U sieradu 17-hadovaja biełaruska Viktoryja Azaranka pieramahła zorku suśvietnaha tenisu Anastasiju Myskinu
Apoŭnačy pa mienskim časie ŭ Ńju-Jorku skončyŭsia matč pamiž Maksimam Mirnym i paŭdniovaafrykancam Ueśli Mudzi. Hetaja hulnia, jak i dźvie inšyja z udziełam biełarusaŭ, musiła prajści ŭ aŭtorak, adnak niekalki razoŭ adkładałasia praz doždž dy ŭrešcie była pieraniesienaja na sieradu.
Matč doŭžyŭsia piać setaŭ i skončyŭsia parazaj biełaruskaha tenisista, jaki tak i nia zdoleŭ pieraadoleć pieršaha kruhu – 4:6, 6:4, 4:6, 7:6, 4:6. Pryčym u apošnim secie Maksim addaŭ apošniuju padaču.
Praŭda, biełarus praciahnie baraćbu ŭ parnym razradzie. U pieršym kruzie jon i šved Jonas Bjorkman zhulajuć suprać aŭstralijca Stefana Chasa i ... Ŭeśli Mudzi. Miž inšym, biełaruska-švedzki tandem ličycca na US Open druhim pa sile.
Sensacyja zdaryłasia ŭ žančyn. 17-hadovaja biełaruska Viktoryja Azaranka, jakaja jašče hod tamu hulała ŭ junijorskim razradzie, pieramahła znakamituju i «zornuju» Anastasiju Myskinu (Rasieja) – 6:4, 6:2.
Zaznačym, što Viktoryja zajmaje 124-je miesca ŭ rejtynhu Žanočaj tenisnaj asacyjacyi (WTA), Anactasija – pieramožca Ralan Haros u 2004 h. – znachodzicca na 12-j pazycyi.
U nastupnym raŭndzie Viktoryja sustreniecca z 19-hadovaj amerykankaj Džemi Džeksan, jakaja zajmaje 57-je miesca ŭ suśvietnaj klasyfikacyi.
Cikava, što biełarusačka, jakaja pieršy hod vystupaje na paŭnacennych darosłych spabornictvach, raniej na turnirach Vialikaha Šlemu, dalej za pieršy kruh nie prachodziła. I na Aŭstralian Oŭpen, i na Ralan Haros, i na Ŭimbełdanie jana skančała baraćbu ŭ pieršym kruzie.
Taksama ŭ sieradu Taciana Pučak prajhrała ŭkraincy Julii Fiadak ź likam 5:7, 3:6 i spyniła baraćbu ŭ adzinočnym razradzie.
U žanočym parnym razradzie budzie vystupać Nastaśsia Jakimava, jakaja ŭ paniadziełak vybyła ź indyvidualnaha. U duecie z češkaj Evaj Birneravaj biełaruska zhulaje suprać amerykanak Aleksy Hłeč i Ebihiejł Śpiors.
Ciapier čytajuć
Vychadcy z «Alfa» KDB Biełarusi zajmajuć kiraŭničyja pasady ŭ novym rasijskim supiersakretnym śpiecpadraździaleńni, pryznačanym dla zabojstvaŭ za miažoju13
Kamientary