Duchoŭnik Łukašenki, jaki žyvie napoŭnicu. Što viadoma pra dom, kvatery i mašyny ajca Fiodara Poŭnaha
Protaijerej Fiodar Poŭny — asoba viadomaja nie tolki siarod pravasłaŭnych. Taksama maje asabistyja suviazi z Łukašenkam, padtrymlivaje jaho, a toj akazvaje zastupnictva BPC. «Lusterka» razam z kamandaj «Biełpoła» pravieryła, jakoj nieruchomaściu vałodała siamja śviatara i na jakich aŭto jeździła (źviestki na siaredzinu 2021 hoda).
Uradžencu vioski Sialec Homielskaj vobłaści Fiodaru Poŭnamu 20 červienia spoŭnicca 65 hadoŭ. Siońnia jon protaijerej (staršy śviatar) va Usichśviackaj carkvie ŭ Minsku, jaki ŭ carkvu pryjšoŭ nie adrazu. Spačatku advučyŭsia na dyzajniera ŭ staličnym Teatralna-mastackim instytucie (siońnia heta Akademija mastactvaŭ) i adsłužyŭ u vojsku. Potym pastupiŭ u Maskoŭskuju duchoŭnuju akademiju, skončyŭ jaje ŭ 1986 h. i byŭ paśviečany ŭ san śviatara.
Paźniej Fiodar Poŭny byŭ asabistym sakratarom minskaha mitrapalita Fiłareta ŭ adździele zamiežnych carkoŭnych suviaziaŭ RPC. A praź niekalki miesiacaŭ słužby 27-hadovaha Poŭnaha nakiravali ŭ Hiermaniju, dzie byŭ pravasłaŭny prychod. Tudy jon pajechaŭ sa svajoj žonkaj Alenaj, dačkoj śviatara Iaana Charaševiča. U 1987 hodzie ŭ Lejpcyhu ŭ muža i žonki naradziłasia dačka. Praz vosiem hadoŭ siamja viarnułasia ŭ Biełaruś.
— Viadoma, ja moh zastacca ŭ Hiermanii, dzie ŭ mianie byli dvuchpaviarchovaja kvatera ŭ centry Lejpcyha, zvańnie hanarovaha hramadzianina, naładžany pobyt, spakojnaja praca i ŭsio dla ščaścia ŭ miaščanskim jaho razumieńni, — raspaviadaŭ Fiodar Poŭny.
Zrešty, paśla viartańnia ŭ Biełaruś Poŭny žyŭ vidavočna nie horš, čym u Hiermanii, bo jon uznačaliŭ adździeł zamiežnych suviaziaŭ BPC i zaniaŭsia biznes-prajektami. Pry padtrymcy humanitarnaj dapamohi z-za miažy byŭ pabudavany Dom miłasernaści, jaki na spravie źjaŭlajecca pryvatnym miedycynskim centram z rynkavymi koštami. Tam taksama źjaviŭsia nievialiki hatel «Mitrapalickaja haścioŭnia». Dom miłasernaści adnosicca da minskaha prychoda ŭ honar Usich Śviatych, jakim kiruje Fiodar Poŭny.
Fiodar Poŭny ŭvachodzić u koła blizkich ludziej Alaksandra Łukašenki. Jaho navat nazyvajuć duchoŭnikam palityka. Kali pačałasia vajna va Ukrainie, protaijerej staŭ na bok Rasii i apraŭdaŭ raźviazvańnie poŭnamaštabnaj vajny suprać Ukrainy.
Tak, u intervju haziecie «Źviazda» jon kazaŭ, što treba dziakavać Rasii i Alaksandru Łukašenku za abaronu ad kul. Taksama jon staŭ vielmi publičnym čałaviekam — časta vystupaje ŭ ŚMI pa roznych pytańniach, viadzie pieradaču «Niadzielnaje kazańnie» na ANT.
Alaksandr Łukašenka i jaho atačeńnie akazvaje BPC zastupnictva. Naprykład, pomniki kultury, jakija naležać pravasłaŭnaj carkvie, restaŭrujucca za biudžetnyja srodki (a da prac navat pryciahvajuć členaŭ BRSM). Dziaržava dapuskaje BPC u śfieru adukacyi — tak, carkvie dazvalajecca pryciahvać da svaich mierapryjemstvaŭ školnikaŭ, jana taksama raspracavała padručnik dla novaha fakultatyva «Asnovy duchoŭna-maralnaha vychavańnia i patryjatyzmu».
