Jeŭrasajuz naraściŭ vypusk snaradaŭ bolš čym u dva razy. Ukrainie budzie palohka
Da kanca hoda vypusk Jeŭrasajuzam 155-mm artyleryjskich snaradaŭ maje vyjści na ŭzrovień 1,4 miljona za hod.
Vystupajučy 17 vieraśnia na plenarnym pasiadžeńni Jeŭraparłamienta, pryśviečanym finansavaj i vajskovaj dapamozie Ukrainie, namieśnik staršyni Jeŭrapiejskaj kamisii Vałdzis Dambroŭskis zajaviŭ, što krainy ES pracujuć nad vykanańniem svajoj sumiesnaj inicyjatyvy pa pastaŭcy adnaho miljona 155-mm artyleryjskich snaradaŭ u hod Ukrainie. Na hety momant vykanana pryblizna 70% abiacanaha.
Jak adznačyŭ Dambroŭskis, pryniaćcie zakona ab nakiravańni 500 miljonaŭ jeŭra na pašyreńnie vytvorčaści bojeprypasaŭ prynosić svaje vyniki. Čakajecca, što da kanca 2024 hoda vytvorčyja mahutnaści krain-členaŭ ES dasiahnuć nie mienš za 1,4 miljona snaradaŭ za hod.
Namieśnik staršyni Jeŭrakamisii adznačyŭ, što namahańni pa pavieličeńni vytvorčaści bojeprypasaŭ i ŭmacavańni jeŭrapiejskaha abaronnaha pramysłovaha patencyjału źjaŭlajucca važnymi dla zabieśpiačeńnia praciahłaj dapamohi Ukrainie, a taksama dla papaŭnieńnia zapasaŭ dziaržaŭ-členaŭ.
Varta adznačyć, što Ministerstva abarony Estonii ŭ kancy 2023 hoda aceńvała mahutnaści jeŭrapiejskich vytvorcaŭ prykładna ŭ 600 tysiač snaradaŭ u hod. Niamiecki vytvorca Rheinmetall u pačatku 2024 hoda aceńvaŭ mahutnaści ŭsich zachodniejeŭrapiejskich vytvorcaŭ zbroi prykładna ŭ 550 tysiač snaradaŭ u hod.
Vynikaje, što da kanca hoda vytvorčaść pavinna vyraści bolš čym u dva razy. Heta istotna pavialičyć zabieśpiačeńnie Ukrainy hetym vidam zbroi.
Jak nie raz paviedamlałasia, Ukraina zajaŭlała, što joj nieabchodna prykładna 200 tysiač 155-mm artyleryjskich snaradaŭ na miesiac. Častku z hetaha abjomu jana zakuplaje samastojna.
Vialikaja hutarka z Alinaj Koŭšyk — pra intervju z Padsasonnym, skandał z Kulejem i reformy na «Biełsacie»15
Kamientary