Vialikabrytanija raskryła bujnuju mižnarodnuju sietku pa admyvańni kryptavaluty dla ŭzbahačeńnia Kramla i apieracyj rasijskich špijonaŭ u Jeŭropie

Nacyjanalnaje ahienctva pa baraćbie sa złačynnaściu Vialikabrytanii (NCA) pry padtrymcy śpiecsłužbaŭ ZŠA, Francyi i Irłandyi raskryła šmatmiljardnuju schiemu admyvańnia hrošaj, jakaja dziejničała ŭ bolš jak 30 krainach śvietu i pieravažna achoplivała Łondan, Maskvu i Dubaj. Hetaja nielehalnaja mižnarodnaja sietka dazvalała Kramlu i jeŭrapiejskim abjadnanym złačynnym hrupoŭkam abychodzić zachodnija sankcyi praz vykarystańnie kryptavaluty, paviedamlaje vydańnie The Financial Times.

Pa danych NCA, klučavymi častkami złačynnaj sietki źjaŭlalisia biznes-abjadnańni Smart Group i TGR Group — jany akazvajuć šmat pasłuh, uklučajučy admyvańnie hrošaj, źviazanych z padsankcyjnymi subjektami, abmien najaŭnych hrošaj i kryptavaluty biez rehistracyi, a taksama maskiroŭku krynic srodkaŭ dla nabyćcia nieruchomaści ŭ Vialikabrytanii i Jeŭropie vysokazabiaśpiečanymi rasijanami, u tym liku supracoŭnikami rasijskich śpiecsłužbaŭ.

Sietka absłuhoŭvała zvyš 22 złačynnych hrupovak, u tym liku bujny irłandski narkakartel Kinachan, źviazany z šmatlikimi zakaznymi zabojstvami, a taksama rasijskija špijonskija apieracyi z kanca 2022 hoda da leta 2023 hoda (pavodle śledstva, adnym z klijentaŭ sietki byŭ prapahandyscki miedyjachołdynh Russia Today, jaki tym samym finansavaŭ rasijskija apieracyi ŭpłyvu ŭ Vialikabrytanii).

NCA taksama vyjaviła, što hrupy Smart i TGR rehularna supracoŭničali z Garantex — biržaj, jakaja z 2022 hoda znachodzicca pad sankcyjami Vialikabrytanii i ZŠA. Pa infarmacyi śledstva, birža vykarystoŭvałasia dla apłaty pastavak u Rasiju zachodnich kampanientaŭ zbroi, jakaja prymianiajecca joj va Ukrainie.

NCA padkreślivaje, što Rasija stała aktyŭna karystacca schiemaj z-za masavaj vysyłki rasijskich dypłamataŭ i špijonaŭ ź Jeŭropy paśla pačatku vajny va Ukrainie, pieradaje The Financial Times.

A sama schiema vyhladaje tak.

1. Pastaŭka narkotykaŭ na Zachad i ŭ Vialikabrytaniju. Narkotyki z Paŭdniovaj Amieryki traplajuć u Vialikabrytaniju i zachodnija krainy. Pakupka narkotykaŭ adbyvajecca z dapamohaj kryptavaluty, pieravažna Tether (pryviazanaja da dalara ZŠA, što dazvalaje zachoŭvać stabilnaść srodkaŭ).

2. Najaŭnyja ad narkahandlu. Narkatyčnyja hrupy ŭ Vialikabrytanii i na Zachadzie pradajuć u siabie narkotyki z Paŭdniovaj Amieryki i atrymlivajuć vialikija sumy najaŭnych hrošaj.

3. Abmien najaŭnych na kryptavalutu praz Smart. Praź vialikuju sietku kurjeraŭ, arhanizavanaj Smart Group, najaŭnyja znoŭ abmieńvajucca na kryptavalutu, pieravažna Tether (pa ŭsioj Vialikabrytanii byli vyjaŭleny jak minimum 55 miescaŭ dla takich nielehalnych abmienaŭ).

4. Pieradača kryptavaluty rasijskim strukturam. Jeŭrapiejskija i brytanskija narkahandlary, žadajučy atrymać novy tavar z Paŭdniovaj Amieryki i pry hetym paźbiehnuć niepatrebnaj uvahi z boku zachodnich śpiecsłužb, pieradajuć kryptavalutu kampanijam i strukturam, źviazanymi z Rasijaj. Častka z atrymanaj Rasijaj kryptavaluty znoŭ idzie na pakupku paŭdniovaamierykanskich narkotykaŭ, a astatnija ličbavyja srodki ŭ jakaści pracentaŭ Rasija zabiraje sabie.

5. Admyvańnie hrošaj praz TGR. Tut u spravu ŭstupaje sietka kampanij TGR Group, jakaja maje ofisy ŭ Łondanie, Maskvie i Dubai. Potym TGR «lehalna» admyvaje kryptavalutu (praz falšyvyja finansavyja dakumienty, fiktyŭnyja kampanii abo inviestycyi ŭ realnyja aktyvy na Zachadzie) i atrymlivaje čystyja miljardy dalaraŭ.

