Bolš za ŭsich zachvalavalisia prapahanda i aficyjoz Rasii, jakija aścierahajucca pierachodu Telegram pad kantrol Jeŭrasajuza. A łukašysty prapanavali vyzvalić Durava šlacham abmienu, choć jašče niadaŭna pahražali tamu pakajannym videa.
Stvaralnika Telegram Paŭła Durava zatrymali ŭ Francyi, kali toj prylacieŭ u Paryž z Azierbajdžana na svaim pryvatnym samalocie.
Jak tłumačać francuzskija miedyja, pryčyna zatrymańnia ŭ tym, što Duraŭ nie supracoŭničaŭ z pravaachoŭnymi orhanami Francyi pry rasśledavańni złačynstvaŭ, źviazanych z vykarystańniem Telegram, a ŭ samim miesiendžary niama maderacyi. Heta ŭ vačach francuzskich pravaachoŭnikaŭ robić miljardera saŭdzielnikam teraryzmu, handlu narkotykami, złačynstvaŭ, źviazanych ź piedafilijaj, i machlarstva.
Heta padzieja imhnienna stała kamientavacca paŭsiul, asabliva ŭ Rasii i Biełarusi. Prapahandysty pišuć, što aryšt Durava abiacaje vielizarnyja niepryjemnaści Kramlu i jaho sajuźnikam.
«Jaho treba vyzvalać, navat kali francuzy suprać. Strata telehrama dla nas niedapuščalnaja»
Navina pra aryšt Paŭła Durava vyklikała nieadkładnuju i niehatyŭnuju reakcyju ledź nie ŭsiaho Z-siehmientu, dziaržprapahandy i ŭładaŭ Rasii. I heta niahledziačy na noč i ŭsiu minułuju krytyku Kramla ŭ adras Durava za jaho niazhodu supracoŭničać z rasijskimi śpiecsłužbami.
Adnoj ź pieršych zabiła tryvohu Dziaržduma Rasii, jakaja źviarnułasia ŭ MZS krainy, kab tyja spryjali nieadkładnamu vyzvaleńniu Durava z-pad varty ŭ Francyi. Durava prapanavali viarnuć u Rasiju «lubymi vysiłkami».
«Ciapier jaho treba vyciahvać. MZS Rasii pavinna vystupić z zaklikam da francuzskich uład vyzvalić Paŭła Durava z pad varty. Jaho aryšt moža mieć pad saboj palityčnyja padstavy i być nahodaj dla atrymańnia dostupu da asabistaj infarmacyi karystalnikaŭ Telegram. Hetaha dapuścić nielha.
Pry admovie francuzskich uładaŭ vyzvalić z pad varty Paŭła Durava prapanuju prykłaści ŭsie vysiłki dla jaho pieramiaščeńnia na terytoryju AAE ci Rasijskaj Fiederacyi. Pry zhodzie Paŭła, viadoma», — napisaŭ vice-śpikier Dziarždumy Uładzisłaŭ Davankoŭ praz hadzinu paśla zatrymańnia Durava.
Na fonie hetaha aficyjnaja pradstaŭnica rasijskaha MZS Maryja Zacharava paviedamiła, što adrazu ŭmiašałasia ŭ situacyju z aryštam pradprymalnika i źviarnułasia da zachodnich struktur z pytańniem, «ci buduć tyja patrabavać vyzvaleńnia Durava».
Nie skupilisia na kamientary prapahandysty i vajenkary. Ich ahulnaja reakcyja na padzieju — vielmi niehatyŭnaja, bo jany, jak i Dziaržduma RF, aścierahajucca pieradačy Telegram pad poŭny kantrol Jeŭrasajuza, što, na ich dumku, stavić pad udar usie kanfidencyjnyja pierapiski rasijskich vajskoŭcaŭ, dla jakich Telegram staŭ asnoŭnym srodkam suviazi.
Niekatoryja Z-kanały spadziajucca, što Paŭła Durava ŭdasca abmianiać.
Viadomaja prapahandystka Kaciaryna Mizulina ŭ svaju čarhu vykazała ŭpeŭnienaść, što aryšt Durava byŭ arhanizavany ZŠA, kab pieraškodzić rasijskim biznesmienam abychodzić sankcyi praz TON — aficyjnuju kryptavalutu Telegram.
A prarasijski kałabaracyjanist z Ukrainy Aleh Caroŭ i žurnalistka Ksienija Sabčak ździvilisia, što ŭsie prapahandysty, niahledziačy na minułuju krytyku ŭ adras Durava, ciapier adzinyja ŭ svaim namiery paškadavać ci abaranić pradprymalnika.
