Što čakaje biełarusaŭ pry atrymańni šenhienskich vizaŭ u sioletnim turystyčnym siezonie

Asablivaści vydačy viz: što važna ŭličvać?

Zapisacca na padaču dakumientaŭ u vizavyja centry biez pasiarednikaŭ pa-raniejšamu prablematyčna. Plus niekatoryja z centraŭ zrabili bolš strohimi patrabavańni da rehistracyi.

Kali raniej vizavyja centry Ispanii ŭ Biełarusi i Rasii zapytvali minimum piersanalnaj infarmacyi pry vieryfikacyi na sajcie, to ciapier pryjdziecca zapaŭniać padrabiaznuju ankietu anłajn z paznačeńniem nie tolki pašpartnych danych, ale i miesca pracy, a taksama kantaktaŭ hatela, u jakim płanuje spynicca padarožnik.

Ale navat paśla vykanańnia ŭsich nieabchodnych umoŭ pry rehistracyi złavić svabodnuju datu na padaču dakumientaŭ samastojna praktyčna niemahčyma.

Sistemu videavieryfikacyi taksama ŭviali polskija vizavyja centry.

Adnak situacyja z padačaj na vizy, na dumku pradstaŭnikoŭ turystyčnych ahienctvaŭ, tolki pahoršyłasia. Z momantu vieryfikacyi da zapisu na padaču moža prajści niekalki miesiacaŭ. A sam zapis vizavy centr maje prava anulavać paśla zvanka zajaŭniku, kali ŭźniknie padazreńnie, što jon dziejničaŭ praz pasiarednikaŭ.

«Z Polščaj my ciapier praktyčna nie pracujem, tamu što ŭsio vielmi doŭha i niama harantyi, što vizu ŭ vyniku aformiać», — raskazała supracoŭnica adnaho z turahienctvaŭ.

Italjanski vizavy centr pa-raniejšamu praktykuje zapis praz žyvuju čarhu. Ale z vosieni minułaha hoda trapić u jaje možna taksama praź vieryfikacyju anłajn, što vielmi zručna dla inšaharodnich. Adnak heta tolki pieršy krok dla atrymańnia vizy, bo z momantu rehistracyi ŭ žyvoj čarzie da padačy dakumientaŭ prachodzić kala hoda.

Čakańnie taho vartaje, bo Italija — adna ź niamnohich krain, jakaja hatovaja dać biełarusam šenhienskija vizy terminam da 3 hadoŭ. Pry hetym ryzyki zastacca bieź vizy taksama isnujuć: pastajannaja błytanina ŭ numarach žyvoj čarhi ŭžo nieadnarazova pryvodziła da taho, što achvotnym atrymać vizu davodziłasia zapisvacca ŭ list čakańnia nanoŭ.

Svabodnyja miescy pry samastojnaj padačy ŭ vizavych centrach Hrecyi i Vienhryi, Hiermanii i Francyi złavić praktyčna niemahčyma, jak i hod tamu.

Trochi praściej zapisacca na atrymańnie bałharskaha «šenhiena». Ale turapieratary papiaredžvajuć: heta samaja prablemnaja kraina ŭ płanie afarmleńnia viz dla biełarusaŭ.

«Zvyčajna Bałharyja adkryvaje karotkaterminovy «šenhien» pad pajezdku. Što tyčycca doŭhaterminovych viz, to ŭ nas byli vypadki vydačy ich na 3 miesiacy, ale z mahčymaściu znachodžańnia ŭ Šenhienskaj zonie nie bolš za 15 dzion», — raskazała pradstaŭnica adnaho z turahienctvaŭ.

Jak praviarajuć biełaruskich turystaŭ?

Padača dakumientaŭ, jakija paćviardžajuć znachodžańnie ŭ toj ci inšaj krainie, raniej nie źjaŭlałasia abaviazkovaj umovaj paŭtornaj vydačy šenhienskaj vizy. Ciapier ža lohka možna atrymać admovu, kali niama dokazaŭ, što padčas papiaredniaj pajezdki biełaruskija turysty sapraŭdy znachodzilisia ŭ krainie, praź jakuju afarmlali «šenhien».

