Apazicyja siłaj biare ŭładu ŭ Kirhizii

Zachoplenyja telebačańnie i abłasnyja harady poŭnačy, vyzvalenyja lidery narodnaha kurułtaja. Apazicyja zajaviła pra poŭnaje pieraniaćcie ŭłady. Prezident Bakijeŭ vylecieŭ na radzimy poŭdzień krainy.

PADRABIAZNY FOTAREPARTAŽ. UVAHA! NA ZDYMKACH ŽORSTKIJA SCENY!

Nie prajšło piać hadoŭ, jak Kirhizija pieražyvaje čarhovuju ciulpanavuju revalucyju. Našmat bolš kryvavuju, čym pieršaja. Padziei ŭ sieradu razhortvalisia małankava. Zachoplenyja telebačańnie i abłasnyja harady poŭnačy, vyzvalenyja lidery narodnaha kurułtaja. Apazicyja zajaviła pra poŭnaje pieraniaćcie ŭłady. Choć manifiestantam nie ŭdałosia avałodać prezidenturaj, prezident Bakijeŭ, «paśla doŭhich kansultacyj z kiraŭnictvam siłavych viedamstvaŭ», vyjechaŭ na radzimy poŭdzień krainy.

Jak paviedamlaje najlepšaja błohierka Kirhizii, źbirajučy viestki ź miesca padziejaŭ, apazicyja abvieściła pra stvareńnie ŭrada narodnaha davieru na čale z Rozaj Atunbajevaj. Ministram unutranych spravaŭ pryznačany eks-deputat parłamienta Bałot Šernijazaŭ. U žyvym efiry kiraŭnictvu MUS jaho pradstaviŭ adzin z namieśnikaŭ ministra papiaredniaha składa ŭrada. Siłaviki schililisia da novaha načalstva chutka. Jašče ŭčora Šernijazava aryštavali paśla sproby siłaŭ u Tałasie, a siońnia vyzvalili i ŭźviali na vysokuju pasadu. Tak adbyvajucca pieravaroty. Hetym skončyłasia dla Kirhizii sierada 7 krasavika. A čaćvier 8 krasavika pačaŭsia tym, što z turmy vypuścili byłoha ministra abarony krainy, niekalki dzion tamu asudžanaha na 8 hadoŭ źniavoleńnia Ismaiła Isakava. Novaj uładzie patrebny armiejski hienierał. Eks-prezident Bakijeŭ napeŭna budzie supraciŭlacca, abapirajučysia na svoj radzimy poŭdzień. Supracoŭniki aeraporta nazirali, jak jon vylecieŭ, imavierna, u Oš u supravadžeńni dvojki viernych achoŭnikaŭ i ministra abarony. U toj samy čas natoŭp splundravaŭ i spaliŭ damy siamiejstva Bakijevych u Biškieku.

U siaredzinie pieršaj hadziny nočy manifiestanty narešcie, ź piataj sproby, šturmam uziali Dom urada. Heta adbyłosia niahledziačy na prośby novaha kiraŭnictva nie zachodzić u budynak i razyścisia pa damach. Urad Atunbajevaj zasiadaje ŭ parłamiencie, i heta adzinaje miesca ŭ stalicy, dzie padtrymlivajecca adnosny paradak.

7 krasavika vyciakaŭ termin ultymatyma Bakijevu, vyłučanaha Narodnym kurułtajem.

Kurułtaj pa-kirhizsku — heta źjezd, tradycyjnaja forma samakiravańnia. Jaho abjadnanaja apazicyja mieła procipastavić viertykali prezidenckaj ułady. Prezident Bakijeŭ pryjšoŭ da ŭłady ŭ vyniku padtrymanaj Zachadam revalucyi, abapirajučysia na poŭdzień krainy. Adnak, abasnavaŭšysia ŭ Biškieku, na demakratyčnyja abiacańni zabyŭsia. Atačyŭ siabie svajakami i abraŭ kišenny parłamient, nie puściŭšy tudy apazicyju. Usturbavaŭ Zachad zbližeńniem z Rasijaj, rasčaravaŭ Maskvu niavykananymi abiacankami. Što krasamoŭna, Pucin u sieradu daŭ davoli žorstkija acenki Bakijevu i jahonamu stylu kiravańnia.

Represii vymusili apazicyju zhurtavacca. Na čale jaje ŭstała fihura kampramisnaja i intelihientnaja — byłaja ministarka zamiežnych spravaŭ, a raniej — pasoł u ZŠA Roza Atunbajeva. Narodnym kurułtajem 17 sakavika apazicyja adkazała na Ŭsiekirhizski kurułtaj, praviedzieny Bakijevym u łukašenkaŭskim styli.

Kurułtai ŭ pravincyi papiaredničali vyrašalnaj sprobie siłaŭ. 6 krasavika ŭ Tałasie adzin taki vyliŭsia ŭ supraćstajańnie sa śpiecnazam. Manifiestanty adkazali siłaj na siłu, źmiali milicyju i zachapili abłasnuju administracyju. Im, adnak, zabrakła mocy, kab uziać pad kantrol aeraport, i tam vysadziłasia śpiecpadraździaleńnie ź Biškieka. Jano praź piać hadzin i vyzvaliła ŭziataha ŭ zakładniki hubiernatara.

