Internet‑handlary ŭ Minsku buduć płacić adziny padatak pa maksimalnych staŭkach

U Minsku zaćvierdžany pamiery stavak adzinaha padatku dla indyvidualnych pradprymalnikaŭ i fizičnych asob, paviedamili va ŭpraŭleńni kantrolu za indyvidualnymi pradprymalnikami i fizičnymi asobami inśpiekcyi Ministerstva pa padatkach i zborach (MPZ) pa Minsku.

Maksimalnyja staŭki padatku, jak i ŭ raniejšyja hady, zaćvierdžany dla IP, jakija zajmajucca roźničnym handlem praź internet‑mahaziny.

U Minsku aktyŭna raspaŭsiudžvajecca forma roźničnaha handlu praź internet‑mahaziny. Jaje maštaby nie ŭstupajuć handlu ŭ stacyjanarnych abjektach. Tak, vyručka IP ad roźničnych prodažaŭ praź Internet u siarednim u 1,5‑3 razy pierasiahaje vyručku pradprymalnikaŭ, jakija handlujuć u stacyjanarnych mahazinach. Pry hetym adziny padatak vypłačvajecca pa kožnym handlovym abjekcie (handlovym miescy na rynku), a pry handli praź internet‑mahaziny vypłačvajecca adna staŭka adzinaha padatku, niezaležna ad kolkaści internet‑mahazinaŭ. Akramia taho, hety vid dziejnaści ciažka kantralavać. U suviazi z hetym uładalniki internet‑mahazinaŭ u stalicy buduć płacić maksimalnyja staŭki adzinaha padatku, zaćvierdžanyja ŭkazam numar 143.

Naprykład, maksimalnaja staŭka adzinaha padatku pry roźničnym handli praź Internet aŭta‑ i motatranspartam składzie Br1,23 młn. u miesiac, adzieńnia sa skury — Br920 tys., chlebabułačnych i małočnych vyrabaŭ — Br200 tys.

Pamiery stavak adzinaha padatku dla pradprymalnikaŭ i fizičnych asob zaćvierdžany rašeńniem Minharsavieta numar 286 u adpaviednaści z ukazam numar 143. Dakumient prajšoŭ rehistracyju ŭ Ministerstvie justycyi. Pry padrychtoŭcy rašeńnia Minharsavieta za asnovu bralisia staŭki adzinaha padatku, zaćvierdžanyja ŭ papiarednim rašeńni harsavieta (numar 219). Pry pieraraźliku prymienieny kurs jeŭra na 1 studzienia 2010 hoda (Br4119,53), tamu što ŭkaz numar 143 ustupiŭ u siłu z hetaha času.

U suviazi z ustanaŭleńniem bazavych stavak adzinaha padatku ŭ biełaruskich rublach inśpiekcyja MPZ pa Minsku praanalizavała dachody płacielščykaŭ, jakija vypłačvajuć adziny padatak u śfiery roźničnaha handlu i akazańnia pasłuh nasielnictvu. Pravodzilisia manitorynhi ŭ miescach prodažu tavaraŭ dla vyznačeńnia vyručki płacielščykaŭ. Uličvalisia danyja ab dachodach pradprymalnikaŭ, jakija jość ŭ padatkovych słužbach. Akramia taho, śpiecyjalisty praviali paraŭnalny analiz padatkovaj nahruzki na indyvidualnych pradprymalnikaŭ, jakija handlujuć roznymi hrupami tavaraŭ i akazvajuć pasłuhi. Vyśvietliłasia, što jana pa asobnych hrupach tavaraŭ i pasłuh adroźnivajecca.

Vid dziejnaści «pradastaŭleńnie miesc dla karotkaterminovaha pražyvańnia» (kvatery «na sutki») dapoŭnieny punktami «2‑3 kvatery» i «4 kvatery i bolš».

Na dumku padatkovych słužbaŭ, heta stvoryć roŭnyja ŭmovy dla IP, jakija pracujuć u hetaj śfiery, tamu što ciapier majuć miesca vypadki zdačy IP čatyroch i bolš kvater, prytym što vypłata padatku ažyćciaŭlajecca pa anałahičnych staŭkach, jak i pry zdačy dźviuch kvater.

Akramia taho, pa rašeńniu Minskaha haradskoha Savieta deputataŭ pavialičany staŭki adzinaha padatku pa niekatorych pazicyjach.

U pryvatnaści, pry roźničnym handli bulbaj, aharodninaj, pładami, jahadami, kavunami, dyniami, vinahradam — na na Br20 tys.; chlebam i chlebabułačnymi vyrabami, małakom i małočnaj pradukcyjaj — na Br20 tys.; pry akazańni pasłuh: dziejnaść aŭtamabilnaha hruzavoha transpartu ŭ miežach Biełarusi — na Br20 tys.; čystka i ŭborka žyłych pamiaškańniaŭ — na Br20 tys.; čystka i ŭborka transpartnych srodkaŭ — na Br20 tys.

Rašeńnie Minharsavieta ŭstupiła ŭ siłu 4 krasavika hetaha hoda.

• 0
• 0
• 0
• 0
• 0
• 0
• 0
• 0