Abaviazkovy vykup kvitkoŭ i broni ŭ hatelach (damova na arendu žylla) spatrebiacca pry padačy dakumientaŭ u vizavyja centry Vienhryi, Bałharyi, Hrecyi. Pry hetym konsulskija słužby mohuć pravieryć, ci nie anulavaŭ turyst ź Biełarusi broń hatela ŭ apošni momant.

«Pa Bałharyi my sutyknulisia z tym, što konsulskija słužby praviarali nie tolki fakt apłaty pražyvańnia, ale i telefanavali ŭ hateli, kab daviedacca, ci sapraŭdy ŭ paznačany čas biełarusy žyli ŭ apłačanych numarach», — raskazaŭ pradstaŭnik adnaho z turystyčnych ahienctvaŭ.

U vyniku, pa jahonych słovach, u niekatorych turystaŭ bałharski «šenhien» byŭ anulavany, i ciapier mahčymaść jahonaha paŭtornaha atrymańnia minimalnaja.

Naviedvańnie krainy vydačy vizy abaviazkova taksama dla Hiermanii, Francyi, Italii. Pry paŭtornaj padačy dakumientaŭ takaja infarmacyja nie budzie lišniaj u ispanskim i polskich vizavych centrach.

«Ja padavałasia na ispanski «šenhien» u kastryčniku minułaha hoda, i ŭžo tady byli vielmi dziŭnyja patrabavańni da dakumientaŭ, — raskazała minčanka Jaŭhienija. — U turahienctvie, jakoje zajmałasia zapisam na padaču, mnie skłali i razdrukavali padrabiazny maršrut pajezdki, da jakoha prykłali źviestki pra kožnaha, chto braniravaŭ hatel, plus broń kvitkoŭ.

U apošni momant dadali ŭ pakiet kopiju pašparta nieviadomaj žančyny — maŭlaŭ, konsuł u Maskvie nie razumieje, jak možna padarožničać adnamu. Pry mnie padavałasia na vizu žančyna, u jakoj uźnikli prablemy tolki tamu, što jana spačatku płanavała dabracca da Hiermanii, potym na paru dzion zajazdžała ŭ Ispaniju i znoŭ źbirałasia viarnucca ŭ Hiermaniju. Heta značyć, Ispanija dla jaje nie była asnoŭnaj metaj padarožža.

Mnie pašancavała: ja paćvierdziła svaju pajezdku ŭ Ispaniju pa papiaredniaj vizie, plus turahienctva pierastrachavałasia i prykłała kuču dadatkovych dakumientaŭ. U vyniku atrymała ispanski «šenhien» na 3,5 miesiaca.

Na jaki termin ciapier realna atrymać turystyčnuju vizu?

Turapieratary adzinyja ŭ mierkavańni, što ŭ čysty pašpart, dzie da hetaha nie było adznak pra «šenhien», možna atrymać karotkaterminovuju adnarazovuju vizu pad kankretnuju pajezdku — z hetym, jak praviła, u biełaruskich turystaŭ prablem nie ŭźnikaje.

Doŭhaterminovy šmatrazovy «šenhien» dajecca ŭ tym vypadku, kali na praciahu apošnich čatyroch hadoŭ zajaŭnik užo atrymlivaŭ vizu.

«Maksimalnyja terminy pa turystyčnym «Šenhienie» ŭ Italii, da troch hadoŭ. Ale zvyčajna dajuć na termin ad 6 miesiacaŭ da hoda. Francyja moža dać hadavuju mulcivizu, ale, jak praviła, bieź vizavaj historyi, źviazanaj z hetaj krainaj, možna raźličvać na šeść miesiacaŭ. Ispanija vydaje «šenhien» na termin ad adnaho miesiaca da hoda», — raskazała supracoŭnica adnaho z turystyčnych ahienctvaŭ.

Padajučy dakumienty ŭ vizavyja centry Bałharyi i Hrecyi, varta raźličvać na adnarazovuju karotkaterminovuju vizu. Vienhryja, pa słovach surazmoŭcy, u apošni čas usio čaściej vydaje hadavyja mulcivizy, ale staranna praviaraje turystaŭ na pradmiet znachodžańnia ŭ krainie.

