Samalot Asada źnik z radaraŭ na padlocie da rasijskaj bazy ŭ Chmiejmimie
Pusty, absalutna pusty mižnarodny aeraport Damaska: nivodnaha siłavika, nivodnaha pamiežnika. Dobra apranutyja ludzi biahuć na samalot. Heta kadry sa stalicy Siryi siońnia ŭnačy.
Samalot Ił-76, na jakim, jak miarkujecca, siońnia ŭnačy vylecieŭ z Damaska Bašar Asad, źnik z radaraŭ na padlocie da rasijskaj vajskovaj bazy na ŭźbiarežžy.
Pavodle źviestak Flightradar24, Ił-76 avijakampanii Syrian Air u 4:55 pa Damasku vylecieŭ z aeraporta horada. Spačatku jon kiravaŭsia na ŭschod, u boku Iraka, paśla paviarnuŭ u kirunku rasijskaj vajskovaj bazy na ŭźbiarežžy. Trochi nie dalacieŭšy, bort zrabiŭ rezki pavarot, paśla čaho źnik z radaraŭ u 5:39.
Pry źniknieńni z radaraŭ samalot znachodziŭsia na vyšyni 500 m.
«Jon źnik z radaraŭ, mahčyma, transpondar adklučyli, ale ja liču, što bolš imavierna, što samalot byŭ źbity…», — cytuje ekśpierta krynica Reuters.
Prykładna ŭ toj samy čas premjer Siryi zajaviŭ ab pieramovach pra pieradaču ŭłady i što ŭ krainie pavinny być svabodnyja vybary, kab «siryjcy mahli vybirać».
Siamja Asadaŭ kiravała Siryjaj 54 hady. Achviarami jaje dyktatury i raźviazanaj imi hramadzianskaj vajny stali sotni tysiač ludziej.
Na vybarach 2021 hoda Bašaru Asadu napisali 95,1% hałasoŭ.
U realnaści režym Asada abapiraŭsia na mienšaść nasielnictva krainy — ałavitaŭ (Asady sami ałavity) i chryścijanaŭ roznych kanfiesij. U toj ža čas suprać jaho vystupali sunity, jakija składali bolšaść nasielnictva krainy, i druzy, a taksama śvieckija siryjcy, jakija vystupajuć za demakratyčny ład. Kurdy bałansavali miž uradam i apazicyjaj, bo majuć ułasnyja intaresy.
Padaŭleńnie masavych pratestaŭ 2011 hoda vyklikała hramadzianskuju vajnu. Asad zastaŭsia va ŭładzie dziakujučy tamu, što na jaho baku vajavali intervienty z Rasii i Irana. Paŭstancaŭ padtrymlivali Turcyja i Saudaŭskaja Aravija. ZŠA doŭhi čas nie ŭmiešvalisia, ale za apošnija hady ŭzbroili i padrychtavali Svabodnuju siryjskuju armiju ŭ kantralavanym imi ankłavie na ŭschodzie krainy. Mienavita SSA pieršaj uvajšła ŭ Damask učora.
Režym Asada paŭ za 10 dzion u vyniku małankavaha nastupu paŭstancaŭ — paśla taho, jak Turcyja da inšyja krainy zabiaśpiečyli ich minimumam sučasnych uzbrajeńniaŭ.
Rasija na hety raz nie mahła im dapamahčy, bo pierakinuła ŭsie svaje siły va Ukrainu. A iranskich proksi razhramiŭ Izrail u Livanie.
Łukašenka ŭpieršyniu źjaviŭsia na publicy razam z mamaj Koli12
Kamientary