U prestyžnych prystaličnych vioskach ziamielny padatak vyras ŭ 10 razoŭ

Sioleta kardynalna źmianiŭsia miechanizm naličeńnia ziamielnaha padatku, jaki ciapier užo napramuju zaležyć ad kadastravaha koštu zaniataj ziamli. Na kolki istotna źmianilisia staŭki ziamielnaha padatku dla hramadzian, raskazała redakcyi načalnik inśpiekcyi Ministerstva pa padatkach i zborach Biełarusi pa Minskim rajonie Teresa Reŭtava.

— Jak pavialičyŭsia ziamielny padatak dla žycharoŭ Minskaha rajona?

— U kožnym asobnym sielskim Saviecie ziamielny padatak pavialičyŭsia pa-roznamu. Minimalnaje pavieličeńnie składaje niedzie ŭ 1,5 raza, jak, naprykład, u Krupicach. U prestyžnych nasielenych punktach niepasredna pad Minskam pavieličeńnie padatku dasiahaje 10 razoŭ i navat bolš. Naprykład, u Ždanovickim sielskim Saviecie na "biełaruskaj Rubloŭcy" ŭ Tarasava ziamielny padatak pavialičycca bolš čym u 10 razoŭ. Raniej u Minskim rajonie ziamielny padatak byŭ amal adnolkavym dla ŭsich nasielenych punktaŭ. Ciapier takoj uraŭniłaŭki ŭžo niama.

— Ci mahčyma ciapier ahučyć prykładnuju sumu ziamielnaha padatku za ziamielny ŭčastak płoščaj u 10 i 20 sotak?

— U vioscy Ždanovičy za 16 sotak raniej płacili 19 tysiač rubloŭ ziamielnaha padatku, ciapier stała 157 tysiač; za padobny ŭčastak u Tarasava płacili tyja ž 19 tysiač, a stała 172 tysiačy; u Dziehciaroŭcy było 30 tysiač, a ciapier nieabchodna budzie zapłacić 206 tysiač rubloŭ. Razam z tym, u Haranskim sielskim Saviecie ŭ vioscy Navasielle letaś za ŭčastak padatak składaŭ 11 tysiač, a ciapier pavialičyŭsia da 47 tysiač rubloŭ.

— U miežach adnaho nasielenaha punkta staŭka ziamielnaha padatku adnolkavaja dla ŭsich uładalnikaŭ ziamli?

— Nie. U Baraŭlanach, naprykład, vyznačana bolš 100 acenačnych zon, tamu kali ŭ adnaho haspadara kvadratny mietr ziamli pavodle kadastravaj acenki budzie kaštavać niedzie 20 dołaraŭ, to ŭžo praz darohu ŭ susieda ziamla moža kaštavać tolki 10 dołaraŭ. Dla hetych uładalnikaŭ učastkaŭ i pamier ziamielnaha padatku budzie istotna adroźnivacca.

— Atrymlivajecca, što ciapier ziamielny padatak pačynaje davoli istotna bić pa kišeni ŭładalnikaŭ pryvatnych damoŭ.

— Tut nie treba ŭzdymać emacyjanalnuju chvalu. Kali b vam prapanavali viosku Sucharava ci Tarasava, to vy, mabyć, vybrali b Tarasava, bo tam žyć utulniej i prestyžniej. A za lepšaje miescaznachodžańnie ŭčastka treba płacić i bolšy ziamielny padatak. Heta suśvietnaja praktyka.

Bolš za toje, spahnany ziamielny padatak zastajecca ŭ biudžecie mienavita miascovych sielskich Savietaŭ. Potym hetyja srodki buduć vykarystoŭvacca dla dalejšaha raźvićcia sacyjalnaj infrastruktury nasielenych punktaŭ.

Uładalniki darahich katedžaŭ majuć niadrennyja zarobki i zmohuć adšukać kala 200 tysiač rubloŭ, kab raźličycca za ziamielny padatak.

Dla žycharoŭ prystaličnych viosak zachoŭvajecca sistema padatkovych ilhotaŭ dla piensijanieraŭ, invalidaŭ, tych, chto žyvie i pracuje ŭ sielskaj miascovaści, dla nastaŭnikaŭ i ŭračoŭ. Adnak kala 40 pracentaŭ žyllovaj nieruchomaści Minskaha rajona zarehistravana na žycharoŭ stalicy.

— Dzie samaja darahaja ziamla ŭ Minskim rajonie?

— Siaredni kadastravy košt kvadratnaha mietra ziamli ŭ Kałodziščach i Baraŭlanach składaje kala 15 dołaraŭ, u Ždanovičach i Sieńnicy jon dasiahaje 17—19 dołaraŭ. Adnak isnujuć i takija nasielenyja punkty, dzie kvadratny mietr ziamli kaštuje ad 1 da 3 dołaraŭ. Tam ziamielny padatak praktyčna nie pavialičyŭsia. Taksama amal nie źmianiŭsia pamier ziamielnaha padatku pa ziamielnych učastkach, jakija zajmajuć hramadzianie ŭ składzie sadavodčych tavarystvaŭ.

— Kali hramadzianam nieabchodna apłačvać ziamielny padatak?

— Pa ziamielnym padatku treba raźličycca da 15 listapada. Jaho možna zapłacić ciapier ci vosieńniu, apłačvać pa častkach ci adnym płaciažom.

— Ci budzie pavialičany ziamielny padatak dla žycharoŭ šmatkvaternych damoŭ?

— Tak, i davoli istotna. Pamier jaho budzie zaležać ad płoščy, jakuju zajmaje dom, i ad kadastravaha koštu takoj ziamli. U Minskim rajonie ziamielny padatak dla žycharoŭ šmatkvaternych damoŭ moža skłaści, u zaležnaści ad płoščy žylla, prykładna 10—20 tysiač rubloŭ u hod.

• 0
• 0
• 0
• 0
• 0
• 0
• 0
• 0