Turystyčnuju vizu ŭ Polšču možna ŭ bolšaści vypadkaŭ atrymać tolki pad pajezdku. Pry hetym nieabchodna nie prosta zabraniravać, ale i apłacić pražyvańnie ŭ hateli.

«Z Hiermanijaj taksama ŭsio niaprosta. Pa haściavych zaprašeńniach vizu dajuć na termin da 5 hadoŭ z abaviazkovym naviedvańniem krainy. Z turystyčnymi vizami składaniej, a terminy čakańnia z momantu zapisu da atrymańnia «šenhiena» składajuć kala hoda. Pry hetym u bolšaści vypadkaŭ možna aformić turystyčnuju mulcivizu na hod», — patłumačyła surazmoŭca.

A što pa košcie?

Pamiery konsulskich zboraŭ nie źmianilisia i ŭ zaležnaści ad abranaj krainy Šenhienskaj zony składajuć ad 35 da 80 jeŭra. A voś pasłuhi servisnych centraŭ značna vyraśli ŭ canie.

Naprykład, premium-padača dakumientaŭ u vizavy centr Ispanii abyjdziecca dadatkova ŭ 370 rubloŭ, choć minułym letam prajs na pasłuhu składaŭ 220 rubloŭ.

Pavialičyć

Što tyčycca ŭznaharodžańnia turystyčnych kampanij, jakija dapamahajuć biełarusam zapisacca na padaču i rychtujuć nieabchodny pakiet dakumientaŭ, to raźbiežka ŭ košcie pasłuh moža składać niekalki sotniaŭ rubloŭ.

Ceny na zapis pa bałharskim i hrečaskim «šenhienie» startujuć ad 350 rubloŭ, dapamoha ŭ zapisie praz polskija vizavyja centry moža abyścisia ŭ 490-1100 rubloŭ. Zapis u ispanski vizavy centr pasiaredniki prapanujuć za 550-650 rubloŭ, nie asabistaja padača (nieabchodna budzie pryjechać u vizavy centr tolki dla zdačy adbitkaŭ palcaŭ) abydziecca ŭ sumu ad 1100 rubloŭ.

Daražej za ŭsio kaštuje zapis u vizavyja centry Italii, Hiermanii i Francyi. Bo havorka zvyčajna idzie pra doŭhaterminovyja mulcivizy, pasiaredniki prosiać za takuju pasłuhu ad 650 jeŭra.

Jak atrymać «šenhien», nie apłačvajučy pasłuhi pasiarednikaŭ?

Mnohija turystyčnyja kampanii pa-raniejšamu adkryvajuć šenhienskija vizy pad tury. U hetym vypadku za zapis na padaču dakumientaŭ płata albo nie spahaniajecca, albo składaje 100-200 rubloŭ.

Ale śpiecyjalisty papiaredžvajuć, što ŭ šerah krain (Polšča, Vienhryja, Bałharyja, Hrecyja, Ispanija) vizy, chutčej za ŭsio, buduć adkrytyja pad pajezdku. Vyklučeńnie dla turystaŭ robiać konsulstvy Italii, Hiermanii i Francyi, jakija, jak praviła, afarmlajuć turystyčnyja vizy na termin ad 3 miesiacaŭ da hoda.

Pavialičyć

«Asablivaj papularnaściu karystajucca tury ŭ Italiju, bo ŭ hetym vypadku viza adkryvajecca minimum na paŭhoda. U nas ciapier užo branirujuć takija padarožžy ź vizavaj padtrymkaj na červień i lipień», — raskazała supracoŭnica adnaho z turahienctvaŭ.

Pavodle jaje słoŭ, nielha kupić tur, atrymać vizu, a potym admovicca ad pajezdki, bo ŭ hetym vypadku «šenhien» moža być anulavany.

Ceny na padarožža ź vizavaj padtrymkaj u italjanskim konsulstvie startujuć ad 330 jeŭra biez uliku koštu samich viz.

• 1
• 0
• 0
• 1
• 0
• 0
• 0
• 0