Chto pieramoža, Kitaj ci ZŠA? Intryha na paryžskaj Alimpijadzie zachavałasia da apošniaha dnia

Pa załatych miedalach pakul napieradzie Kitaj — z 90 miedaloŭ u ich 39 załatych, 27 srebranych i 24 bronzavyja. U ZŠA miedaloŭ našmat bolš, ažno 122. Adnak ź ich tolki 38 załatyja i pa 42 srebranych i bronzavych. A ŭ ahulnym zaliku, tak užo tradycyjna viadziecca, spraviadliva ci nie, ale značeńnie majuć pieradusim załatyja ŭznaharody.

Pavialičyć

Takim čynam, kab amierykancam taki apiaredzić kitajcaŭ nie tolki pa ahulnaj kolkaści, ale i pa jakaści ŭznaharod, im patrebna zavajavać tolki adno zołata pry ŭmovie, što Kitaj bolš nie pieramoža nidzie. Ci zdabyć lubuju inšuju kolkaść załatych miedaloŭ, aby tolki choć na adzin bolš, čym zavajujuć u hety dzień kitajcy.

Nakolki heta vierahodna, uličvajučy tyja dyscypliny, miedali pa jakich zastałosia razyhrać u niadzielu?

U apošni dzień Alimpijady pierad jaje viačernim uračystym zakryćciom zastajucca nierazyhranymi 13 kamplektaŭ uznaharod: 4 u hulniavych vidach, pa 3 u baraćbie i rovarnym sporcie, pa 1 — u lohkaj i ciažkoj atletycy, a taksama sučasnym piaciborji.

Čatyry kamplekty miedaloŭ buduć razyhryvacca ŭ hulniavych vidach sportu: mužčynskich handbole i vodnym poła, a taksama žanočych baskietbole dy valejbole. U mužčynskich finalnych razborkach ni amierykancaŭ, ni kitajcaŭ nie budzie, adpaviedna, u hetym płanie vyniki tych matčaŭ ni na što nie paŭpłyvajuć.

A voś u abodvuch žanočych vidach kitajanak u finale taksama niama, ale jość amierykanki: u baskietbole jany buduć zmahacca za zołata z haspadyniami-francužankami, a ŭ valejbole — ź italjankami.

Prytym u žanočym baskietbole zbornaja ZŠA — biassprečny suśvietny lidar, na Alimpijskich hulniach jana apošni raz sastupiła pieršynstva ŭ dalokaj Barsiełonie-1992 abjadnanaj kamandzie byłych respublik SSSR, a paśla taho zapar vyjhrała siem turniraŭ. Upeŭnienaja hulnia amierykanskich baskietbalistak na paryžskich Hulniach robić całkam vierahodnym, što biasprojhryšnaja sieryja praciahniecca i hetym razam.

Što tyčycca valejbołu, to italjanki tam vystupali pa chodzie turniru bolš upeŭniena, ale ŭ amierykanak realnyja šancy na zołata jość taksama.

U samaj ciažkaj vahavoj katehoryi ŭ žanočaj ciažkaj atletycy siarod dvanaccaci ŭdzielnic finału buduć kitajanka Li Veńveń i amierykanka Mery Tejsen-Łapen.

Favarytka tut — bolš tytułavanaja 24-hadovaja kitajanka, pieramožca minułaj Alimpijady i ŭładalnica dziejnaha suśvietnaha rekordu. Amierykanka taksama mocnaja i moža pretendavać na traplańnie ŭ pryziorki, ale zołata jana zdabudzie naŭrad ci.

U rovarnym sporcie ŭ žanočym omniŭmie startujuć amierykanka Dženifier Valente i kitajanka Lu Cziali. Ale vahavyja katehoryi ŭ ich jaŭna niaroŭnyja:

kali Valente — niesumnienna siarod lidaraŭ dyscypliny, jana pieramožca Alimpijady-2000 i dvuch apošnich čempijanataŭ śvietu, to kitajanka na suśvietnym uzroŭni nikoli ničoha nie dabivałasia: najvyšejšyja pakul jaje dasiahnieńni — miedali na Azijackich hulniach.

U inšych dźviuch rovarnych dyscyplinach, miedali pa jakich jašče nie razyhranyja — žanočym spryncie i mužčynskim kiejrynie, — amierykanska-kitajskaje supiernictva nieaktualnaje, bo pradstaŭniki ZŠA i Kitaja tam kali ad pačatku i byli, to ŭžo vybyli z baraćby.

