Siońnia ŭ Vatykanie prajšła intranizacyja (ustupleńnie na pasadu) Papy Lva XIV, na jakoj prysutničali mnohija vysokapastaŭlenyja palityki.
Paśla śviatoj słužby prezident Ukrainy Uładzimir Zialenski sustreŭsia z novaabranym Papam.
Viadoma taksama pra jaho sustreču ź vice-prezidentam ZŠA Džej Dzi Vensam i dziaržsakratarom Marka Rubia. Pra heta paviedamlajuć ukrainskija ŚMI. Sustreča praciahvałasia 40 chvilin, piša «Suśpilnie».
Paźniej Zialenski nazvaŭ sustreču «dobraj».
«Abmierkavali pieramovy ŭ Stambule, kudy rasiejcy nakiravali delehacyju nizkaha ŭzroŭniu, jakaja nie mieła paŭnamoctvaŭ prymać pastanovy. Ja paćvierdziŭ hatoŭnaść Ukrainy da sapraŭdnaj dypłamatyi i adznačyŭ važnaść chutčejšaha poŭnaha i biezumoŭnaha spynieńnia ahniu.
Taksama zakranuli pytańnie nieabchodnaści sankcyj suprać Rasii, dvuchbakovaha handlu, abaronnaha supracoŭnictva, situacyi na poli boju i budučaha abmienu pałonnymi. Cisk na Rasiju pavinien praciahvacca, pakul jana nie budzie hatovaja spynić vajnu. I, viadoma, my abmierkavali našy ahulnyja kroki dla dasiahnieńnia spraviadlivaha i ŭstojlivaha miru», — napisaŭ u telehram-kanale Zialenski.
Apošni raz z Vensam Zialenski sustrakalisia ŭ Biełym domie ŭ lutym. Razmova ź im i Trampam tady skončyłasia sprečkaj adnosna vajny va Ukrainie i dapamohi ZŠA (Vens paprakaŭ Zialenskaha, što jany niaŭdziačnyja).
Kamientary