Poŭdzień Afryki achapiŭ najmacniejšy za dziesiacihodździ kryzis charčavańnia
Piać krain užo abviaścili pra nacyjanalnaje biedstva z-za zasuchi i hoładu.
Šmatmiesiačnaja zasucha vyklikała najmacniejšy za dziesiacihodździ charčovy kryzis na poŭdni Afryki — z hoładam mohuć sutyknucca bolš za 27 miljonaŭ čałaviek, zajaviła Suśvietnaja charčovaja prahrama, paviedamlaje Radyjo Svaboda.
«Čakajecca, što kožny miesiac budzie horšym za papiaredni ažno da zboru ŭradžaju ŭ sakaviku i krasaviku nastupnaha hoda. Ciapierašni ŭradžaj nie atrymaŭsia, bydła hinie, a dzieciam šancuje na adno karmleńnie ŭ dzień», — skazaŭ pradstaŭnik arhanizacyi Tomsan Firy.
Piać krain — Lesota, Małavi, Namibija, Zambija i Zimbabve — užo abviaścili pra nacyjanalnaje biedstva z-za zasuchi i hoładu. Jany źviarnulisia pa mižnarodnuju dapamohu, paviedamlaje Associated Press. Taksama surjozna paciarpieli prylehłyja da ich Anhoła i Mazambik, adznačyŭ Firy.
Raniej paviedamlałasia, što pieryjad sa studzienia pa sakavik u rehijonie była samaja mocnaja zasucha za apošnija sto hadoŭ, jakaja źniščyła pasievy i pradukty charčavańnia dla miljonaŭ ludziej. Navukoŭcy źviazvajuć zasuchu z pryrodnaj źjavaj El-Nińjo — pavyšeńniem tempieratury ekvataryjalnych vod Cichaha akijana — i antrapahiennym źmianieńniem klimatu, jakija ŭzmacniajuć nastupstvy biedstvaŭ. El-Nińjo sfarmavaŭsia letam 2023 hoda i spyniŭsia ŭ červieni hetaha.
Firy adznačyŭ, što Suśvietnaja arhanizacyja charčavańnia pačała akazvać charčovuju dapamohu paciarpiełym krainam, ale adčuvaje surjoznaje niedafinansavańnie: ź nieabchodnych 369 miljonaŭ dalaraŭ arhanizacyja atrymała tolki krychu bolš za 70.
U toj ža čas, adznačyŭ Firy, hoład u Afrycy vyliŭsia ŭ pieryjad «rastučych hłabalnych patrebaŭ»: humanitarnaja dapamoha nieabchodnaja taksama ŭ Hazie, Sudanie i inšych krainach.
Kamientary