Ci adčuvajuć biełarusy rost dachodaŭ, pra jaki śviedčyć statystyka? Pahutaryli z pradstaŭnikami roznych prafiesij
Zhodna z aficyjnymi źviestkami, realnyja dachody nasielnictva za pieršaje paŭhodździe 2024 hoda vyraśli amal na 10%. Pra rost dachodaŭ kažuć i niezaležnyja ekanamisty. «Naša Niva» raspytała biełarusaŭ, jakija pracujuć u roznych śfierach, ci adčuvajuć jany pieramieny na sabie.
Hazavik
Ofisny supracoŭnik z abłasnoha centra, jaki pracuje ŭ abłhazie, kaža, što nie adčuvaje rost zarobkaŭ.
«Staŭka sapraŭdy raście, ale paralelna z hetym skaračajucca inšyja sumy vypłat, tamu vynikovaja ličba nie źmianiajecca. Prosta adbyvajecca peŭnaja hulnia ličbaŭ. Zarpłaty nibyta pavysili, a pa fakcie mała što źmianiłasia», — kaža mužčyna, jaki atrymlivaje 1400 rubloŭ na ruki.
Pa jaho słovach, kali ŭličyć usie dadatkovyja vypłaty ciaham hoda, to siaredniaja zarpłata składaje kala 1600 rubloŭ na ruki.
«Tamu z ulikam usich dadatkovych vypłat, pryśviečanych da peŭnych dat, jakija praktykujuć na dziaržaŭnych pradpryjemstvach i 13-ju zarpłatu, vychodziać tyja samyja «pa piaćsot».
Surazmoŭca adznačaje, što choć u rublach zarpłata raście, u valutnym vymiareńni — skaračajecca.
«Kali paraŭnoŭvać z 2020 hodam, to maja siońniašniaja zarpłata ŭ valucie navat krychu mienšaja, čym tady. Tamu kazać pra toje, što ja mahu dazvolić sabie bolš, dakładna nie vypadaje», — pryznajecca supracoŭnik abłhazu.
Mieniedžar
Mieniedžar pa prodažach, jaki pracuje ŭ kampanii, jakaja zajmajecca aptovym handlem aŭtazapčastkami, kaža, što ŭ paraŭnańni ź letašnimi zarobkami jahonaja zarpłata vyrasła pryblizna na 10%.
«Pa adčuvańniach ceny vyraśli prykmietna bolš», — kaža jon.
Pa słovach surazmoŭcy, raniej jon asabliva nie źviartaŭ uvahu na ceny, kali chadziŭ u praduktovuju kramu.
«Niedzie bližej da kanca minułaha hoda pačaŭ hladzieć na ceńniki. Baču, što amal usie pradukty pastajanna daražejuć.
Zarpłata taksama raście, ale ciapier ja mahu dazvolić usio ž krychu mienš, čym było raniej», — pryznajecca mužčyna, jakija ŭžo amal 7 hadoŭ pracuje na hetaj pasadzie.
Kurjer
Surazmoŭca, jaki pracuje ŭ bujnoj kampanii kurjeram na ŭłasnym aŭto, pryznajecca, što za apošni hod jahony zarobak sapraŭdy pavialičyŭsia.
«Na miesiac razam z vypłatami za amartyzacyju aŭto vychodzić kala 2400-2500 rubloŭ na ruki. Plus za košt peŭnych plušak štomiesiac vychodzić jašče kala 200 rubloŭ. Hod nazad ahulnaja suma čystymi była rubloŭ na 400 mienš», — pryznajecca mužčyna.
Ilustracyjny zdymak. Fota: «Naša Niva»
Pa jaho słovach, ciapier sapraŭdy možna dazvolić sabie krychu bolš, čym było hod tamu:
«Nielha kazać, što hetyja 400 rubloŭ mocna palepšyli ŭzrovień žyćcia — zarpłata padrasła, ale i ceny nie stajać na miescy».
Rost zarpłaty mužčyna źviazvaje z tym, što ŭ paraŭnańni ź minułym hodam u kampanii pavialičylisia abjomy prodažaŭ, što ŭ vyniku i paŭpłyvała na pavieličeńnie zarpłaty.
Doktarka
Vuzkaja śpiecyjalistka, jakaja pracuje na poŭnuju staŭku ŭ paliklinicy, ciapier atrymlivaje kala 2100 rubloŭ na ruki. Hod tamu było kala 1800 rubloŭ.
«Zarpłaty ŭ miedykaŭ pacichu rastuć. Za hod, atrymlivajecca, pryblizna na 20% vyrasła. Mahčyma, heta navat krychu bolš, čym vyraśli ceny, ale nie mahu skazać pra toje, što ciapier ja mahu sabie dazvolić adčuvalna bolš. Ale horš dakładna nie stała», — pryznajecca doktarka.
Taksama miedyk źviartaje ŭvahu, što siońniašni ŭzrovień zarobkaŭ dla jaje nie pikavy.
«U časy kavidu kala hodu ŭ nas byli sapraŭdy davoli hodnyja dapłaty. Tamu kali paraŭnoŭvać z časami pandemii, to ciapier ja zarablaju horš, bo tady byli miesiacy, kali atrymlivała kala $1000 na ruki ŭ ekvivalencie».
Vykładčyk
Vykładčyk adnoj z bujnych dziaržaŭnych VNU adznačaje, što staŭka za hadzinu vyrasła litaralna na kapiejki.
«Kali letaś było 5 rubloŭ z kapiejkami, to ciapier — 6. Ahułam atrymlivajecca, što naminalnaja zarpłata vyrasła na 10-15%. Ale ŭ niekatorych VNU źmianiłasia sistema naličeńniaŭ, tamu moža atrymlivacca tak, što kab mieć tyja samyja hrošy, što byli letaś, faktyčna treba adpracavać pracentaŭ na 20 bolej», — tłumačyć vykładčyk.
Pa jahonych słovach, nijakaha realnaha palapšeńnia nie adčuvajecca. Zarobki ŭ vykładčykaŭ, jak byli nizkimi, takimi i zastajucca. Kab za miesiac atrymlivałasia zarabić bolš-mienš prystojnuju sumu, mnohija vykładčyki dadatkova padpracoŭvajuć u jakaści samazaniatych. Jany zajmajucca repietytarstvam, napisańniem rabot dla studentaŭ na zamovu, vykładajuć anłajn-kursy (naprykład, vykładčyki zamiežnych movaŭ).
Aficyjnyja ličby
Zhodna z apošnimi aficyjnymi danymi (za lipień 2024 hoda), siaredniaja zarpłata ŭ Biełarusi składaje 2355 rubloŭ brudnymi ci 2025 rubloŭ na ruki. Heta +115,4% u paraŭnańni ź lipieniem 2023 hoda. Zhodna z aficyjnaj statystykaj, realnyja dachody (z papraŭkaj na inflacyju), za hety pieryjad vyraśli na 9,9%.
Kamientary