Bondarava zaklikała pakarać Marzaluka. Ale padviała siabie pad 15 sutak za repost «NN»

Volha Bondarava apublikavała ŭ svaim telehram-kanale zvarot u Pałatu pradstaŭnikoŭ z prośbaj

«dać acenku pavodzinam deputata Marzaluka I.A. i jaho publičnym vykazvańniam z vykarystańniem nienarmatyŭnaj leksiki ŭ dačynieńni da žančyny, zakonapasłuchmianaj hramadzianki Biełarusi».

Pad paciarpiełaj žančynaj majecca na ŭvazie hrodzienskaja doktarka Alena Stefanovič, pra kanflikt jakoj z Marzalukom my pisali ŭčora. Pra hetuju paplečnicu Bondaravaj Marzaluk, vystupajučy dniami pa TB, skazaŭ nastupnaje.

«Kali niejkaja šval u Hrodnie, pracujučy ŭ dziaržaŭnaj miedycynskaj ustanovie, zajaŭlaje, što biełaruski pašpart — prosta papierka, kali jany hrebujuć biełaruskaj uładaj, kali jany ckujuć Ministerstva kultury, ale machajuć čyrvona-zialonym ściaham, to jany robiać toje samaje [što i «zmahary»] i stvarajuć niehatyŭny imidž biełaruskaj ułady».

Bondarava začapiłasia za słova «šval», jakoje ŭ publikacyi «Našaj Nivy» vyniesienaje ŭ zahałovak, i nie prydumała ničoha lepšaha, jak zaskrynšocić staronku z toj publikacyjaj i dałučyć skrynšot da zvarotu. 

Miž tym viadoma, što za skrynšoty z vydańniaŭ, pryznanych łukašystami «ekstremisckimi», u Biełarusi paciarpieli sotni dy tysiačy ludziej. Prytym nie abaviazkova było tyja skrynšoty navat vykładać publična, dastatkova taho, što ich znajšli b u telefonie ci kampjutary pry ahladzie ci pieratrusie.

Bolš taho — časam represavali, dačapiŭšysia da hetaha, navat apantanych łukašystaŭ, jakija niejkim čynam vybilisia z adpaviednaści hienieralnaj linii, jak, naprykład, Elvira Mirsalimava ci Arciom Ahafonaŭ.

Na ździejśnieny Bondaravaj ideałahičny hrech užo publična źviarnuli ŭvahu ŭ apazicyjnym jaje linii łukašysckim telehram-kanale «Dla słužiebnoho polzovanija», źjedliva adznačyŭšy, što danosčyca čytaje «Našu Nivu» praz VPN. U čym nie majuć racyi, pakolki sa spasyłki vidać, što Bondarava vykarystoŭvaje dla ŭvachodu na naša vydańnie sajt-lusterka.

Pavialičyć

Pa idei, łukašenkaŭskija siłaviki pavinny byli b paśla taho źviarnuć na hrodzienskuju danosčycu pilnuju ŭvahu. Ale viadoma, što čamuści akurat joj u Biełarusi dazvalajuć bolš, čym inšym. Cikava, jak budzie hetym razam?

• 2
• 1
• 44
• 3
• 0
• 0
• 1
• 0