Jość i bolš materyjalnyja lhoty — BPC vyzvalena ad vypłaty padatku na nieruchomaść i ziamielnaha padatku, jość prefierencyi pa PDV u ramkach relihijnaj dziejnaści (praviadzieńnie abradaŭ, realizacyja litaratury i hetak dalej). Budaŭnictva i raźvićcio pravasłaŭnych chramaŭ niaredka finansujecca biełaruskimi biznesoŭcami, jakich nazyvajuć nabližanymi da ŭłady.
Čym zajmalisia členy siamji ajca Fiodara
Žonka — 61-hadovaja Alena Charaševič, jana žurnalist, raniej pracavała redaktaram na Biełaruskim telebačańni, taksama žančyna — člen Sajuza piśmieńnikaŭ Biełarusi i łaŭreat premii «Za duchoŭnaje adradžeńnie». Pavodle źviestak «Biełpoła», žonka ajca Fiodara była zasnavalnikam kampanii «Chryzma», jakaja zajmałasia roźničnym i aptovym handlem hadzińnikami i juvielirnymi ŭpryhožvańniami. Pavodle źviestak Adzinaha dziaržaŭnaha rejestra, sałon isnavaŭ šeść hadoŭ, u 2021 hodzie jon byŭ likvidavany.
Adzinaj dačce muža i žonki, Alenie Poŭnaj, ciapier 36 hadoŭ. Paśla zakančeńnia škoły jana advučyłasia ŭ Minskim linhvistyčnym univiersitecie. Pracavała ŭ pradstaŭnictvie aŭstryjskaj kampanii Vamed Engineering GmbH & CO KG u Biełarusi, hetaja firma zajmajecca abstalavańniem dla miedycynskich ustanoŭ. Pa źviestkach na siaredzinu 2021 hoda, Alena nie była zamužam, dziaciej u jaje nie było.
Na traich — try kvatery i dom Fiodar Poŭny atrymaŭ učastak pad katedž u Drazdach, jon raźmieščany na vulicy Račnoj, pad numaram 8. Ciapier tam užo pabudavany dvuchpaviarchovy kamienny dom z padvałam i terasaj.
Budynak byŭ zarehistravany ŭ 2009 hodzie, tam prapisany sam ajciec Fiodar, a taksama jaho žonka Alena Charaševič. Ahulnaja płošča doma — 226,6 m2, žyłyja pamiaškańni zajmajuć krychu bolš za 160 «kvadrataŭ».
U intervju Tut.by u 2019 hodzie ajciec Fiodar adznačaŭ, što na momant atrymańnia ŭčastka na budaŭnictva doma jon nie braŭ «ni kapiejki ni z prychodu, ni ŭ doŭh ad kahości». «Naša Niva» raniej pisała, što protaijerej kazaŭ, što na ŭźviadzieńnie doma «braŭ kredyt i vypłačvaŭ jaho, sam budavaŭ, sam dahladaŭ sad». «Nie tak užo i biaspłatna jon byŭ mnie dadzieny», — kazaŭ Poŭny pra svoj dom.
Darečy, u vieraśni 2020 hoda nieviadomy čałaviek zalez na terytoryju prydamavoj terytoryi ajca Fiodara i padpaliŭ ścieny i dach letniaha haściavoha domika. Pryčynienaja škoda skłała nie mienš za 3000 rubloŭ. Była zaviedzienaja kryminalnaja sprava, dzie Fiodar Poŭny prachodziŭ paciarpiełym. Adnak taho, chto ździejśniŭ hety ŭčynak, tak i nie znajšli, rasśledavańnie spravy było prypyniena.
U siamji Poŭnaha taksama było niekalki kvater u domie № 8 pa vulicy Staražoŭskaj, jon raźmieščany prosta na bierazie Śvisłačy. Pobač znachodzicca znakamity «Dom Čyža», u piešaj dastupnaści Trajeckaje pradmieście.
Tak, na Poŭnaha ŭ domie na vulicy Staražoŭskaj zarehistravanaja adnapakajovaja kvatera płoščaj 35,3 m2. Žyllo pierajšło da jaho pa damovie dareńnia ŭ 2012 hodzie. Pobač z hetaj adnapakajovaj znachodzicca čatyrochpakajovaja kvatera, ułaśnicaj jakoj źjaŭlajecca dačka. Žyllo zajmaje ahulnuju płošču 77,5 m2, žyłaja płošča składaje 50,2 m2.