Dva kamplekty miedaloŭ zastałosia razyhrać u volnaj baraćbie ŭ mužčyn i adzin — u žanočaj baraćbie. Finalisty, jakija sustrenucca ŭ pajadynkach za zołata, usiudy ŭžo viadomyja, i ŭ abiedźviuch mužčynskich katehoryjach siarod ich niama ni amierykancaŭ, ni kitajcaŭ.

A voś u žanočaj baraćbie ŭ najciažejšaj vahavaj katehoryi da 76 kh budzie zmahacca 20-hadovaja amierykanka Kienedzi Błejds suprać 22-hadovaj japonki Kahami Juka. Favarytka tam, zdajecca, japonka, ale ŭ amierykanki šancy jość taksama.

Ź lohkaatletyčnaj prahramy zastajecca razyhrać miedali tolki na samaj doŭhaj dystancyi ŭ žančyn — marafonskim biehu. Tut pabiahuć pa try amierykanki i kitajanki i tearetyčna moža tak stacca, što chtości ź ich zavajuje alimpijskaje zołata. Na praktycy vierahodnaść hetaha nie vielmi vysokaja: zvyčajna rej na dystancyi viaduć afrykanki z Kienii i Efiopii. Tym nie mienš, akurat hetaja dystancyja jak nijakaja inšaja moža prynosić siurpryzy, tamu možna skazać, što šancy tut niešta zdabyć i ŭ Kitaja, i ŭ ZŠA jość. Prynamsi, na minułaj Alimpijadzie ŭ Tokia amierykanka Moli Sajdł zaniała treciaje miesca adrazu za dźviuma kienijkami, zusim niedaloka ad ich adstaŭšy. Ale tut treba zołata, a jaho kienijki i efiopki na top-spabornictvach sastupajuć redka.

Urešcie buduć razyhranyja jašče miedali ŭ indyvidualnym žanočym sučasnym piaciborji. Amierykanki tam uvohule siarod udzielnic niama, a kitajanka jość, ale jana na miedali, a tym bolš na załaty, užo nie pretenduje.

Tamu vyhladaje tak, što šancaŭ na ahulnuju pieramohu na hetaj Alimpijadzie pa ŭsich pakazčykach u amierykancaŭ usio ž bolš. Prytym čysta vypadkova paśjans skłaŭsia tak, što vyrašacca kančatkovy vynik zmahańnia hrandaŭ budzie ŭ spabornictvach tolki i vyklučna žančyn.

U ZŠA na niadzielu jość adno amal harantavanaje (žanočaje baskietbolnaje) zołata i dobryja šancy zavajavać jašče try (u žanočych valejbole, rovarnym sporcie i baraćbie). Kitajcam ža pa sutnaści zastajecca realna spadziavacca ŭsiaho tolki na adno dadatkovaje zołata ŭ žanočaj ciažkoj atletycy, plus na cud žanočym marafonie. Nu i, viadoma, na toje, što ad ichnich viečnych sapiernikaŭ udača ŭ apošni dzień advierniecca prosta katastrafična. U sporcie byvaje i takoje.

Uvohule ž Kitaju dahetul udavałasia abyści amierykancaŭ na Alimpijskich hulniach pa załatych miedalach tolki adnojčy — na chatniaj Alimpijadzie-2008 u Piekinie. Tady ŭ kitajcaŭ było roŭna 100 miedaloŭ (48+22+30) suprać 112 (36+39+37) u amierykancaŭ.

U 2012-m u Łondanie ŭ ZŠA było 103 (46+28+29), u Kitaja — 91 (38+31+22).

U 2016-m u Rya-de-Žanejra amierykancy vystupili jašče lepiej, uziaŭšy 121 miedal (46+37+38), a voś kitajcy z 70 miedalami (26+18+26) pravalilisia, prapuściŭšy napierad jašče i Vialikabrytaniju: 67 (27+23+17).

A voś na papiaredniaj Alimpijadzie-2020 (realna prachodziła ŭ 2021-m) u Tokia situacyja była padobnaja da ciapierašniaj, usio vyrašyŭ tolki adzin załaty miedal. Amierykancy tam atrymali 113 miedaloŭ (39+41+33), a kitajcy — 88 (38+32+18). 

• 3
• 0
• 0
• 0
• 0
• 0
• 0
• 0