Łukašysty: Abmien Durava — najlepšy krok
Bolšaść prapahandystaŭ režymu Łukašenki praspali navinu pra zatrymańnie Durava, ale niekatoryja ŭsio ž adreahavali na padzieju sinchronna z rasijanami.
Tak, aryjentavany na Rasiju kanał «Biełorusskij siłovik», jaki ŭ sakaviku 2022 hoda hraziŭ Paŭłu Duravu «pakajannym videa kala dźviarej» za błakavańnie čałaviekanienaviśnicikich kanałaŭ HUBAZiKa, padtrymaŭ rasijski naratyŭ pra mahčymaść abmienu Durava, nazvaŭšy heta «najlepšym i vielmi krutym krokam».
Asobna kanał źviarnuŭ uvahu na toj fakt, što Rasija i Biełaruś vykarystoŭvaje Telegram u vajennych metach i pairanizavaŭ nad tym, nakolki važny hety miesiendžar dla abiedźviuch krain.
U toj ža čas prapahandyst Ryhor Azaronak vystupiŭ kateharyčna suprać lubych abmienaŭ i pačaŭ złaradničać z aryštu pradprymalnika.
Ale heta nie pieraškodziła jamu nieŭzabavie zapościć fatahrafiju nastupnaha źmiestu.
Chvalu złaradnaści praciahnuŭ prapahandyst Alaksandr Špakoŭski, jaki paraŭnaŭ emihracyju Durava z Rasii ź pierajezdam pa palityčnych matyvach ź Biełarusi žurnalista Paŭła Šaramieta.
Paraŭnoŭvajučy vypadki Durava i Šaramieta, łukašenkaŭski prapahandyst paraiŭ «nie pakidać svajoj radzimy, bo jaje nie abirajuć».
A jak adreahavali na Zachadzie?
Aficyjnyja asoby krain Zachadu, jak i ŭłady Francyi, na momant nočy nie kamientavali aryšt Paŭła Durava.
Ź viadomych asob padzieju paśpieli prakamientavać miljarder Iłan Mask i žurnalist Takier Karłsan. Abodva asudzili zatrymańnie pradprymalnika i pradrakali Zachadu z-za hetaha «ciomnuju budučyniu».
Viadomy žurnalist-rasśledavalnik Chrysta Hrozieŭ napisaŭ, što padtrymlivaje dziejańni francuzskich uładaŭ u dačynieńni da Paŭła Durava, arhumientavaŭšy heta tym, što navat niesupracoŭnictva z rasijskimi śpiecsłužbami nie admianiaje patrabavańnia maderavać kantent, ačyščać jaho ad prapahandy ahresii, fejkaŭ, zaklikaŭ da teraryzmu i inš.
Hety punkt hledžańnia padzialiŭ rasijskuju apazicyjnuju supolnaść na Zachadzie.
Adny ličać, što aryštoŭvać Durava — niapravilna, bo heta «palityčny pieraśled», «ataka na svabodu słova i hramadzianskuju supolnaść Rasii», jakaja «vyhadnaja tolki Pucinu», jaki daŭno chacieŭ zabłakavać Telegram z-za jaho niepadparadkavańnia rasijskim śpiecsłužbam.
Druhija ličać, što Telegram ciapier staŭ adnym z asnoŭnych instrumientaŭ Kramla dla prapahandy i ŭpłyvu jak unutry, tak i za miežami Rasii, i «što Duraŭ padazrona z hetym nijak nie zmahajecca».
Ci prydatny Telegram dla nasamreč biaśpiečnych kamunikacyj? Ekśpiert pa ličbavaj biaśpiecy tłumačyć, čamu jahony adkaz — nie
«Bł*darusy — nacyja zdradnikaŭ i parazitaŭ». Z-kanały ŭ šalenstvie ad rašeńnia Łukašenki advieści vojski ad Ukrainy
«Sa mnoj usio prosta i biaspłatna». Adšukali biełarusaŭ, jakija, jak Duraŭ, chočuć dzialicca śpiermaj i pakidać šmat naščadkaŭ
Što čakaje Biełaruś u bližejšyja piać hadoŭ? A Rasiju i Jeŭropu? Śpiecdakładčyk AAN pa Biełarusi daje svoj raskład5
Kamientary
Miž tym, ni słova pra reakcyju zachodnich upłyvovych ludziej kštałtu Maska
#freedurov