Za prahlad kvatery ŭ hetym domie ŭ Minsku biaruć 7000 rubloŭ
U «Paŭnočnym bierazie» anansavali chutki start prodažu kvater u novabudoŭli Lake Views. Dom trapiŭ u katehoryju kalekcyjnych, tamu ŭmovy kupli kvadrataŭ u im, miakka kažučy, niestandartnyja.
Kab zapisacca na prahlad kvatery z čarnavym azdableńniem i trochmietrovymi stolami, pakupniku daviadziecca ŭnieści depazit u 7 tysiač rubloŭ, piša Onliner.by.
Zabudoŭščyk pakul nie raskryvaje ŭsiu infarmacyju pra novabudoŭlu Lake Views, ale vidavočna, što cikavaść da jaje ŭžo padsiłkavanaja. Pra dom viadoma tolki toje, što jon uviedzieny ŭ ekspłuatacyju i maje pieramiennuju pavierchavaść: ad 6 da 8 uzroŭniaŭ. Pavodle prajekta, u jaho jość ułasny dvor na styłabacie. Za kožnaj kvateraj zamacavana asobnaje parkovačnaje miesca.
Novabudoŭla prapisałasia na pieršaj bierahavoj linii Cnianskaha vadaschovišča. Kab na svaje vočy ŭbačyć usiu hetuju pryhažość znutry, budźcie hatovyja vykłaści za prahlad 7 tysiač rubloŭ.
— Heta zvarotny depazit, jaki my budziem prasić raźmiaścić u našym banku-partniory, — tłumačyć načalnik adździeła markietynhu «Paŭnočnaha bieraha» Łarysa Fišman.
— Tolki paśla raźmiaščeńnia depazitu budzie ažyćciaŭlacca zapis na kansultacyju pa kalekcyjnych damach. Lake Views — heta pieršy kalekcyjny dom katehoryi ultrapremium u «Paŭnočnym bierazie». Prodažy hetaha doma taksama buduć ažyćciaŭlacca tolki paśla taho, jak patencyjny pakupnik raźmieścić depazit u pamiery 7000 biełaruskich rubloŭ.
Pry kupli kvatery depazit zakryvajecca i moža być zaličany ŭ apłatu damovy. Kali ździełka nie była ździejśniena, hrošy možna budzie źniać u luby momant. Paśla raźmiaščeńnia depazitu i abviaščeńnia startu prodažaŭ my zapisvajem patencyjnaha pakupnika na prahlad kvater i ahučvajem ceny.
Pa słovach Łarysy Fišman, heta novy farmat na staličnym rynku nieruchomaści, ale kvatery sapraŭdy ŭnikalnyja.
— Takoha blizkaha raźmiaščeńnia da vady praktyčna niama nidzie ŭ Minsku. Akramia taho, dom z trochmietrovymi stolami, parkinham, kładoŭkami i pryvatnym dvarom na styłabacie. My chočam, kab start prodažu prajšoŭ u maksimalna pryvatnym farmacie dla budučych pakupnikoŭ, — padsumavała načalnik adździeła markietynhu.
Kamientary