Śledčyja znajšli byłuju palitźniavolenuju za miažoj, kab paviedamić joj pra novuju spravu
Byłaja palitźniavolenaja Hanna Višniak raskazała «Radyjo Svaboda», što śledčyja ŭ Biełarusi znajšli jaje za miažoj pa numary, viadomym abmiežavanaj kolkaści ludziej. Žančynie paviedamili pra zaviadzieńnie novaj kryminalnaj spravy suprać jaje i cikavilisia, kali jana płanuje viartacca ŭ Biełaruś.
Hanna Višniak adznačyła, što 26 studzienia jana ad žurnalistaŭ daviedałasia, što na sajcie Hienprakuratury Biełarusi źjaviŭsia artykuł pra zaviadzieńnie novaj kryminalnaj spravy i «ŭ apisańni było pra jaje», a praz try miesiacy joj u miesiendžar Viber napisała śledčaja Kastryčnickaha rajonnaha adździeła Śledčaha kamiteta pa Minsku Viktoryja Lubič.
Śledčaja paviedamiła, što suprać Hanny ŭ Biełarusi zaviali novuju kryminalnuju spravu pavodle č. 1 art. 361-4 KK. Dadała, što joj viadoma, što Hanna znachodzicca za miažoj, i spytałasia, kali taja maje namier viartacca ŭ Biełaruś, bo ź jaje ŭdziełam «nieabchodna pravieści šerah śledčych dziejańniaŭ».
«Minuła 3 miesiacy, i śledčaja napisała ŭ Viber na polski numar, aformleny na pašpart hramadzianina inšaj krainy. Ale pakolki hetym numaram ja karystałasia, ale amal nikomu nie razdavała, realna ŭsie, chto viedaŭ numar, — u śpisie zvankoŭ, i heta mienš za 10 čałaviek… Numar jany ŭziali na dopycie ŭ maci, najvierahodniej», — raskazała Hanna Višniak.
Pavodle Hanny Višniak, śledčyja tady trymali ŭ rukach telefon maci, a nieŭzabavie paśla hetaha Hanna vyjaviła ŭvachod z kampjutara na minskich IR u telehram-akaŭnty svajoj maci (adzin pryviazany da biełaruskaha numara, druhi — da polskaha).
Paśla paviedamleńnia 30 krasavika śledčaja stała telefanavać Hańnie ŭ Viber. Hanna Višniak kaža, što nie viedaje nijakich padrabiaznaściaŭ pra novuju kryminalnuju spravu suprać jaje, bo «nie kamunikuje z pamahatymi złačynnaha režymu Łukašenki» i płanuje naohuł vydalić Viber z telefona.
Hanna Višniak — vałanciorka telehram-kanała «Voditieli 97%». Jaje zatrymali 28 kastryčnika 2020 hoda za «arhanizacyju pratestaŭ», a paślajo asudzili na 2,5 hoda kałonii.
Bolšuju častku prysudžanaha terminu Hanna adbyvała ŭ Homielskaj žanočaj kałonii № 4. Pałovu času jana praviała ŭ ŠIZA i pres-atradzie, mieła 16 spahnańniaŭ. Vyjšła na volu, adbyŭšy poŭny termin, paźniej vyjechała za miažu.
«Heta doktar ad Boha». Za palityku sudziać dziciačaha ankołaha z 23-hadovym stažam2
Kamientary