U Nacyjanalnaj biblijatecy idzie vystava staradrukaŭ Doma Mamoničaŭ
Z 3 červienia ŭ muziei knihi idzie vystava, prymierkavanaja da 450-hodździa z pačatku dziejnaści drukarni Mamoničaŭ — adnaho z samych admietnych biełaruskich vydavieckich centraŭ XVI — pačatku XVIII stahodździaŭ.
Na vystavie pradstaŭleny staradruki Doma Mamoničaŭ kanca XVI — pačatku XVIII st. z fondaŭ Nacyjanalnaj biblijateki Biełarusi. Siarod ekspanataŭ — pieršaje vydańnie typahrafii, sapraŭdny šedeŭr knihadrukavańnia XVI st. — Jevanhielle (1575), nadrukavanaje Piatrom Mścisłaŭcam, Psałtyr (1576), bolš viadomy jak «Psałtyr z čyrvonymi kropkami», Apostał (1595), Jevanhielle (bieź sihnatur) (1600), a taksama takija vydańni pačatku XVII st., jak Tryjodź kvietnaja (1609), pieravydańnie Statuta Vialikaha Kniastva Litoŭskaha (1619) i Trybunał (1623).
«Dom Mamoničaŭ» — najbujniejšaja pryvatnaja drukarnia, što praisnavała amal paŭstahodździa i stała druhoj paśla typahrafii Francyska Skaryny, arhanizavanaj u stalicy Vialikaha Kniastva Litoŭskaha — Vilni. Braty Mamoničy damahlisia aficyjnaha pryznańnia, trojčy atrymlivali karaleŭskija pryvilei na prava vypusku carkoŭna-relihijnych, śvieckich i jurydyčnych vydańniaŭ. Jany pieršymi ŭ biełaruskim knihadrukavańni pačali vypuskać zborniki zakanadaŭčych aktaŭ, vydańni pravavoha charaktaru.
Drukarnia ŭličvała zapatrabavańni i kulturnyja tradycyi roznych płastoŭ nasielnictva. Bolšaja častka vydańniaŭ XVI st. pryznačałasia na patreby pravasłaŭnych bractvaŭ, ich škoł, carkvy, miaščanstva.
Ekspazicyja budzie pracavać u muziei knihi pa 30 červienia 2024 h.
Data zaviaršeńnia ekspanavańnia moža być źmieniena.
Uvachod — pa čytackim bilecie abo bilecie sacyjakulturnaha centra.
Čas pracy vystavy adpaviadaje režymu raboty muzieja knihi.
Piać faktaŭ pra Natallu Piatkievič — samuju ŭpłyvovuju čynoŭnicu Biełarusi da źjaŭleńnia Kačanavaj i Ejsmant24
Kamientary