7 krasavika chvala manifiestacyj nakryła inšyja harady. Apazicyja lohka ŭziała pad kantrol abłasnyja centry poŭnačy, dzie Bakijeŭ niepapularny, a siłaviki dałučalisia da pratestoŭcaŭ. U Narynie apazicyja zachapiła budynak abłasnoj administracyi i abrała «narodnaha hubiernatara». Zachoplenyja administracyjnyja budynki ŭ Tałasie. Kala tysiačy prychilnikaŭ apazicyi pierakryli trasu Biškiek-Oš.

Stalicu ž Kirhizii Biškiek achapili biesparadki, padobnyja da minułaj revalucyi. Tolki bolš kryvavyja. Uranku śpiecnaz sprabavaŭ zachapić štab apazicyi, adnak 200 maładych ludziej šturm adbili. Pastupova apazicyja prasoŭvałasia ŭ horadzie ŭ kirunku prezidentury. Byli zachopleny budynki parłamienta, prakuratury, telebačańnia. Narešcie 15-tysiačny natoŭp atačyŭ budynak Administracyi prezidenta. Pajšli na šturm. Vojski, viernyja Bakijevu, spynili ich hazam, hranatami i ahniastrelnaj zbrojaj. Zahinuła, prynamsi, 65 čałaviek.

Prezident Kurmanbiek Bakijeŭ maŭčyć, meryja abvieściła ŭ horadzie nadzvyčajnaje stanovišča i kamiendanckuju hadzinu. Začynieny aeraport.

Patrabavańnie ŭ ludziej adno — adstaŭka prezidenta Kurmanbieka Bakijeva.

Mitynhoŭcy hruzavikami sprabavali raźbić varoty Biełaha doma, ale milicyjanty rasstrelvali mašyny. Jak zajaviła dyrektarka kaalicyi «Za demakratyju i hramadzianskuju supolnaść» Dynara Ašurchunava, na płoščy pa ludziach stralali snajpiery, a taksama aŭtamatčyki. Pieryjadyčna sutyknieńni ŭspychvajuć iznoŭ. Pa dadzienych ŚMI, jość šmat paranienych.

U roznych miescach horada čulisia streły, vybuchi hranat. U stalicy hareli spalenyja mašyny, u tym liku palicyjnyja. Pratestoŭcy ŭzbrojenyja aŭtamatami Kałašnikava, raniej adabranymi ŭ supracoŭnikaŭ milicyi. Pad viečar demanstranty zachapili i Ministerstva abarony. U ich taksama zaŭvažany lohki hranatamiot.

Syn Bakijeva Maksim, jakoha bačyli pierajemnikam baćki, pierabyvaje ź vizitam u ZŠA.

Eks-prezident Kirhizii Askar Akajeŭ, jaki piać hadoŭ tamu źbieh z krainy ŭ chodzie «ciulpanavaj revalucyi» i ciapier žyvie ŭ Rasii, zaklikaŭ Bakijeva syści ŭ adstaŭku.

U «Tviter» liderki apazicyi Rozy Atunbajevoj piša jaje syn: «Bakijeŭ, pierastań stralać pa svaim narodzie! Tabie hetaha nie daruje nichto».

Kiraŭnik Ministerstva ŭnutranych spravaŭ Małdamusa Kanhantyjeŭ, jaki znachodziŭsia ŭ Tałasie, pavodle niekatorych źviestak, abo zabity, abo paranieny. Pieradajucca zdymki z mabilnaha telefona, na jakich pakazvajecca, jak amonaŭcy iduć z padniatymi rukami, pakazvajučy, što zdajucca natoŭpu. Telekanały paviedamlajuć, što ludzi skandavali hałoŭnym čynam «Bakijeŭ, sychodź».

U suviazi z masavymi pratestami kraina znachodziłasia ŭ infarmacyjnaj błakadzie. Byŭ adsiečany dostup da niekatorych infarmacyjnych sajtaŭ, adklučanaja mabilnaja suviaź.

Pakul palityki dzielać uładu miž novymi kiraŭnikami, u Biškieku maradziory rabujuć kramy, dziaržaŭnyja ŭstanovy i navat Mastacki muziej krainy. Z usich telekanałaŭ iduć zakliki spynić maradziorstva pa ŭsim horadzie. Tranślacyja pieraryvajecca zastaŭkami ab tym, što paciarpiełym terminova patrabujecca donarskaja kroŭ. Lidery apazicyi ŭ teleefiry pryznajuć, što spadziajucca tolki na aŭtarytet vyzvalenaha eks-ministra abarony Isakava, jaki moža dapamahčy adnavić dziejnaść siłavych strukturaŭ i pakłaści kaniec maradziorstvu ŭ stalicy.

• 0
• 0
• 0
• 0
• 0
• 0
• 0
• 0