6. Viartańnie srodkaŭ u Rasiju. Paśla admyvańnia kryptavaluta dziakujučy chutkaj pieradačy, jakaja amal nie adsočvajecca, stanovicca dastupnaj Kramlu, rasijskim elitam i śpiecsłužbam, jakija viaduć spravy ŭ zachodnich krainach. U Rasii abo inšych krainach, dzie kryptavaluta lehalna ci moža być pieraviedziena ŭ najaŭnyja hrošy, hetyja srodki kanviertujucca nazad u tradycyjnyja valuty (rubli, dalary, jeŭra). Heta robicca praz bankaŭskija sistemy, jakija mohuć vykarystoŭvać niedastatkova strohija pravierki na pachodžańnie srodkaŭ.

NCA padkreślivaje, što ŭ złačynnuju schiemu akazalisia ŭciahnutyja vysokapastaŭlenyja asoby šerahu krain śvietu i kampanii z dobraj reputacyjaj.

Pavialičyć

Asablivuju ŭvahu NCA i zachodnich śpiecsłužbaŭ vyklikała asoba Kaciaryny Ždanavaj, uładalnicy kampanii Smart. 38-hadovaja žycharka Maskvy trapiła ŭ sankcyjny śpis ZŠA ŭ 2022 hodzie za pieravod bolš za $100 miljonaŭ u Abjadnanyja Arabskija Emiraty ad imia nienazvanaha rasijskaha aliharcha, jaki znachodzicca pad sankcyjami. Ždanava taksama dapamahała rasijskim elitam abychodzić abmiežavańni pry kupli nieruchomaści ŭ Vialikabrytanii.

Žančyna, pavodle The Financial Times, ciapier znachodzicca pad vartaj u Francyi.

Pa infarmacyi rasijskich niezaležnych miedyja, Kaciaryna Ždanova nosić u Rasii inšaje proźvišča — Mahamiedava. Adnak u publičnaj prastory jaje viedajuć jak Kaciarynu Ždanavu, a časam i jak Kaciarynu Maślijevu.

Apošniaje proźvišča Kaciaryna nikoli aficyjna nie nasiła, ale jaho nosić jaje syn Płaton, jaki naradziŭsia ad «śvieckaha lva», byłoha kirujučaha partniora viežy «Fiederacyja» ŭ Maskvie Kiryła Maślijeva (bolšaść elitnych kryptavalutnych abmieńnikaŭ u Maskvie raźmiaščajucca mienavita ŭ viežy «Fiederacyja»).

Kaciaryna Ždanava-Mahamiedava i Kirył Maślijeŭ byli razam zaŭvažanyja ŭ viadzieńni biznesu ź Irynaj Šajhu, žonkaj byłoha ministra abarony Rasii Siarhieja Šajhu. Dziakujučy Kiryłu Maślijevu Ždanava-Mahamiedava apynułasia ŭ centry śvieckaha žyćcia, dajučy intervju hlancavym časopisam pra svoj pośpiech.

Pavialičyć

Ždanava-Mahamiedava, pavodle śpiecsłužbaŭ ZŠA, rehularna kaardynavała mižnarodnyja apieracyi pa admyvańni bujnych sum hrošaj z hramadzianinam Rasii Chadžy-Muradam Dałhatavičam Mahamiedavym. Abodva vykarystoŭvali sietku TGR (a mienavita kampanii TGR Corporate Concierge LTD i TGR Partners) dla apłaty rachunkaŭ-faktur, hrašovych pieravodaŭ i abmienu najaŭnych hrošaj na kryptavalutu Tether.

Hrupu kampanij TGR uznačalvajuć hramadzianin Ukrainy Džordž Rosi, hramadzianka Rasii Alena Čyrkinian, hramadzianin Łatvii Andrejs Bradens (u jaho znajšlisia lehalnyja aktyvy ŭ ZŠA).

Ministerstva finansaŭ ZŠA ličyć, što Alena Čyrkinian niepasredna padparadkoŭvajecca Kramlu i prymaje klučavyja rašeńni ŭ ramkach hrupy TGR. U 2023 hodzie jana ŭdzielničała ŭ pieravodzie srodkaŭ u Vialikabrytaniju dla padtrymki rasijskaha prapahandysckaha telekanała RT.

Pavialičyć

Pa danych NCA, praź Vialikabrytaniju štohod admyvajecca bolš za $100 miljardaŭ, ź jakich kala $5 miljardaŭ prypadaje na kryptavaluty. Hetaja suma praciahvaje raści na fonie pastajannaha ŭdaskanaleńnia technałohij i pavieličeńnia hłabalnaha vykarystańnia ličbavych aktyvaŭ.

Pavodle hienieralnaha dyrektara NCA pa apieracyjach Roba Džonsa, rasśledavańnie suprać mižnarodnaj rasijskaj sietki admyvańnia kryptavaluty stała «samaj značnaj apieracyjaj suprać admyvańnia hrošaj, jakuju kali-niebudź pravodziła ahienctva».

«Hetaja schiema abjadnoŭvaje nielehalnyja apieracyi z najaŭnymi hrašyma i kryptavalutaj u maštabach, jakija my jašče nie bačyli. Tut pieraplatajucca špijonstva, transnacyjanalnaja złačynnaść i rasijskija admyvalniki hrošaj», — padkreśliŭ Džons.

U vyniku rasśledavańnia NCA aryštavała ŭ Vialikabrytanii 84 čałavieki, kanfiskavała £20 miljonaŭ u najaŭnych hrošach i kryptavalucie.

• 24
• 1
• 0
• 2
• 4
• 0
• 3
• 0