U kinateatrach idzie našumieły bodzi-chorar «Substancyja» (The Substance). Heta historyja, jakaja nie škaduje ni hledača, ni hałoŭnych zorak.
Niaprosta źniać bolš brydkaje i pry hetym dakładnaje kino. Jano ab prablemie standartaŭ pryhažości i taho, što rabić, kali ty pad ich bolš nie padychodziš.
U «Substancyi» na vialiki ekran viartajecca 61-hadovaja Demi Mur. Hetaja aktrysa mieła svaje samyja zornyja roli jašče ŭ 90-ja (da prykładu, u stužcy «Sałdat Džejn»), a ŭ apošnija hady čaściej traplała ŭ miedyja praź luboŭ da płastyčnaj chirurhii, tak što hrać joj daviałosia, pa sutnaści, samu siabie.
Demi dastałasia rola Elizabiet Sparkł, niemaładoj halivudskaj aktrysy, jakaja niekali navat atrymała svaju zorku na Alei słavy. Ale čas idzie, i zorka pakryłasia raskolinami, a ŭ žyćci samoj Elizabiet ad byłoj słavy zastałosia tolki ranišniaje fitnes-šou na telebačańni.
Dy i hetamu nadychodzić kaniec. Stereatypna mizahiničny telebos Charvi spačatku ŭ razmovie, jakuju padsłuchała Elizabiet, a potym prosta joj u tvar kaža pra toje, što ŭ šou joj bolš niama miesca, bo ŭ žančyn «paśla 50-ci heta skančvajecca». Robić jon heta ŭ restaranie, adnačasova pajadajučy bujnym płanam krevietki, i na hetym u scenie vialiki akcent: maŭlaŭ, z takoj ža skvapnaściu, ź jakoj telebos i industryja ŭ jaho asobie razryvaje miasa krevietak, jon stavicca i da žančyn, ź jakimi pracuje, bo dla jaho heta — tolki miasa.
Elizabiet u rospačy, i tut jana atrymlivaje ananimnuju prapanovu pryniać preparat «Substancyja» — byccam by jon dapamoža joj atrymać novuju viersiju siabie, lepšuju, bolš maładuju i pryhožuju. Žančyna idzie na hety krok, i tak na śviet źjaŭlajecca jaje amałodžanaja kopija ź imiem Sju.
Treba, adnak, vykonvać praviły. Siarod ich — abaviazak kožny tydzień pieraklučacca ad Sju da Elizabiet ci ŭ advarotny bok i nieabchodnaść ni ŭ jakim razie nie zabyvać, što Elizabiet i Sju — adno cełaje. Tajamničy preparat chacia i stvaryŭ asobnaje cieła dla Sju, ale pieranios u jaho tuju častku jaje śviadomaści, jakaja zaŭždy zastavałasia maładoj, prahu da kachańnia, lohkaści i zabavaŭ.
Kali ŭ filmie hučać žorstkija praviły, značyć, jany buduć parušanyja, tak adbyvajecca i ŭ hetym vypadku. Chacia Sju — heta mahčymaść dla Elizabiet žyć nanava, dziaŭčyna abiraje toj ža šlach, što i jaje papiarednica, i stanovicca novaj zorkaj taho samaha ranišniaha fitnes-šou. Słava zaściłaje joj vočy, i Sju vyrašaje žyć na poŭnuju, a zaadno i vyciskać usie soki z uzrostavaj viersii siabie, ale nie razumieje — jana trapiła ŭ tuju ž pastku standartaŭ pryhažości, što i Elizabiet.
U adnym ź intervju Demi Mur kazała, jakuju scenu ŭ filmie jana ličyć samaj žorstkaj. I nie, heta nie scena transfarmacyi, kali ŭ bialutkim, nibyta čysty list papiery, vannym pakoi praz strašnyja pakuty z Elizabiet źjaŭlajecca Sju, i nie šalona nieapisalnaja kancoŭka stužki. Havorka pra epizod z Charvi ŭ restaranie, dziela jakoha biasstrašny akcior Denis Kuejd źjeŭ dva kiłahramy krevietak.
Z takoj ža addanaściu pracavali i inšyja zorki filma, u tym liku novaja zorka amierykanskaha kino Marharet Kuali, jakuju za rol Sju jaŭna čakajuć bujnyja kinaŭznaharody. Zrešty, jak i Demi Mur, dla jakoj «Substancyja» — šans pierazapuścić karjeru i vyjści sa śvietu bolš biudžetnaha niezaležnaha kino na pieršy płan. I naŭrad ci vas ździvić, što scenar prajekta stvaryła taksama žančyna, francužanka Karali Farža, dla jakoj heta ŭsiaho tolki druhi paŭnamietražny film u jaje režysiorskaj karjery. Asobna adznačym pracu hrymioraŭ, jakija vydatna pakazali roznyja etapy transfarmacyi Elizabiet.
Atrymaŭsia razumny i jarki chorar, jaki nielha prapuścić. Atrutna-zialonaja vadkaść z nadpisam «aktyvatar» na fłakonie ŭvasablaje ŭsie tyja pracedury, preparaty i inšyja namahańni, na jakija iduć žančyny, kab zachavać maładość. Robiać jany heta čaściakom pad upłyvam naviazanych im standartaŭ, voś i dzivišsia, čamu aŭtaram hetych standartaŭ, pa siužecie filmu, čamuści nie spadabaŭsia kančatkovy vynik.
A jašče heta historyja pra toje, što ad siabie nie źbiehčy, i sprava datyčyć nie tolki stareńnia. U realnym śviecie my sumiaščajem u siabie roznyja roli, rozny dośvied i časam supraćlehłyja pamknieńni, u vypadku Elizabiet častka z hetych rolaŭ i pamknieńniaŭ uvasobiłasia ŭ jaje novym ciele. Jak pastajanna joj kazali stvaralniki «Substancyi», jana i Sju — adno cełaje, i idealnym vynikam było b, kab isnavaŭ mir pamiž roznymi čaścinkami jaje asoby. Ale ž, jak u rozumie sapraŭdnych žančyn časam zmahajucca standarty źniešnaści i luboŭ da siabie, tak psujucca i adnosiny pamiž Elizabiet i Sju. Tamu i kancoŭka zakanamiernaja, heta finał unutranaj baraćby z samoj saboj, daviedzieny da absurdu.
Adzin z važnych simvałaŭ filmu — lusterka ŭ vannym pakoi, u jakoje hladziać abiedźvie hieraini. Jak lusterka, «Substancyja» biaźlitasna padśviečvaje ŭ kožnym z nas toje, nakolki my zdolnyja prymać inšych takimi, jakija jany jość, a praz heta i toje, ci zdolnyja my prymać samich siabie.
«Naša Niva» — bastyjon biełaruščyny
PADTRYMAĆ«Skazaŭ: ja tut ničoha prasić nie budu». Žonka raskazała, jak Vieramiejčyka pryznali pahrozaj u Litvie18
Kamientary