiać ź vielmi dobraj tkaniny. Kaštujuć jany bolš, čym piarścionak z dyjamientam. Heta tolki zdajecca, što jaje nasić u śpiakotu nievynosna. Vielmi kamfortna apranać abaju i na sukienku, i na džynsy. Chustka, jakaja chavaje tvar całkam, u mianie taksama jość. Ale Said nie patrabuje, kab ja jaje nadziavała.

Zdajecca, Natalla była ŭ ejfaryi ad udałaha šlubu.

— Said časta jeździć na spabornictvy pa ŭsim śviecie, — raspaviadała biełaruska. — Časam patelefanuje mnie: «Ja vielmi zasumavaŭ, prylataj…»

Jana pryznavałasia ŭ kachańni da svajho muža.

Pavialičyć

U vieraśni 2008 hoda Natalla naradziła dačku. Pra naradžeńnie dziciaci ŚMI paviedamiła babula Natalli Jadviha:

— Said vielmi ščaślivy. Ručki-nožki dziciaci całuje.

Dziaŭčynku nazvali Alija, u honar babuli z boku taty. Ščaślivy Said padaryŭ žoncy darahuju mašynu (treciuju ŭ jaje asabistym aŭtaparku) i piarścionak z dyjamientam.

Anhłamoŭnyja ŚMI pisali, što Natalla nie zabyłasia svaich rodnych i dapamahała im hrašyma, kupiła im dom i mašynu.

Ale potym stali źjaŭlacca naviny pra kanflikty ŭ pary. Kazali pra toje, što biełaruska, jakaja ŭsio ž rasła ŭ jeŭrapiejskaj krainie, nie zmahła stać pakorlivaj musulmanskaj žonkaj. Pa čutkach, joj vielmi nie padabałasia toje, što jana nie mahła prymać absalutna nijakich rašeńniaŭ u svaim žyćci. Dachodziła da absurdu: Natalla chacieła mašynu čornaha koleru, a muž kuplaŭ joj biełuju, bo ličyŭ, što ŭ čornaj žoncy budzie nadta horača.

Paru ŭsio radziej bačyli razam. Mabyć, najbolš składanym dla biełaruski staŭ 2015 hod. Tady Said pajechaŭ u Azierbajdžan na spabornictvy pa stralbie i viarnuŭsia adtul z treciaj žonkaj. Joj stała byłaja himnastka Ziejnab Džavadły. U 1999-2012 hadach jana vystupała ŭ składzie zbornaj Azierbajdžana pa mastackaj himnastycy. Adnak praz traŭmu dziaŭčynie pryjšłosia zaviaršyć karjeru ŭ vialikim sporcie i stać trenierkaj. U 2013 hodzie jana adkryła ŭłasnuju škołu himnastyki.

Pavialičyć

Pikantnaści situacyi dadaje toj fakt, što źniešnie Natalla i Ziejnab vielmi padobnyja. Kažuć, što paśla hetaha šlubu adnosiny pamiž Natallaj i Saidam kančatkova sapsavalisia. Užo ŭ nastupnym hodzie Ziejnab naradziła dačku, jakuju nazvali Sanaj. Potym źjavilisia jašče dźvie dziaŭčynki — Asija i Sałama.

Moža, kali ty ŭsio žyćcio žyvieš z dumkaj pra toje, što ŭ tvajho muža moža być niekalki žonak, takija naviny ŭsprymajucca lahčej. Ale naŭrad ci dziaŭčynie, jakaja vyrasła ŭ Biełarusi, było prosta ŭspryniać toj fakt, što ŭ muža źjaŭlajucca dzieci ŭ novym šlubie…

Los Ziejnab nielha nazvać ščaślivym. U 2019 hodzie jana raźviałasia z Saidam i chacieła razam sa svaimi baćkami (jany žyli ź joj u Dubai) i dočkami viarnucca na radzimu, alo joj nie dazvolili heta zrabić.

Pavialičyć

U 2020 hodzie žančyna apublikavała emacyjnaje videa: jana płakała i prasiła dapamohi. Ziejnab śćviardžała, što paśla razvodu jana stała achviaraj fizičnaha i emacyjnaha hvałtu z boku byłoha muža. Na videa taksama demanstravałasia, jak niejkija ludzi zvodziać z domu baćkoŭ byłoj himnastki, i čuvać, jak niechta ź dziaciej kaža: «Vy nie možacie nas zabrać».

U 2022 hodzie BBC paviedamlała, što advakaty Ziejnab padali zapyt u Radu AAN pa pravach čałavieka. Jany chacieli, kab Rada ŭmiašałasia ŭ spravy ŭładaŭ AAE, kab harantavać biaśpieku Ziejnab Džavadły i jaje dzieciam. U zapycie śćviardžałasia, što žančyna sutyknułasia z hvałtam, pieraśledam i zapałochvańniem z boku ŭładaŭ padčas žorstkaj bitvy za apieku z šejcham Saidam bin Maktumam bin Rašydam Al Maktumam.

Pavialičyć

Čym skončyłasia heta historyja, nie paviedamlałasia. Ziejnab vydaliła svaju staronku ŭ instahramie i nie publikuje novych dopisaŭ u tvitary z 2022 hoda.

Što ciapier ź biełaruskaj žonkaj šejcha, taksama dakładna nieviadoma. U ŚMI źjaŭlałasia infarmacyja, što jana, jak i raniej, žyvie va ŭłasnym pałacy na poŭnym utrymańni, ale z mužam nie bačycca.

Pavialičyć

• 52
• 0
• 30
• 88
• 43
• 81
• 110
• 0