Treciaja kvatera ŭ domie № 8 na Staražoŭskaj znachodziłasia ŭ ahulnaj dolevaj ułasnaści Aleny Charaševič, žonki ajca Fiodara, a taksama jaje maci — Charaševič Maryi 1940 hoda naradžeńnia (žančyna była tam prapisanaja). Heta žyllo składajecca z troch pakojaŭ, jaho ahulnaja płošča — 64,3 m2.
Kolki kaštuje majomaść siamji Poŭnaha, skazać ciažka. Ale ciapier u domie № 8 na Staražoŭskaj pradajecca niekalki roznych kvater, i ŭjaŭleńnie ab košcie možna prykinuć, aryjentujučysia na ich košt. Tak, samaja tannaja kvatera ŭ hetym domie — dvuška ahulnaj płoščaj krychu bolš za 50 m2, jaje pradajuć za 365 439 rubloŭ, abo 114 900 dalaraŭ. Samaja darahaja kvatera — šaścipakajovaja ahulnaj płoščaj 211,1 m2, košt składaje 1 304 005 rubloŭ, abo 410 000 dalaraŭ.
Za žonkaj protaijereja jašče ličyŭsia haraž z padvałam, płošča — amal 40 «kvadrataŭ». Jon raźmieščany ŭ haražna-budaŭničym kaapieratyvie «Sokał centr», na vulicy Navavilenskaj, 42.
A što z aŭtamabilami?
U 2019 hodzie Poŭny ŭ tym ža intervju TUT.BY paviedamlaŭ, što ŭ jaho byŭ Volvo.
— Ja nikoli navat na ržavym Mercedes nie jeździŭ, tamu ja razumieju, što, kali siadu na Mercedes, navat na stary, usie skažuć: «pahladzicie, jon na Mercedes» — i navat nie zhadajuć, što ržavy, — kazaŭ śviatar.
Adnak potym situacyja źmianiłasia, vyśvietliłasia, što ŭ 2021 hodzie baciuška jeździŭ na Lexus RX350 2015 hoda vypusku.
Žurnalisty nie viedajuć techničnych charaktarystyk aŭto, jakim vałodaŭ śviatar, ale kali ŭličvać tolki hod vypusku, to takuju madel ciapier pradajuć za 108 256 rubloŭ, abo 33 900 dalaraŭ. Jość varyjant tańniej — za 78,1 tysiačy rubloŭ, abo 24 450 dalaraŭ.
U jaho žonki byŭ Volvo XC60 2016 hoda vypusku. Siońnia košt madeli z takim hodam naradžeńnia pačynajecca ad 71,7 tysiačy rubloŭ (22 449 dalaraŭ) da 86,1 tysiačy rubloŭ (26 950 dalaraŭ).
Dačka Alena Poŭnaja katałasia na Mercedes-Benz GLA 250 2015 hoda vypusku, heta aŭto było nabyta za 1 800 000 rubloŭ.
Časam siamja ajca Fiodara hrebuje PDR, čaściej za ŭsio pry kiravańni aŭto jany parušali ŭstalavanuju chutkaść ruchu. Ale kali za śviatarom i jaho dačkoj ličylisia čatyry i vosiem pravaparušeńniaŭ pa linii DAI adpaviedna, to za žonkaj Alenaj — 27.
Karespandentka «Lusterka» jak prychadžanka pravasłaŭnaj carkvy patelefanavała ajcu Fiodaru i spytała ŭ jaho, «ci nie hrešna mieć stolki kvater i darahich mašyn u toj čas, kali ŭ krainie stolki biednych ludziej i im patrebna dapamoha». Taksama jana ŭdakładniła, jak brać prykład sa śviatara i jaho blizkich, kali jany raz-poraz parušajuć PDR.
— Što parušaju? Nie viedaju, pieršy raz čuju, što ja niešta parušaŭ. A pra jakija mašyny vy kažacie? — udakładniŭ ajciec Fiodar.
Žurnalistka pieraličyła madeli aŭto, pra jakija napisana vyšej, protaijerej skazanaha ździviŭsia.
— U mianie mašyn nijakich niama. Ja takoj mašyny (Lexus RX350.) nie viedaju, u mianie takoj niama. Vybačajcie, kali łaska, — adkazaŭ śviatar i pakłaŭ słuchaŭku.
Andrej Dźmitryjeŭ źjeździŭ u Bundestah, kab davieści nieabchodnaść udziełu Łukašenki ŭ mirnych pieramovach11
Kamientary